Урысыем гандболымкIэ ибзылъфыгъэ командэхэу суперлигэм хэтхэм япэшIорыгъэшъ зэIукIэгъухэр зэхащэх.

Мыекъопэ «АГУ-Адыифым» изичэзыу ешIэгъу непэ Мые­къуапэ щыкIощт. Волгоград ­икомандэу «Динамо-Синарэм» типшъа­шъэхэр енэкъокъущтых. «Адыифым» итренер шъхьаIэу агъэнэфэгъэ Никита Голуб зэри­лъытэрэмкIэ, ауж къинагъэхэ командэхэм къахэкIыжьынхэ алъэкIыщт.

Гандболым хэгъозагъэхэ Ирина Клименкэмрэ Анна Ефим­кинамрэ «Кубань» Краснодар къыхащыхи, «Адыифым» аштагъэх. И. Клименкэр гупчэм щешIэ, ухъумэн Iофыгъохэм нахь афэгъэзагъ. Анна Ефимкинар джабгъу лъэныкъом щешIэ, Iэ сэмэгумкIэ Iэгуаор едзы.

Ижевскэ икомандэу «Уни­верситетым» «Адыифыр» зыде­шIэм, А. Ефимкинам гъо­го­гъуи 5 къэлапчъэм Iэгуаор дидзагъ. ЗэхэщакIохэм ешIэкIо анахь дэ­гъур къызхахын зэхъум, А. Ефимкинам ыцIэ къыра­Iуагъ.

Урысыем изаслуженнэ трене­рэу Евгений Поповыр А. Ефимкинам фэгушIуагъ, нэпэ­еплъ шIу­хьафтыныр ритыжьыгъ.

— «Адыифым» дэгъоу къыщыс­пэгъокIыгъэх, сыгу етыгъэу тапэ­кIи сешIэщт, — къы­тиIуагъ Анна Ефимкинам.

ЧIыпIэхэр

1. «Ростов-Дон» — 36 2. «Лада» — 28 3, ЦСКА — 24 4. «Астраханочка» — 22 5. «Звезда» — 22 6. «Кубань» — 22 7. «Ставрополье» — 20 8. «Динамо» — 13 9. «Университет» — 8 10. «Адыиф» — 7 11. «Уфа» — 4 12. «Луч» — 2.

Спорт Унэшхоу «Ошъутенэм» «Адыифыр» непэ «Динамэм» щыIукIэщт, ешIэгъур пчы­хьэм сыхьатыр 6-м рагъэжьэщт. Сурэтым итхэр: Анна Ефимкинамрэ Евгений Поповымрэ.