ЦIыфышхор игупшысэкIэ къытхэт
ИкIыгъэ илъэсым, Шъхьэлэхъо Абу зыщымыIэжьыр илъэс зыщыхъугъэм, лIы гъэсагъэм къыгъэнэгъэ тхыгъэ зэфэшъхьафхэр лъапсэ зыфэхъугъэ тхылъэу «Шъхьэлэхъо Абу: гъашIэм ищэрэхъхэр» зыфиIорэр къыдэкIыгъ.
Ар зэхэзыгъэуцуагъэр ыкIи тхылъым игущыIапэу «КIуачIэ зиIэ гупшысэу къэнагъэхэр» зыфиIорэр зытхыгъэр гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм иIофышIэу, филологие шIэныгъэхэмкIэ кандидатэу Шэуджэн Тэмар, тхылъым иредакторыр Шъхьэлэхъо Дарико.
Шъхьэлэхъо Абу гъэшIэ дахэ къыгъэшIагъ, шIагъэу иIэри ащ нахьыбэжь. ЛIым ыцIэ къепIо къодыемэ, тыдэ щыIэ адыги къызэхэтаджэ, джарэу зыщыщ лъэпкъым ар илъапI, икIас.
Абу илъэс 89-рэ къыгъэшIагъ, шIэныгъэшхуи IэкIэлъыгъ, цIыфыгъэ дахи хэлъыгъ; инэплъэгъу къыубытэу ылъэгъурэм бэкIэ пэщачэщтыгъ гукIэ зэхишIэу ыпщыжьыщтыгъэр. Абу ищыIэныгъэ зэрэщытэу лъэпкъ гъэсэныгъэм икъэIэтын-хэгъэхъон, наукэм игъэунэфын-къызэIухын афэгъэхьыгъагъ. Ащ готэу ар къызхэкIыгъэу, зыщыщ адыгэ лъэпкъым идунай нэфынэным, иогу мамырыным, цIыф жъугъэ къызэрыкIохэм щыIэкIэ-псэукIэ амал ягъэгъотыгъэным, гъогу зафэм дэмыхынхэм фэпIугъэнхэм сыдигъуи фэшъыпкъагъ. ЩыIэныгъэ лъэныкъуабэмкIэ гъэзагъэу адыгэхэр псэухэу, лажьэхэу, шIур апхъэу щыIэнхэмкIэ фэлъэкIырэмкIэ зышъхьамысыжьэу Абу Iофышхо мыпшъыжьэу ылэжьыгъ.
«ЛIыр лъэпкъ» еIо адыгэ гущыIэжъым. Ар Абу фэпIоныр епэсыгъэ дэд, къылэжьыгъ. Уехъопсэнэу иакъыл IушыгъэкIи, ишIэныгъэкIи, игупшысакIэкIи, ицIыфыгъэ хабзэкIи, илъэпкъ ыкIи Хэгъэгум афыриIэ шIулъэгъу-шъыпкъагъэмкIи узыкIырыплъын закIэу гъэпсыгъагъэ. Абу шIэныгъэлэжьышхуагъ, литературовед лъэшыгъ, кIэлэегъаджэмэ якIэлэегъэджэжьыгъ, общественнэ IофышIэшхуагъ. Ар зымышIэрэ, зымылъэгъугъэрэ е римыгъэджагъэрэ, IумыкIагъэрэ Адыгеим исэпщтын. Шъхьэлахъом учебникхэу ытхыгъэхэр (класс зэфэшъхьафхэмкIэ) адыгэ литературэмкIэ еджапIэхэм ащагъэфедэх, инаучнэ-литературэ IофшIагъэхэм студентхэр, шIэныгъэлэжьхэр, аспирантхэр арэгъуазэх. ЗэрэхъурэмкIэ, Абу ищыIэныгъи, иIофшIагъи, ишIэныгъэ лэжьыгъи хэти шIукIаеу тыфэнэIуас. ЛIыр цIыф пытэ лъэшэу, зэкIэ зыфызэшIокIыщтыгъэу, лъэгапIэр зыштагъэу, насыпыр лъапэкIэ зытэкъущтыгъэу къытщэхъу. Ау гъашIэ бгъэшIэныр