Уахътэм ымыгъэпкIыжьырэ сатырхэр
Дунаим щыцIэрыIо усэкIошхоу А. С. Пушкиным ишIэжь Мафэ мэзаем и 10-м, усакIор зылIэгъэ мафэм, Урысыем щыхагъэунэфыкIы.
Мы мафэм ехъулIэу Мыекъуапэ ыкIи республикэм ирайон зэфэшъхьафхэм А. С. Пушкиным фэгъэхьыгъэ Iофтхьабзэхэр ащызэхащэх.
Мэзаем и 7-м Адыгэ Республикэм и Лъэпкъ тхылъеджапIэ поэзием исыхьатэу «Читая пушкинские строки» зыфиIорэр щыкIуагъ. Ар, зэхэщакIохэм къызэраIуагъэмкIэ, къыткIэхъухьэрэ ныбжьыкIэхэм урыс классическэ литературэр нахь ягъэшIэгъэным, А. С. Пушкиным ипоэзие лъэш пэблагъэ шIыгъэнхэм афэгъэхьыгъагъ.
Iофтхьабзэм къекIолIэгъэ ныбжьыкIэхэр — Адыгэ къэралыгъо университетым истудентхэр, дзэ частэу 72153-м идзэкъулыкъушIэхэр, тикъалэ иеджэпIэ зэфэшъхьафхэм къарыкIыгъэхэр — усэкIо цIэрыIом ищыIэныгъэ ыкIи итворчествэ игъэкIотыгъэу щыфагъэнэIосагъэх. Поэтическэ сыхьатым ягуапэу хэлэжьагъэх АР-м и Къэралыгъо драматическэ урыс театрэу А. С. Пушкиным ыцIэкIэ щытым иартистхэр. Ахэр усакIом ипроизведениехэм къяджагъэх. Iофтхьабзэм къыдыхэлъытагъэу агъэхьазырыгъэ тхылъ къэгъэлъэгъонэу «Два века с Пушкиным» зыфиIорэр усэкIошхом ипроизведение анахь гъэшIэгъонхэмкIэ ыкIи Пушкиным ищыIэныгъэ, итворчествэ къызыщыIотагъэхэмкIэ зэлъыпкIэгъагъ, электроннэ лъэтегъэуцоми поэзием исыхьат чIыпIэ щыриIагъ.
Творческэ Iофтхьабзэм филологие шIэныгъэхэмкIэ кандидатэу, АКъУ-м идоцентэу, литературоведэу Кирилл Анкудиновыр хэлэжьагъ. Поэзием исыхьат фэбагъэ хэлъэу кIуагъэ, Пушкиныр зикIасэхэр, зыгу нэсыхэрэр иусэ мыпкIыжь лъэшхэм къяджагъэх, лIэшIэгъуитIум къехъум зипоэтическэ сатырхэр мыухъэфыгъэ усакIом творческэ кIочIэпкъ пытэ дэгъу зэриIэм уехъырэхъышэнэу зэрэщымытыр зэхахьэм щыIагъэхэм зэхашIагъ, усэ гущыIэ лъэшым пстэуми агухэр ыщэфыгъэх.
Дзэукъожь Нуриет.