Искусствэм фэлэжьэрэ цIыфхэр
ЦIыфыр зыщылажьэрэм, иIофшIэн къахэкIэу егъэпшэн е къэIуакIэ горэм ыцIэ рапхы. Хъот Замрэт игугъу тшIымэ, апэу шъхьэм къихьэрэр, гум къэкIырэр бэмэ якIасэ хъугъэ ителевизионнэ къэтын къызэрэригъэжьэрэ гущыIэхэр ары: «Искусствэм ыкIуачI, искусствэм ишIуагъ, искусствэм ицIыфхэр».
Журналистым ыцIэ а къэтынхэмкIэ ашIэ, ащ ихьатыркIэ цIыф шIэгъуабэм якъэбархэр цIыф жъугъэхэм алъыIэсыгъэх. Ахэм яхьылIэгъэ очеркхэр зэлъыпытхэу журналэу «Зэкъошныгъэм» къыдигъахьэщтыгъэх. Джы непэ тхылъеджэхэм яIэрылъхьэ хъугъэ IофшIагъэу «Искусствэм ицIыфхэр» зыфиIорэм ахэр лъапсэ фэхъужьыгъэх. Мыр Замрэт иятIонэрэ тхылъ. 2016-рэ илъэсым апэрэ тхылъэу «Джыри си Едэпсыкъоешхо сыдэт» зыфиIорэр къыдэкIыгъ. Ащ илъэтегъэуцо гуманитар ушэтынхэмкIэ Адыгэ Республикэм иинститут зыщызэхащэм авторым есIогъагъ: «Тэгугъэ, уитхэкIэ амалхэм заушхугъэу хъугъэ-шIагъэхэр зылъэпсэ тхылъ уигукъэкIыжь-гупшысэхэм бэрэ пэмытэу джыри къатынэу». Ахэр хъохъу гущыIэ къодыягъэхэп, авторым къыIотэжьын, къытхыжьын джыри зэриIэр зэхэсшIэгъагъ. Апэрэ тхылъым къыгъэлъэгъуагъ Замрэт ынэ пэкIэкIыгъэ хъугъэ-шIагъэхэр, цIыфхэр зэрипхыжьынхи нэмыкIхэм алъигъэIэсыжьынхэр къызэрэдэхъурэр, цIыф насыпым, гъашIэм якъэбаркIэ тарихъым щыщ хъугъэ нэкIубгъохэр IэпэIэсэныгъэ хэлъэу къытыжьынхэ зэрилъэкIырэр.
Искусствэр — кIочIэ ин. Ащ илъэныкъо пстэуми дунай шъхьаф яIэми, зэфэдэ ышIыхэу апыщагъэ хъурэ цIыфым ялъахъэ тыралъхьэ, аумэхъэу игъашIэ хэуцох. Ары Iэшъынэ Хьазрэт искусствэр аштрамым фигъэдагъэу игерой игъашIэкIэ къызкIиушыхьатырэр: «зэ искусствэм хахьэрэр ныбжьи хэкIыжьын ылъэкIыщтэп, джа къом гъогызэ аштрамыр зэришхырэм фэд… ПшIэрэба аштрамым икъэбар? УмышIэмэ къыпфэсIотэн. Мэзыкъом гъогызэ, ыцэмэ лъыр къадифызэ аштрамыр ышхызэ, Мышъэр къырихьылIагъэти еупчIыгъ: «Мощ фэдиз хьазабыр озыгъэхъурэр адэ гущэ сыд пае пшхырэ?» ыIуи. «ЫкупкI IэшIушъ ары, — мэзыкъом ыIуагъ, — ыкупкI гущэр IэшIушъ ары». Джары тэри тищыIакIэ зыфэдэр…», «искусствэр шIу олъэгъумэ — плъэгъупэщт, зеотымэ — ныбжьырэу зептыпэщт нахь, ау сыдэу щытми ызыбгъукIэ ущытэу удэпсэун плъэкIыщтэп». Искусствэ шъыпкъэр, искусствэ къабзэр аштрамым зэрэфэдэм техъырэхъышэрэп Хъот Замрэт игеройхэм ятворческэ гъогу зэхэлъы зэрэхъурэм тылъыплъэмэ. «Искусствэм ицIыфхэр» лъэпкъ мыиным ипрофессиональнэ искусствэ икъежьапIэ, иуцун якъэбар. Арэу зыхъурэм, апэрэ тхылъым фэдэу, искусствэм ылъэныкъокIэ лъэпкъ тарихъым инэкIубгъох.
