Урысыем волейболымкIэ изэнэкъокъу «Динамо-МГТУ-р» щешIэ, Апшъэрэ купэу «Б-м» хэтхэм язичэзыу зэIукIэгъухэр Мыекъуапэ щыкIуагъэх.

«Динамо-МГТУ-р» «Элевари-Сахалиным» тIогъогогъо «Ошъу­тенэм» щыдешIагъ. Апэрэ мафэм Адыгеим иешIакIохэм 3:2-у къахьыгъ. ЯтIонэрэ мафэм Къыблэ-Сахалин икомандэ 3:2-у зэнэкъокъум текIоныгъэр къыщыдихыгъ. Я 5-рэ едзыгъор «Элевари-Сахалиным» 15:13-у ыхьыгъ.

Къалэу Кострома къикIыгъэ «Волжаниныр» купым анахь дэгъоу щешIэхэрэм ащыщ. ЕшIэгъуи­тIури 3:0-у ыхьыгъ.

ЗэIукIэгъухэр гъэшIэгъоныгъэх. Едзыгъохэм пчъагъэр зэралъыкIуатэщтыгъэр: 18:18, 19:19, 26:28. ТекIоныгъэр зыхьыщтыр къэшIэгъуае зэрэхъурэм зэнэкъо­къур къыгъэдахэщтыгъ.

— ТиныбжьыкIэхэм яIэпэIэсэныгъэ хагъэхъонымкIэ амалышIу­хэр яIагъэх, — къытиIуагъ «Динамо-МГТУ-м» итренер шъхьа­Iэу, Адыгэ Республикэм изаслуженнэ тренерэу Павел Зборовскэм. —Даниил Превенкэр, Никита Турсковыр, тикомандэ икапитанэу Къошк Руслъан, фэшъхьафхэри дэгъоу зэрешIэщтхэм пылъыгъэх.

Апшъэрэ купэу «Б-м» командэ 11 хэт. Апэрэ чIыпIэм Пермь иешIакIохэр щыIэх. Кострома, Ижевскэ якомандэхэр ащ къыкIэ­лъэкIох. «Динамо-МГТУ-р» я 6-рэ чIыпIэм щыI.

Оренбург, Пермь, Ижевскэ якомандэхэм адэжь «Динамо- МГТУ-р» кIощт.