аукъодыеп, а гъогу кIыхьэм лъэпэогъубэм уащырефылIэ. Зыфырикъужьызэ сыдрэ къиныгъуи зэпырыкIэу къызэзынэкIырэм текIоныгъэр къыфэкIо. ТхылъыкIэу «ГъашIэм ищэрэхъхэр» зыфиIорэр анахьэу гъэшIэгъоны къэзышIырэр, кIэгъэзынчъэу, иныбжьыкIэгъу лъэхъан зыфэдагъэр ежь-ежьырэу зэритхыгъэм тетэу къызэрэщытыгъэр ары, кIэлэгъу-ныбжьыкIэгъу хъуапсэхэм зыдаригъэхьыхыгъэп, нахь чыжьэу плъагъэ, нахь лъэшэу гупшысагъэ, ушъхьагъу лъымыхъоу, шIэныгъэшхом зэрэфэкIощтыр, а зэкIэ илъэпкъ зэрэфилэжьыщтыр имурад иныгъ. Ащ тетэуи зекIуагъэ, ищыIэныгъэ зэрэщытэу илъэпкъ фэгъэзэгъагъ, ичэщи имафи творчествэм епхыгъагъ, лъэужышIу дахэ къыгъэнагъ. ГъашIэ бгъэшIэныр зэрэкъин дэдэр, етIани уныбжьыкIэу, къыбдеIэни, къыпкIэIэни щымыIэу, щыIэныгъэ зэпырыкIыпIэ-икIыгъохэм уашъхьэрыкIышъуныр лIыгъэм ишапхъэу зэрэщытыр тхылъым щыкIэгъэтхъыгъ.
ЦIыфыр хъугъахэу къэхъурэп: хэти щэIэфэ Iоф зыдешIэжьы, зыфэсакъыжьы, зегъэунэфыжьы; ежь фэдабэм ауж къызэримынэщтым ыкIи фэлъэкIырэмкIэ цIыфхэм, илъэпкъ апае зэрэзышъхьамысыжьыщтыр къыушыхьатымэ шIоигъу, а зэкIэ зыфызэшIокIырэм ащыщыгъ Шъхьэлэхъо Абу.
Абу тэ зэрэтшIэрэр фэныкъогъэнчъэ цIыф насыпышIоу, шIэныгъи, акъыли, губзыгъагъи, унэгъо гупсэфи, шъхьэкIэфэ мыухыжьи Тхьэм къызэритыгъэу ары. ТхылъыкIэу сапашъхьэ илъым Абу икIэлэгъу-ныбжьыкIэгъу лъэхъан ошъопщэ Iужъухэу нэр, гур зымыгъаплъэхэрэмкIэ зэрэзэлъыпкIэгъагъэр къыщиIотыкIыгъ. Уахътэу къызхэхъухьагъэр зэрэхьылъэ щэчыгъоягъэр, хэгъэгум илъэси 5 Iэпэ-цыпэм Хэгъэгу зэошхор щыхъушIагъэу, нэпсыр, лъыр псыхъоу щычъагъэу, адыгэ чIыгум гъаблэр, гъаер зышъхьащытыгъэ лъэхъаныгъ. Ау кIалэм лъэшэу шIоигъуагъ еджэнымкIэ, шIэныгъэмкIэ зигъэзэныр, а лъагъор пхырищыныр, итхыгъэ сатырэ пэпчъ а къегъурэ гугъэ чыжьэм игумэкI щызэхэошIэ. НэкIыми, пцIанэми, лъапцIэми зы мурад зыIыгъыгъэр — еджэщт, зыкIэхъопсырэ гъэсэны-гъэ-шIэныгъэ дэгъу зэригъэгъотыщт ыкIи игъашIэ зэрэщытэу адыгэ лъэпкъым щыIэкIэшIу ыгъотыным фигъэшъошэщт.
ТхылъыкIэм иапэрэ зэдэхыгъо Абу исурэт ин тетэлъагъо: иилъэсхэм шъхьацыр фыжьыбзэу раIагъэми, зыфэрэзэжьэу, нитIу пшъыгъашъомэ гушIо шъабэр къакIэщы. «ЛIыр лIэу мэлIэжьы» е «лIыр лъэпкъ» зыфиIорэм ащыщ Абу. Ар насыпыгъэ иныба?!