IофшIэгъакIэр зы жьыкъэщэгъукIэ аджырэ тхылъхэм ащыщ. Очеркхэм уяджэ къодыерэп, ахэт нэбгырэ пэпчъ уапашъхьэ ит фэдэу, урамым ущыIукIагъэ фэдэу упэблагъэу аужырэ нэкIубгъом нэс уадэкIуатэ. Зигугъу ашIэу, лъэпкъым игушъхьэлэжьыгъэкIэ зигъэхъагъэхэр инхэм ящыIэныгъэ гъогуи, ятворческэ кIуачIэхэми нэIуасэ уафешIы.
Хъот Замрэт итворчествэкIэ жанрэу очеркым лъэпкъ литературэм хахъо щишIыгъ. Тхылъым очерк 12 дэт. Зы искусствэ лъэпкъым адрэ лъэпкъыр дэлажьэзэ профессиональнэ искусствэр хэкум зэрэщыуцущтыгъэр, ащ цIыфхэм фыщытыкIэу, ехъырэхъышэныгъэу фыряIагъэр игеройхэм ягъашIэкIэ къеIуатэ. Апэрэ профессионал хъугъэхэм зэпачыгъэ къиныгъохэм лъэхъаным ижьыкъащэ къахэщы. Тхьабысымэ Умар, Ахэджэго Щэбан, Сэмэгу Гощнагъу, Шъэожъ Роз, Пэнэшъу Рай, Хэшх Казбек, Нэхэе Аслъан, Лъэцэрыкъо Ким, КIыкI Зулхьадж, КIыкI Хьис, Къулэ Амэрбый, Анзэрэкъо Чесик, Хьанэхъу Адам, нэмыкIхэр ыкIи ахэм зылъащэгъэ, агъэсэгъэ лIэуж зэфэшъхьафхэм ясэнаущыгъэу лъэпкъ искусствэр зыгъэпсыхэрэм якъэбар зэфищэзэ, авторым тыгъосэрэ мафэр непэрэм къырепхы, непэрэ мафэм илэжьыгъэ неущырэм чылапхъэ фешIы.
ЗэрэтшIэу ыкIи тхылъым зэрэщыкIэгъэтхъыгъэу, Тхьабысымэ Умарэ творческэ кIэн бай иI. «Академическэ къэIуакIэм Умарэ иорэдхэр иуцощтыгъэхэп, ахэр орэд чэфхэу шъо пчъагъэкIэ зэтепшIыкIутIукIыщтыгъэх, ар къэзытыщт къэIокIэ-шIыкIэ мэкъэ шъхьаф ищыкIэгъагъ». Ащ творческэ зэпхыныгъэ да-хэу композиторымрэ орэдыIоу Шъэожъ Розэрэ зэдыряIагъэм къежьапIэ фишIыгъ. Замрэт къызэритхыжьырэмкIэ, «Орэдыр сыгу имылъэу, стхьакIумэ имытэу зы такъикъи исхын слъэкIыщтэп, ащ сыхэт зэпыт, ары сищыIэныгъэри, сидунайри», — ыIощтыгъэ Умарэ. Сэмэгу Гощнагъо фэгъэхьыгъэ очеркым Хъот Заур игукъэкIыжьэу Замрэт хигъэуцуагъэхэм бэ гу зылъытагъатэрэр: «Ежь ышъхьэкIэ зыгорэм фаеу, кIэлъэIоу щытыгъэп. Сценэм нэмыкI щыIакIи, гугъуи иIагъэп» — бзылъфыгъэм ащ фэдэу ыгуи, ыпси искусствэр ащыщ хъумэ, ар ащ къыфэхъугъ, ыцIэкIэ лъэпкъым игугъуи ашIынэу Тхьэм дунаим къытыригъэхъуагъ. Гощнагъо «амкIышъэм фэдэу ымакъэ псынкIэу зиIэти», иамал къехьыфэ орэдым рыщыIагъ. Адыгэ пщынэм игугъу тшIымэ, Лъэцэрыкъо Кимэ ар ыIыгъэу непи тынэгу къыкIэуцо. «Зиунагъо хъяр къихъухьагъэу, зикIалэ къэзыщэрэм иджэгу афигъэджэгуным цIыфхэр кIэхъопсыщтыгъэх» — цIыф мафэу, профессионал инэу ар адыгэхэм яIагъ, ыцIэ щытхъурэ сэмэркъэу дахэрэ пылъхэу къахэнагъ. Хъот Замрэт бэ ащ фэдэу зикъэбар къытфиIуатэрэр, зигъэхъагъэхэр къытлъигъэIэсыхэрэр.
