Зэныбджэгъухэм япчыхьэзэхахь
Дунаим щыцIэрыIо композиторэу Л. Бетховен къызыхъугъэр илъэс 250-рэ зэрэхъурэм фэгъэхьыгъэ пчыхьэзэхахьэ Адыгэ Республикэм и Къэралыгъо филармоние щыкIуагъ.
Музыковедэу Хьакъуй Заремэ зэрищэгъэ зэхахьэм композиторым иIофшIагъэ къыщиIотагъ. Республикэм и Къэралыгъо филармоние и Къэралыгъо симфоническэ оркестрэ идирижерэу СтIашъу Къэплъан музыкантхэм япащэу Л. Бетховен ыусыгъэхэ произведениехэу дунэе классикэм хэхьагъэхэм ащыщхэр пчыхьэзэхахьэм щагъэIугъэх.
Л. Бетховен и Симфониеу N 2-р фортепианэм пае оркестрэр игъусэу концертэу N 3-р, нэмыкIхэри симфоническэ оркестрэм дахэу, жьыр кIэтэу къыригъэIуагъэх.
Дунэе зэнэкъокъухэм щытхъуцIэхэр къащыдэзыхыгъэ Роберт Алиевым оркестрэр къыдежъыузэ фортепианэмкIэ Людвиг ван Бетховен ипроизведениехэр ыгъэжъынчыгъэх. Концертыр къызаухым, залым чIэсхэр къэтэджыхи, артистхэм бэрэ Iэгу къафытеуагъэх. ЦIыфхэр зэбгырыкIыжьынхэу зэрэфэмыехэр Роберт Алиевым къыдилъыти, икIэрыкIэу фортепианэм кIэлъырытIысхьагъ, композитор цIэрыIом ыусыгъэхэм ащыщхэр гур зыIэпищэу зэхытигъэхыгъэх.
Роберт Алиевыр Пятигорскэ къыщыхъугъ, Китаим Iоф щешIэ. СтIашъу Къэплъанрэ Р. Алиевымрэ Ростов-на-Дону дэт консерваторием щызэдеджагъэх, ныбджэгъуныгъэу зэдыряIэр искусствэм щызэдылъагъэкIуатэ.
— Р. Алиевым Китаим щырегъаджэх, концертхэр хэгъэгу зэфэшъхьафхэм къащеты, — къытиIуагъ СтIашъу Къэплъан. — ТапэкIи концертхэр тызэгъусэу къэттыщтых.
Сахьидэкъо Нурбый. Сурэтхэр зэхахьэм къыщытетхыгъэх.