Адыгэ Республикэм тхэквондомкIэ изэIухыгъэ зэнэкъокъу мэзаем и 14 – 16-м спорт Унэшхоу Кобл Якъубэ ыцIэ зыхьырэм щыкIуагъ. ЛIыхъужъныгъэм фэгъэхьыгъэ къэбархэр ныбжьыкIэхэм къафаIотагъэх.

Советскэ цIыфхэм Хэгъэгу зэошхом ТекIоныгъэр къызыщыдахыгъэр илъэс 75-рэ зэрэхъурэм зэIукIэгъухэр фэгъэхьыгъагъэх. Донецкэ Народнэ Республикэр, Севастополь, Къырым, Темыр-Осе­тиер — Аланиер, Краснодар ыкIи Ставрополь крайхэр, Астрахань, Волгоград, Ростов хэкухэр, Къэрэщэе-Щэрджэсыр, Адыгэ Республикэр зэнэкъокъум хэлэ­жьа­гъэх. Аныбжьхэм ялъытыгъэу бэнэкIо 420-рэ зэнэкъокъугъ.

Республикэм тхэквондомкIэ и Федерацие итхьаматэу, спортымкIэ дунэе класс зиIэ мастерэу Ф. Беловыр, АР-м испорт еджапIэу N 2-м ипащэу, Урысыем, Адыгеим язаслуженнэ тренерэу Ю. Хъотыр, ащ игуадзэу Н. Гъыщыр, тхэквондом фэгъэхьыгъэ Iофыгъо­хэр еджапIэм щызыгъэцэкIэрэ С. Дэхъужьыр, нэмыкIхэри зэхэщэн Iофыгъохэм чанэу ахэлэжьагъэх.

— Тафэраз зэкIэ IэпыIэгъу къытфэхъугъэхэм, — къытиIуагъ Хъот Юныс. – Адыгэ къэралыгъо университетым физкультурэмрэ дзюдомрэкIэ и Институт ипащэу Бгъуашэ Айдэмыр, университетым ишхапIэ иIофышIэхэм, ухъумэн Iофыгъохэм ягъэцэкIэн зезыхьагъэхэм япащэу, Урсыем спортымкIэ гъогогъуитIо имастерэу Батэ Рэмэзан, фэшъхьафхэм яшIушIагъэ къыхэзгъэщы сшIоигъу.

Донецкэ Народнэ Республикэм къикIыгъэ купым ипащэу Елена Сергунинам къытиIуагъ Адыгэ Республикэр лъэшэу ыгу зэрэрихьырэр, бысымхэр гуфэбэныгъэ ахэлъэу къазэрапэгъокIыгъэхэр.

Илъэси 7 — 15 зыныбжьхэр зэнэкъокъугъэх. Къэрэщэе-Щэр­джэ­сым апэрэ чIыпIэр фагъэшъо­шагъ. Адыгэ Республикэм ятIонэрэ чIыпIэр къыдихыгъ, Краснодар краим и Тихорецкэ район ящэнэрэ хъугъэ. ХагъэунэфыкIырэ чIыпIэхэр къыдэзыхыгъэ командэхэм телевизорхэр, кубокхэр, нэмыкI шIухьафтынхэр аратыжьыгъэх.

Сурэтхэм арытхэр: Адыгэ Рес­публикэм тхэквондомкIэ икоманд, зэнэкъокъум ныбжьыкIэхэр хэлажьэх.