Художественнэ амал баихэр очеркхэм ащыгъэфедагъэх. Зигугъу къышIыщт цIыфым, ащ иIофшIэн зыфэгъэхьыгъэм ядунай ухищэу къегъэжьапIэхэр гъэпсыгъэх. Зы гущыIэухыгъэ щэхъу къызщимыIорэми къыбгуригъаIорэр, узэригъэгупшысэрэр бэ, тхыгъэм уеджэным укIэгуIэу рыуегъэгъажьэ:
«Сэмэгу Гощнагъо фэдэ орэдыIо лъэш къызхэхъухьэгъэ лъэхъан адыгэ лъэпкъ музыкальнэ искусствэм къыхэкIыгъэп», «Лъэпкъ музыкальнэ эстрадэр къыздежьэгъэ Шъэожъ Розэ ымакъэ лъэхъан псаум епхыгъ», «Бзылъфыгъэ зэкIужь гъэсагъэу, «интеллигент» гущыIэр къекIупэу адыгэ бзылъфыгъэхэм зыгорэ къахэкIыгъэу щытмэ, ар Пэнэшъу Къадыр ыпхъоу Рай», «Музыкальнэ искусствэм ижанрэ пстэури къызэдэуубытынышъ, охътэ кIэкIым къэхъугъэкIэ республикэ цIыкIум щызэтебгъэпсыхьан, къыщызэIупхын зыхъукIэ, сыд фэдэу ащ уфэхьазырын фэягъа?! Адыгэ Республикэм культурэмкIэ иапэрэ министрэу Хьанэхъу Адам ар къыздигъэхъун ылъэкIыгъ», нэмыкIхэри.
КIэухыми шIыкIэ гъэнэфагъэ фешIы. Философскэ гупшысэ хэлъэу, щыIэныгъэ къызэрымыкIом ыкупкI уригъэгупшысэу, уиеплъыкIэ горэхэри зэрыуигъэхъокIэу гъэпсыгъэ: очеркэу Хьанэхъу Адам ехьылIагъэм благъэу зымышIэщтыгъэхэм анэгу къызэрэкIигъэуцорэр цIыф псынкIэу, гумызагъэу ары. Тхыгъэм икIэух ар рэхьат, зыми гуIэжьырэп. Къины а чIыпIэм фэдэхэм уяджэныр, гур къефызы. «Сэ сырэхьат, сыгуIэрэп» — сыда шъуIуа арэущтэу а мафэм ар зыгъэрэхьатыгъэр, сыда шъуIуа къежэщтыгъэр?.. «Адам ыгу кIэзыгъэблын, къызфичъыхьажьын щыIэжьыгъэп. Лъэпкъым ыпсэ хэлъыгъ, фишIэщтыр ыухыгъ, джы гуIэжьырэп». Лъэпкъым ыцIэ дахэкIэ зыгъэIугъэ ансамблэм фэгъэхьыгъэу Замрэт етхы: «Ислъамыем» Iоф зэрэщашIэрэм рыпагэхэу артистхэм ашъхьэ лъагэу Iэтыгъэ. Ансамблэм непэ ухэтыныр шъуаш…Тыдэ къикIырэ шъуIуа мыухыжь музыкэу Нэхэе Аслъан зыхэтыр?» — хэти ыгу къигущыIыкIырэм фэд авторыр, урэгушхо лъэпкъ орэдыIо-къэшъокIо куп шIагъом.
