Мыекъуапэ волейболымкIэ изэIухыгъэ зэнэкъокъу кIэухым фэкIо. Командэ пэпчъ зы ешIэгъу е ешIэгъуитIу къыфэнагъэр.

Хъулъфыгъэхэм язэнэкъокъу «АГУ-Мары» зыфиIорэм апэрэ чIыпIэр къыщыдихыгъ. «АГУ-Мары» 3:2-у «Мыекъуапэ-Нартым» текIуагъ. ЗэIукIэгъур зэрэкIуа­гъэр: 25:20, 25:16, 23:25, 23:25, 15:9. «Мыекъуапэ-Нартым» ятIонэрэ чIыпIэр ыхьыгъ. «АГУ-Мары» зэкIэ иешIэгъухэм текIоныгъэр къащихьыгъ, «Мыекъуапэ-Нартыр» очкоуи 4-кIэ ащ ыуж къинагъ.

Бзылъфыгъэхэм язэIукIэгъухэр

Къулэ Аскэрбый пэщэныгъэ зыдызэрихьэрэ ПФР-р 3:0-у «Мые­къуапэм» текIуагъ.

ЕшIэгъухэр зэраухыгъэхэр: 25:18, 25:18, 25:10. Мыекъуапэ икомандэу СШОР-р 3:1-у МГТУ-м текIуагъ. ЗэIукIэгъухэр зэрэкIуагъэхэр: 25:19, 15:25, 27:25, 25:20. МГТУ-р анахь лъэшхэм ащыщ, ау апэрэ чIыпIэр къыдихын ылъэ­кIыщтэп, зэIукIэгъу бащэ шIуа­хьыгъ. «СШОР-Мыекъуапэм» текIоныгъи 5 къыдихыгъ, очко 15 иI. ПФР-м зэIукIэгъуиплIыри къыхьыгъ. «Олимпым» непэ ПФР-р дешIэщт. Мэзаем и 9-м «СШОР- Мыекъуапэр» ПФР-м IукIэщт. ТекIоныгъэр къыдэзыхырэм апэ­рэ чIыпIэр фагъэшъошэщт.

— Илъэси 4 хъугъэу зэнэ­къокъум апэрэ чIыпIэр къыщыдэтэхы, — къытиIуагъ ПФР-м итренерэу Къулэ Аскэрбый. — Зичэзыу зэIукIэгъухэм зафэтэгъэхьазыры, ятфэнэрэу текIоныгъэр къыдэтхын тимурад.

Мэзаем и 9-м Адыгэ къэралыгъо университетым спортымкIэ иешIапIэ зэIукIэгъур щыкIощт. Зэнэкъокъур пчыхьэм сыхьатыр 5-м рагъэжьэщт. ЗэхэщакIохэм спортыр зышIогъэшIэгъонхэр, дэгъоу зызыгъэпсэфынэу фаехэр рагъэблагъэх.

Сурэтыр зэнэкъокъум къыщытетхыгъ.