КIэлэеджакIохэм баскетболымкIэ язэнэкъокъоу «Локобаскет-ЕджэпIэ лигэр» зыфиIорэм икIэух шъолъыр зэIукIэгъухэр Мыекъуапэ испорт еджапIэу В. Максимовым ыцIэ зыхьырэм щызэхащагъэх.

ПэшIорыгъэшъ ешIэгъухэр къа­лэхэм, районхэм ащыкIуагъэх. ТекIоныгъэр къыдэзыхыгъэхэр медальхэм афэбэнагъэх.

— 2006-рэ илъэсым къыщы­ублагъэу Краснодар баскетболымкIэ иклубэу «Локомотив-­Кубань» зыфиIорэм зэнэкъокъур шъолъырым щырегъэкIокIы, — къытиIуагъ зэхэщэкIо купым икIэ­щакIохэм ащыщэу, спортым иветеранэу ХьакIэмыз Аслъан. — Я 9 — 11-рэ классхэм яеджа­кIохэр нахьыпэкIэ зэнэкъокъум хэлажьэщтыгъэх. 2019 — 2020-рэ илъэс зэ­нэкъокъум я 7 — 9-рэ классхэм яеджа­кIохэм яIэ­пэIэсэныгъэ къыщагъэлъагъо.

— Илъэс къэс зэIукIэгъухэм ахэлажьэхэрэм япчъагъэ нахьыбэ мэхъу, — зэдэгущыIэгъур лъегъэкIуатэ Адыгэ Республикэм изаслуженнэ тренерэу Юрий Бойко. — КIэлэеджакIохэр ягуа­пэу баскетбол зэдешIэх.

Мыекъуапэ игурыт еджапIэу N 17-м икомандэхэр яIэпэIэсэныгъэкIэ къахэщыгъэх. КIалэхэр дахэу ешIагъэх. Баскетболышхом цIэрыIо щыхъун зылъэкIыщт кIалэхэр ахэтхэу тэлъытэ.

Я 17-рэ гурыт еджапIэм икIа­лэхэри, пшъашъэхэри щысэ атепхынэу ешIагъэх, апэрэ чIыпIэхэр афагъэшъошагъэх. Красногвардейскэ ыкIи Джэджэ районхэм я 2-рэ, я 3-рэ чIыпIэхэр ахьыгъэх.

ХагъэунэфыкIырэ чIыпIэхэр къыдэзыхыгъэ командэхэм кубок­хэр, спорт шъошэ дахэхэр, щытхъу тхылъхэр, нэмыкIхэри афагъэшъошагъэх.

Баскетбол ешIэ зышIоигъо ныбжьыкIэхэм хэпшIыкIэу япчъа­гъэ хэхъуагъ. Урысыем изэнэ­къо­къу инхэм ахэлэжьэнхэм ти­еджакIохэр фэхьазырых.

Сурэтым итхэр: апэрэ чIы­пIэр къыдэзыхыгъэ коман­дэу гурыт еджапIэу N 17-м ще­джэхэрэр.