Къэбар пэпчъ зы цIыф гъашI. Бын-унэгъошхом изы нэбгырэ икъэбар фэдэу очерк пэпчъ уеджэ. Сатырхэм уяджэ къодыерэп, Замрэт ымакъэ птхьакIумэ итэу, «мыр о умышIэу, сэ адэсэшIэ» ыIорэм фэдэу, игеройхэм якъэбар кIещы.
Тхылъыр гъэшIэгъоны зышIыхэрэм ащыщых бзэ къызэрыкIоу зэрэтхыгъэр, зэдэгущыIэгъухэр игъэкIотыгъэу зэрэхэтхэр. УнаIэ атеодзэ лъэпкъым дыщыIэ шIошъхъуныгъэхэм: «КъызэраIотэжьырэмкIэ, сабый цIыкIум апэрэ Iэбжъэнэжъыеу янэ Цацэ пиупкIыгъэхэр пщынэ ныбэм хидзэгъагъэхэу ары», «СызэцIыкIум, — къеIотэжьы Розэ, — сыбыбэу пкIыхьапIэ слъэгъущтыгъэ», «цIэр насып фэхъугъ», «насыпыбэри щтагъо, нэджагъор бэ мэхъу, ори узыщыгушIукIыжьыпэми, насыпыр бгъэщтэн плъэкIыщт», ретроспекциер жъугъэу щыгъэфедагъ.
ТхылъымкIэ къэIогъэн фае теорием ылъэныкъокIи гъозэшIоу зэрэщытыр. Ар пшъэрылъэу Хъот Замрэт зыфишIыжьыгъагъэп, ау къыIуатэрэм хэпхъагъэу зэгъэпшэнэу, къэгъэлъэгъуакIэу ышIыхэрэм къахэщых эстраднэ орэд къэIуакIэр, «самородок», опернэ макъ, макъэр игъэуцун, рондо, опе-рэр, триптих, нэмыкI гурыIоныгъэхэми яхабзэхэр.
«Гупшысэ шъхьаIэу авторым иIагъэр — зигугъу къышIыгъэ пэпчъ игугъэ-гупшысэ, итворчествэ къытлъигъэIэсыныр, дэгъур, дэхагъэр, шIур, сэнаущыгъэр зэхытигъэшIэныр, творческэ IофшIэныр зэрэIоф мыпсынкIэр къыдгуригъэIоныр — къыдэхъугъэу къытшIошIы», — Сихъу Фатимэ игущыIэхэм адедгъаштэу тхылъыр зэфэтэшIыжьы. ЗэфэтэшIыжьы, ау джыри бэрэ ижь, идунай тахэты, гупшысэкIэ геройхэм тадэгущыIэ, пытагъэ ахэлъэу ягъогу зэрэрыкIуагъэхэмкIэ тащэтхъу, тащэгушIукIы. Тэгугъэ Хъот Замрэт джыри нэмыкI орэдыIохэм, къэшъуакIохэм ящыIэныгъэ гъогу зэригъашIэзэ, ятворческэ хъарзынэщ зэфэхьысыжь фишIызэ искусствэм итарихъ итхын лъигъэкIотэнэу.
Шэуджэн Тэмар. АРИГИ-м инаучнэ IофышI.