КIэлэцIыкIу къэшъокIо ансамблэу «Мыекъуапэ инэфылъэхэм» щытхъуцIэу къыфаусыгъэм тигъэгушхуагъ.

— «Урысыем лъэпкъ творчествэмкIэ изаслуженнэ коллектив» зыфиIорэ цIэ лъапIэр Урысые Федерацием культурэмкIэ и Министерствэ къызэрэтфиусыгъэм тигъэгушIуагъ, — къытиIуагъ «Мыекъуапэ инэфылъэхэм» яхудожественнэ пащэу, Къэбэр­тэе-Бэлъкъарым изаслуженнэ артистэу, Адыгэ Республикэм инароднэ артистэу Нэныжъ Айдэмыр.

Адыгэ Республикэм культурэмкIэ иминистрэу Аулъэ Юрэ, ащ игуадзэу ШъэуапцIэкъо Аминэт, республикэм лъэпкъ культурэмкIэ и Гупчэ ипащэу Бадый Къэплъан, ащ иIофшIэгъухэу Анцокъо Фатимэ, Нэгъой Азэмат, Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ, ны-тыхэм, нэмыкIхэу зэхэщэн IофыгъохэмкIэ IэпыIэгъу къафэхъухэрэм ансамблэр лъэшэу афэраз.

Тыркуем, Урысыем ишъолъыр­хэм, фэшъхьафхэм «Мыекъуапэ инэфылъэхэр» ащыIагъэх. ТиныбжьыкIэхэм адыгэ къашъохэр къашIыхэзэ, лъэпкъ шэн-хабзэхэр зэрахьэх, искусствэм ишъэфхэр цIыфхэм алъагъэIэсых. Адыгабзэм изэгъэшIэн, игъэфедэн Iофыгъо шъхьаIэхэм ахалъытэ.

Адыгабзэмрэ тхыбзэмрэ я Мафэ, Адыгэ Республикэм ибыракъ, ТекIоныгъэм ия 75-рэ илъэс афэгъэхьыгъэ мэфэкI зэхахьэхэм, нэмыкIхэм «Мыекъуапэ инэфылъэхэр» ахэлэжьэщтых.

ЩытхъуцIэ къызэрэфаусыгъэм фэшI лъэпкъ къэшъокIо ансамблэм тыфэгушIо, игъэхъагъэхэм ахигъэхъонэу фэтэIо.