ЦIыфхэм IофшIэпIэ чIыпIэхэр ягъэгъотыгъэнхэм, лэжьапкIэм хэгъэхъогъэным, продукциеу IэкIыбым агъакIорэр нахьыбэ шIыгъэным, кооперацием зегъэушъомбгъугъэным афэгъэхьыгъэ лъэпкъ проектитIум къащыдэлъытагъэхэр икIыгъэ илъэсым гъэцэкIагъэ зэрэхъугъэхэр ары ахэм япхырыщын фэгъэзэгъэ IофышIэ купэу АР-м щызэхащагъэм тыгъуасэ зэхэсыгъоу иIагъэр зыфэгъэхьыгъагъэр. Ар зэрищагъ АР-м и Премьер-министрэ игуадзэу Сапый Вячеслав.

Мы проектитIур зыщыпхыращыщт субъектхэм Адыгеир за­хэхьагъэр, федеральнэ гупчэм пшъэрылъ гъэнэфагъэхэр къызи­шIыгъэхэр блэкIыгъэ илъэсыр ары ныIэп. Ахэм япхырыщын министерствэ, къулыкъу ыкIи ведомствэ зэфэшъхьафыбэ хэлажьэ, ау лъыплъэрэр АР-м экономикэ хэхъоныгъэмкIэ ыкIи сатыумкIэ и Министерств. Ащ ипащэу Къуанэ Анзаур къызэриIуагъэмкIэ, 2019-рэ илъэсым агъэцэкIэн фаеу пшъэрылъэу федеральнэ гупчэм къафигъэуцугъагъэхэр зэшIохыгъэ хъугъэх.

Лъэпкъ проектхэм япхырыщын пае шъолъыр проект зэфэшъхьафхэр аштагъэх, министерствэу, ведомствэу ахэм афэгъэ­зэгъэщтхэм агъэцэкIэщтхэр агъэ­нэфагъэх. «Производительность труда и поддержка занятости населения» зыфиIорэ проектым ипхырыщын пае шъолъыр проекти 3, «Междуна­родная кооперация и экспорт» зыцIэм пае 4 Адыгеим ща­штагъ.

Проект пэпчъ къащыдэлъытагъэм игъэцэкIэнкIэ зэшIохыгъэ щыI, ахэм ягугъу зэхэсыгъом къыщашIыгъ, 2020-рэ илъэсым анаIэ зытырагъэтын фаехэри щагъэнэфагъэх. Мэкъумэщ хъыз­мэтым ипродукциеу IэкIыбым щыIуагъэкIырэр нахьыбэ шIыгъэ­ным фытегъэпсыхьагъэр шъо­лъыр проектэу аштагъэхэм ащыщ. Республикэр мэкъумэщ субъектэу зэрэщытым ишыхьа­тэу, мы лъэныкъомкIэ зэшIохыгъэ хъугъэр нахьыб.

АР-м мэкъу-мэщымкIэ иминистрэ игуадзэу Хъут Дамирэт къызэриIуагъэмкIэ, США-м идоллар миллион 13 ауасэ пстэумкIи 2019-рэ илъэсым тихъызмэтшIапIэхэм IэкIыб къэ­ралхэм ащаIуагъэкIыгъ. Федеральнэ гупчэм доллар миллиони 9,7-рэ ауасэ Адыгеим Iэ­кIыбым щыIуигъэкIынэу пшъэ­рылъ къыгъэуцугъагъ. Анахьыбэу зипродукцие зэпырызыщыгъэхэм ащыщых тыгъэгъэзэ дагъэ къэ­зышIырэ хъызмэтшIапIэу ООО-у «Мамрыкъор», СПК-у «Хьати­къуаер», щэм хэшIыкIыгъэ гъо­мылапхъэхэр къыдэзыгъэкIырэ Красногвардейскэ заводыр, нэмыкIхэр.

Ащ фэдэу пшъэрылъхэр гъэцэкIагъэ хъугъэхэми, пчъагъэ­хэм къызщарагъэхъугъэхэр щыIэ­хэми, джыри мыгъэ Iоф зыдашIэн фэе щыкIагъэри макIэп. Премьер-министрэм игуадзэ пстэури къызэфихьысыжьзэ, ар ипсалъэ къыщыхигъэщыгъ.

— ЕгъэжьэпIэ пстэуми къин горэ ахэлъ, пчъагъэхэм уагъэ­рэзэпэнэу щытэп, — къыIуагъ ащ. – Ау мы лъэпкъ проектхэм мэхьэнэ ин зэряIэр, экономикэм хэхъоныгъэ егъэшIыгъэным зэрэфытегъэпсыхьагъэхэр къыдэтлъытэзэ ахэм япхырыщын фэгъэзагъэхэм нахь гъэлъэшыгъэу Iоф адатшIэмэ, 2020-рэ илъэсым ыкIэм зэфэхьысыжьхэм тызэрагъэгушIожьыщтым сицыхьэ телъ. ТызэдеIэжьзэ едгъэжьагъэр лъыдгъэкIотэн фае.

ХЪУТ Нэфсэт.