«Зэкъошныгъ» Мыекъуапэ – «Тамбов» Тамбов – 3:2. Ныбджэгъу ешIэгъур мэзаем и 16-м Крымскэ щыкIуагъ. «Зэкъошныгъ»: Ковалев, Хъуа­кIо, Катаев, Омаров, Такълый (Гъыщ, 70), Къонэ (Хьасанэкъу, 80), Мамонов (Крылов, 60), Дыхъу (Делэкъу, 46), Белов, Ахмедханов, Шъхьэлахъо (Бабенко, 46). Къэлапчъэм Iэгуаор дэзыдза­гъэхэр: Ризван Ахмедханов – гъогогъуищэ къахэщыгъ – «Зэ­къошныгъ».

Илъэс ешIэгъум паублэжьыным зыфагъэхьазырзэ, командэхэм ныбджэгъу ешIэгъухэр зэхащэх. Тамбов иешIэкIо ныбжьыкIэхэм «Зэкъошныгъэр» заIокIэм, пчъагъэр зэрэлъыкIуатэрэм гушIуагъуи, гумэкIыгъуи хэтлъагъощтыгъ: 1:0, 1:1, 2:1, 2:2, 3:2.

Гупчэм щешIэрэ Ризван Ахмедхановыр ухъумакIохэм IэшIэхэу аIэкIэкIы, къэлапчъэм пэчыжьэу лъэшэу дэоным фэгъэсагъ. Ныбджэгъу зэIукIэгъум Р. Ахмедхановым зэхэщэн Iофыгъохэри дэгъоу щигъэцэкIагъэх.

— Адыгэ Республикэм испорт еджапIэхэм ащагъэсэгъэ кIалэхэр нахьыбэ хъухэу «Зэкъошныгъэм» щедгъэшIэнхэ тимурад. Ар къыдэтлъыти, ХъуакIор, Шъхьэлахъор, Такълыир, Гъыщыр, нэ­мыкIхэри зэIукIэгъум хэдгъэлэжьагъэх. КIалэхэм яIэпэIэсэныгъэ зыкъырагъэIэтын алъэкIыщтэу тагъэгугъэ. Ныбджэгъу зэIукIэгъухэм фэшъхьафхэри ахэдгъэлэжьэщтых, «Зэкъошныгъэм» нахь къе­кIущтхэр ныбжьыкIэхэм къахэтхыщтых, — къытиIуагъ тренер шъхьаIэу Ешыгоо Сэфэрбый.

Мэзаем и 19-м «Зэкъошныгъэр» Адлер кIощт. Апэрэ, ятIонэрэ купхэм ахэт командэхэм уплъэкIун зэIукIэгъухэр адыриIэщт. Гъэтхэпэ мазэм и 14-м илъэс ешIэгъум паублэжьыщт.

НэкIубгъор зыгъэхьазырыгъэр ЕмтIылъ Нурбый.