«Локобаскет-ЕджэпIэ лигэр» зыфиIорэм икIэух зэнэкъокъу Адыгэ Республикэм щырагъэжьагъ.

Республикэм иеджэпIэ 80-м нахьыбэ 2019 — 2020-рэ илъэс зэнэкъокъум хэлажьэ. Я 7 — 9-рэ классхэм арыс кIэлэеджакIохэр 850-рэ фэдиз мэхъух. Шъолъыр кIэух зэнэкъокъум шъэожъые команди 4, пшъэшъэжъые команди 4 щызэIукIэщтых.

Адыгэ Республикэм гъэсэныгъэмрэ шIэныгъэмрэкIэ и Министерствэ спорт еджапIэхэм IэпыIэгъу афэхъу. 2006-рэ илъэсым Краснодар баскетболымкIэ иклубэу «Локомотив-Кубань» зэнэкъокъур зызэхещэм, Урысыем мэшIоку гъогухэмкIэ икомпание IэпыIэгъу къыфэхъугъ.

Мыекъуапэ испорт еджапIэу Владимир Максимовым ыцIэ зыхьырэм зэIукIэгъухэр мэзаем и 16-м щыкIощтых. Зэнэкъокъур пчэдыжьым сыхьатыр 10-м аублэщт. ХагъэунэфыкIырэ чIыпIэхэр къыдэзыхыхэрэм шIухьафтынхэр афашIыщтых.