ТыжьынитIу, яплIэнэр
Хэгъэгум кушъхьэфэчъэ спортымкIэ изэнэкъокъоу Санкт-Петербург щызэхащагъэм Адыгэ Республикэм испортсменхэр чанэу хэлэжьагъэх. 
Километрищ хъурэ гъогум зыщызэнэкъокъухэм Александр Евтушенкэм ятIонэрэ чIыпIэр къыдихи, тыжьыныр къыфагъэшъошагъ. Купым хэтхэу зызэнэкъокъухэм А. Евтушенкэм икIэрыкIэу ятIонэрэ чIыпIэр къыдихыгъ.
СтIашъу Мамыр нэбгырэ зырызхэм язэнэкъокъу чанэу хэлэжьагъ. Адыгэ Республикэм щапIугъэ нарт шъаом хагъэунэфыкIырэ чIыпIэхэм ащыщ къыдихыщтэу тигъэгугъэщтыгъ. СтIашъу Мамыр зэIукIэгъум икIэух икъоу зыфимыгъэхьазырыгъэу къэлъэгъуагъ, я 4-рэ чIыпIэр къыфагъэшъошагъ.
Аргентинэм щыкIощт
Дунэе зэIукIэгъоу Аргентинэм икъэлэ шъхьаIэу Буэнос-Айрес щыкIощтым Америкэм, Европэм яспортсменхэр хэлэжьэщтых.
Урысыем кушъхьэфэчъэ спортымкIэ ихэшыпыкIыгъэ командэ хэтхэу Александр Евтушенкэмрэ СтIашъу Мамыррэ зэнэкъокъум яIэпэIэсэныгъэ къыщагъэлъэгъощт.
Берлин щызэнэкъокъущтых
Дунаим кушъхьэфэчъэ спортымкIэ изэнэкъокъу мэзаем иаужырэ мафэхэм Берлин щыкIощт.
Адыгэ Республикэм илIыкIохэу Александр Евтушенкэр ыкIи СтIашъу Мамыр Урысыем ихэшыпыкIыгъэ командэ хэтхэу Берлин щыкIощт зэнэкъокъум хэлэжьэщтых.
Республикэм кушъхьэфэчъэ спортымкIэ иеджапIэ ипащэу Анатолий Лелюк зэрилъытэрэмкIэ, Адыгеим щагъэсэгъэ кIалэхэм тагъэгушIон алъэкIыщт. Олимпиадэ джэгунхэу 2020-рэ илъэсым Токио щыкIощтхэм ахэлэжьэнымкIэ Александр Евтушенкэм амалышIухэр иIэх.