ЗэIукIэгъухэм заушъомбгъу
Къэбэртэе-Бэлъкъарым инароднэ артистэу, композиторэу Къэбэрдэкъо Мурат иконцерт Адыгэ Республикэм и Къэралыгъо филармоние щыкIуагъ.
Къэбэрдэкъо Мурат Адыгэ Республикэм иныбджэгъушIу. Мыекъуапэ щызэхищэхэрэ зэIукIэгъухэр сыдигъокIи тшIогъэшIэгъоных. Дунэе классикэм хэхьэгъэ композиторхэу Л. Бетховен, И. Бах, И. Брамс, нэмыкIхэм аусыгъэхэр фортепианэмкIэ ыгъэжъынчыгъэх.
Пчыхьэзэхахьэм искусствэр зышIогъэшIэгъонхэр, студентхэу дунэе зэIукIэгъухэм ахэлажьэхэрэр щызэIукIагъэх. Концертыр къызаухым М. Къэбэрдэкъор культурэм иIофышIэхэм, ныбжьыкIэхэм гущыIэгъу афэхъугъ.
Республикэ филармонием исимфоническэ оркестрэ идирижерэу СтIашъу Къэплъан, филармонием имузыкантхэу Набэкъо Беллэ, СтIашъу Мэдинэ, республикэ общественнэ движениеу «Адыгэ Хасэм» иныбжьыкIэ Iофыгъохэм ахэлэжьэрэ Дзэсэжъ Альмир, оркестрэм идирижерэу Блэгъожъ Юныс, нэмыкIхэри М. Къэбэрдэкъом гущыIэгъу фэхъугъэх, ныбжьыкIэхэр къыгоуцохэзэ нэпэеплъ сурэтхэр атырахыгъэх.
— Искусствэм тызэрэзэфищэрэр сигуапэ, — къытиIуагъ Къэбэрдэкъо Мурат. — НыбжьыкIэхэм яшIэныгъэ хагъахъо ашIоигъу.
— Зэлъэпкъэгъухэм язэхахьэхэм тигуапэу тахэлажьэ, — къеIуатэ СтIашъу Къэплъан. —УпчIэхэм яджэуапхэр зэфэтхьысыжьыщтых, джыри тызэIукIэщт. Сурэтыр зэхахьэм къыщытетхыгъ. М. Къэбэрдэкъор джабгъумкIэ ятIонэрэу щыт.