Джэныкъо машIор кIосэщтэп
Унагъом иджэныкъо машIо фэгъэхьыгъэ къэгъэлъэгъон Мыекъуапэ къыщызэIуахыгъ.
Адыгеим исурэтышIхэм я Союзрэ республикэм исурэт къэгъэлъэгъуапIэрэ Iофтхьабзэм кIэщакIо фэхъугъэх.
Республикэм исурэтышIхэм я Союз итхьаматэу Елена Абакумовам зэхахьэр зэрищагъ. ЦIыфыр зыщыпсэурэ унэм имэхьанэ ар къытегущыIагъ. Унагъом ифэIофашIэхэр унэм зэрэщигъэцакIэхэрэм дакIоу, пIуныгъэм, шэн-хабзэхэм язехьан, цIыфыр псэуным, лэжьэным афэшI къэтэджыхэрэ Iофыгъомэ ямэхьанэ зызэриушъомбгъурэр къыхигъэщыгъ.
Тиуахътэ хъулъфыгъэмрэ бзылъфыгъэмрэ зэгомытхагъэхэу зэдэпсэухэу бэрэ къыхэкIы. Унагъор пытэным пае зэдэпсэухэрэр зэготхэгъэнхэ фаеу Е. Абакумовам ылъытагъ.
Джэныкъо машIом унагъор зэригъэфабэрэм, ны-тыхэм ясабыйхэм пIуныгъэ дэгъу аратынымкIэ гукIэгъу ахэлъэу псэунхэм еплъыкIэу фыряIэр къыраIотыкIыгъ зэлъашIэрэ сурэтышI-модельерэу СтIашъу Юрэ, сурэтышIэу, кIэлэегъаджэу Ольга Бреславцевам, Адыгеим ибзылъфыгъэхэм я Союз ипащэу Светлана Дорошенкэм, нэмыкIхэм.
Сурэт 90-м нахьыбэ къагъэлъагъо. Ф. ПэтIыуащэм, Т. Къатым, Э. Овчаренкэм, А. Гъогунэкъом, М. Тыгъужъым, В. Бирюковым, Р. Хъуажъым, фэшъхьафхэм ягупшысэхэм сурэтэу атехыгъэхэм тшIогъэшIэгъонэу тяплъыгъ.
Бырсыр Абдулахь исурэтхэм гур зыфащэ, щыIэныгъэм къыхэхыгъэх. Абрэдж Гощэфыжь Iуданэхэр зэригъэфедагъэхэр къытфиIотагъэх. Сурэтэу ышIырэм лъэпкъ гупшысэр щыпхырещы. ЦIыфхэм Iоф зэрашIэрэр шъхьафэу къегъэлъагъо. Унагъом зэфыщытыкIэу илъым нэмыкIынэхэмкIэ урегъэплъы.
— Адыгэ шъуашэр хэдыкIыным ригъэкIузэ, адыгэм итарихъ, шэн-хабзэхэм уафещэ, — къытиIуагъ Едыдж Мэмэт.
Къат Теуцожь хъулъфыгъэхэм язэдэгущыIэгъу сурэтымкIэ къегъэлъагъо. Лъэпкъым дэхагъэу ылэжьыгъэр сурэтым хэплъагъо пшIоигъоу IофшIагъэм уасэ фэошIы.
Сурэтищ зэхэтхэр Бырсыр Абдулахь, Ольга Бреславцевам, Хъуажъ Рэмэзанэ, нэмыкIхэм гъэшIэгъонэу къагъэлъагъох. О. Бреславцевар Адыгэ Республикэм искусствэхэмкIэ иколледжэу Тхьабысымэ Умарэ ыцIэ зыхьырэм икIэлэегъадж. НыбжьыкIэхэм бэрэ зэрахэтырэм къыпкъырыкIырэ IофшIагъэу иIэр адыгэ шэн-хабзэхэм, лъэпкъ шIэжьым, нэмыкIхэм яхьылIагъэх.
Плъыжьышъор нахь къебэкIэу ышIыгъэ сурэтхэр джэныкъо машIом, псэ зыпыт зэIукIэгъухэм, лIэужхэм язэпхыныгъэхэм, нэмыкIхэм яхьылIагъэх. Джэныкъо машIор зэрэщыблэрэр, ныбжь зэфэшъхьаф зиIэхэр фабэм зэрэзэфищагъэхэр, фэшъхьафхэр гум къылъэIэсых.
— Шэн-хабзэхэр, уихэгъэгу идэхагъэ сурэтым къыщыбгъэлъэгъонхэ плъэкIыщт, — къытиIуагъ Светлана Дорошенкэм. —Адыгэ Республикэм сызэрэщыпсэурэм сырэгушхо. Тыкъэзыуцухьэрэ дунаир дахэ, тикъушъхьэхэмрэ псыхъохэмрэ нэр пIэпахы, лъэпкъыбэ тыхъоу республикэм имамыр псэукIэ тэгъэпытэ. Адыгэ Республикэм шIушIагъэу иIэр сурэтхэм ахэтэлъагъо.
— Сурэтым уеплъызэ, удэгущыIэ пшIоигъо охъу, — игупшысэхэм тащегъэгъуазэ Адыгэ Республикэм культурэмкIэ изаслуженнэ IофышIэу СтIашъу Юрэ. — Унагъор пытэмэ — хэгъэгури пытэщт. СурэтышI цIэрыIохэр ныбжьыкIэхэм щысэшIу афэхъух.
Бырсыр Абдулахь кIэщакIо зыфэхъугъэ къэгъэлъэгъоныр мэзаем и 17-м нэс республикэм культурэмкIэ и Министерствэ исурэт къэгъэлъэгъуапIэ щыкIощт.
Сурэтхэр зэхахьэм къыщытетхыгъэх.