«АГУ-Адыиф» Мыекъуапэ – ЦСКА Москва – 14:30 (6:15). Мэзаем и 11-м спорт Унэшхоу Кобл Якъубэ ыцIэ зыхьырэм щызэдешIагъэх. Зезыщагъэхэр: А. Будагов, Р. Ханмагомедов. «Адыиф»: къэлэпчъэIутхэр: Кожубекова, Баскакова, Силантьева; ешIакIохэр: Ефимкина – 2, Серадская – 4, Куцевалова, Дмитриева – 1, Загайко – 3, Кобл, Клименко, Краснокутская, Зубова – 1, Дворцевая – 3. ЦСКА-м къыхэщыгъэхэр: Горшенина – 5, Маркова – 5, Жилинскайте – 5, Ристовска – 3, Ильина – 2, Самойленко – 2, Гончарова – 2, Скоробогатченко – 2.

ЦСКА-р 2019-рэ илъэсым зэхащагъ, спорт Унэшхоу «Игровоим» ешIэгъухэр щэкIох. Урысыем гандболымкIэ ихэшыпыкIыгъэ командэ игупчэу ЦСКА-р агъэпсыным пылъых. Ар къыдалъытэзэ, ешIакIохэр къырагъэблэгъагъэх. Дарья Дмитриевар Урысыем ихэшыпыкIыгъэ командэ, ЦСКА-м якапитан. Швецием къыращыгъэ Сабина Якобсон, Македонием щапIугъэ Сара Ристовскар, нэ­мыкI ешIакIохэу гандболым хэгъозагъэ­хэр ЦСКА-м хэтых.

— Тэ дышъэм тыфэбанэ, «Ростов-Доным» зэIукIэгъур къышIотхьын тимурад, — къытиIуагъ ЦСКА-м щешIэрэ Юлия Марковам.

Олимпиадэ джэгунхэм дышъэр къащызыхьыгъэхэм ащыщ Екатерина Ильинар.

— СиIофхэр дэгъоу лъэкIуатэх, ЦСКА-м тапэкIи сыщешIэщт, — къытиIуагъ Екатерина Ильинам.

Лада Самойленкэр Краснодар краим щыщ, «Кубань» Краснодар щешIэщтыгъ. Л. Самойленкэр Адыгэ Республикэми щашIэ. «АГУ-Адыифым» хэтэу къэла­пчъэм Iэгуаор бэрэ зэрэдидзэщтыгъэр тыгу къэкIыжьы.

ЕшIэгъур Мыекъуапэ зыщаухым, Лада Самойленкэр инэIуа­сэхэу зэIукIэгъум еплъыгъэхэм, къыфэгумэкIыхэрэм гущыIэгъу афэхъугъ.

— «АГУ-Адыифыр» шIукIэ сыгу къэкIыжьы, ЦСКА-м сыщешIэ сшIоигъу, — къытиIуагъ Ладэ. — ШIукIэ тызэIокI.

— Лада Самойленкэр пшъэшъэ ныбжьыкI, ыпэкIэ зилъыкIэ ухъумакIохэр лъэшэу егъэгумэкIых, хъагъэм Iэгуаор бэрэ редзэ, — къытиIуагъ ЦСКА-м ипащэхэм ащыщ.

ЕшIэгъур

ЦСКА-м текIоныгъэр къызэрэдихыщтым щэч хэлъыгъэп, ешIэгъур зэраухыщт пчъагъэр ары тымышIэщтыгъэр: 0:2, 1:3, 3:7, 5:9, 6:15. ТикъэлэпчъэIутэу Светлана Кожубековар цыхьэшIэгъоу зэрешIэрэм ишIуагъэкIэ пчъагъэр нахьыбэ хъугъэп.

Анастасия Серадскаям лъэшэу ыдзырэ Iэгуаор хъагъэм щэчэрэгъу, Анастасия Загайко ошIэ-дэмышIэу Iэгуаор хъагъэм редзэ. Анна Ефимкинари иIэпэIэсэны­гъэкIэ къахэщы. Кобл Зурет хъа­гъэм Iэгуаор ридзэныр къыдэмыхъурэми, ЦСКА-м рэхьат ритырэп. УхъумакIохэр егъэгумэкIых, ащ къыпэуцухэзэ, шапхъэхэр зэраукъохэрэм фэшI ешIапIэм рагъэкIых, тазыр метри 7 дзыныр тиешIакIохэм агъэцакIэ. ЦСКА-м ипытапIэхэм «Адыифыр» апхырыкIыным, хъагъэм Iэгуаор бэрэ дидзэным «Адыифыр» джырэ уахътэ фэхьазырэп.

Пчъагъэр: 10:22, 11:25, 13:29, 14:30. ЦСКА-м лъэкIэу иIэр икъоу къымыгъэлъэгъуагъэу зэIукIэгъур аухыгъ.

Пресс-зэIукIэр

ЦСКА-м итренер шъхьаIэу Лунд Ян Лесли къыIуагъ «Адыифым» имэхапIэхэр гъэфедэгъэнхэм зэрэпылъыгъэхэр. Ухъумэн Iофыгъохэр Адыгеим икомандэ дэгъоу ыгъэцакIэхэрэп, ыпэкIэ зилъыкIэ хэкIыпIэхэр къыгъотынхэм фэшI псынкIэу ешIэрэп. ЦСКА-м зэкIэ хэтхэр ешIэгъум хэлэжьагъэх. ЕшIэгъу къинхэм зафагъэхьазыры.

«Адыифым» итренер шъхьаIэу Никита Голуб щыкIагъэу тикомандэ иIэхэм ащыгъуаз. ЦСКА-м текIон ылъэкIыщтэп, ау «Луч», «Уфа», нэмыкIхэм къашIуихьыныр «Адыифым» ипшъэрылъ.

«Адыифыр» мэзаем и 16-м «Лучым», и 18-м ЦСКА-м, и 20-м «Звездам» адешIэщт. ЗэIукIэгъу­хэр Москва, Звенигород ащыкIощтых.

Анахь дэгъоу ешIагъэхэр зэхэщакIохэм къыхагъэщыгъэх. Адыгэ Республикэм гандболымкIэ и Федерацие ипащэу Кочева Сусанэ «Адыифым» иешIакIоу Анастасия Серадскаям къыфэгушIуагъ, нэпэ­еплъ шIухьафтыныр къыраты­жьыгъ.

Сурэтхэм арытхэр: «Адыифыр» ЦСКА-м дешIэ; Кочева Сусанэ Анастасия Серадскаям дэгущыIэ.