«ТхылъыпIэм егъэкIугъэ хъурэр кIодыщтэп», — ыIощтыгъ Абу. Мы гущыIэхэр тхылъым икъежьэпIэ шъыпкъэ тетхагъэх. Арын фае, сэ сишIошIкIэ, Тэмарэрэ Дарикорэ Iизын къязытыгъэр Шъхьэлэхъо Абу игулъэчIэ (дневник) тхыгъэхэм ащыщхэр къыхэутыгъэнхэр. Илъэс 27 — 28-рэ зыныбжь кIалэр ригъэжъыкIыжьыгъэу зылъыплъэжьэу, зыфэсакъыжьэу, щыIэкIакIэу къакIорэр зэхишIэу, шIобылымэу, еджэныр ыгу итIысхьагъэу, ышIэрэр шIомакIэу, мытхъытхъэу, щымыIи, нэмыкIи – шхагъэми, нэкIыми, лъапцIэми, пцIанэми пымылъэу, шIэныгъэхэм зэралъыкIорэр тхылъым къыдэхьэгъэ сатырхэм къаIуатэ.
«Аспирантурэм сычIэхьагъ, ноябрэм и 1-м тыкIожьынэу тхылъыр къагъэхьыжьыгъ. Таштагъ, гушIуагъо. Ары шъхьай, сэ сшIэрэп, ащ фэдизэу сыгукIэ сычэфын слъэкIырэп. Бэхэр къысэхъуапсэх. ГущыIэ инхэр къаIо, сэ «е-е, ары гущ» сэIошъ, сежьэжьы.., нэмыкI упчIабэм шъхьэр аубыты.
Еджэныр сшIомыIофыгъэмэ гъабли, шъой-цыягъи сащымыщтахэу, сащымыщыныхьэу седжэщтыгъэп. Гур ыгъэтхытхэу сыгу къэкIыжьы пакетыжъ къолэнэу сшыпхъу нахьыжъ къыситыжьыгъагъэр зэхэсыхъытэжьызэ еджапIэм сызэрэкIощтыгъэр. (Удыжьын хэлъыжьыгъэп, Iудани щыIагъэп. Заор, узыр, щымыIэр. 1945-рэ илъэс…)
1947-рэ илъэсыр гъэблэшхуагъ. Ащыгъум я 10-рэ классым сисыгъ. Даутэ сигъусэу Гъобэкъуае (Теуцожьхьаблэ) тыкIожьызэ, семчикыцэхэу гъогум тедгъуатэхэрэм талъыгуIэзэ, чэщ тытехъухьи, уаем тыхиубытагъ. Къинэу ащ тетлъэгъуагъэр пщыгъупшэныр IэшIэхэп. Класси 10-р къэтыухи, щыIакIэм иамал горэ къызIэкIэдгъэхьан тимурадэу Мыекъуапэ педучилищым тежьагъ. Ахъщэу тIыгъыр мэкIэ дэдэти, лъэсэу тыкIуагъ. ЦокъэлъэгукIадэхэр ылъапэкIи ылъэдакъэкIи кIэлэжьыкIыгъэх. Мыекъуапэ тынэсыгъ. Ощхыр лъэшэу къещхыщтыгъ. ЛъапэмкIэ къихьэрэр лъэдакъэмкIэ икIыжьыщтыгъэми, цокъэ кIоцIым ятIэ-пшэхъо зэхэлъыр иубыхьэгъагъ. Цуакъэхэр дгыкIыхи, зыщытлъэжьхи, директорым дэжь тычIэхьагъ. Таштагъ. Къэтыухыгъ. Джы щыIакIэр нахь псынкIэ хъугъэ. Ахэр къиныгъо уахътэу блэкIыгъ… ЗэкIэри зэпысчыгъ. Зы мурад сиIагъ: седжэнэу». (н. 19-р).
Абу ежьыри ныбжьыкIагъэми, сыдигъуи къешIэкIыгъэхэмкIэ гукIэгъушIэ дэдагъ, ащ ищыс мы тхыгъэр:
«Декабрэм и 22-рэ. 1957-рэм ыпсэ хэтыжь къодый. Тыгъоспчыхьэ осыцэ зырызхэр къыхидзыщтыгъэх. Непэ тыгъэр ошъогум къегущыIыкIы. Тхьаумэфэ мафэр егъэмэфэкIы пшIошIыщт. Казбек — соми 100, Нурдинэ — сомэ 50 афязгъэхьыгъ. Сэ къызщызгъакIи афязгъэхьыгъ, сэ джы щэджэгъуашхэ сшIыгъэп, ау уадемыIэмэ хъущтэп…». 22.12.1957.
ТхылъыкIэм Абу ышъхьэ ехьылIэгъэ тхыгъэхэр бэу, усэхэр, прозэкIэ тхыгъэхэр, гупшысэхэр ыкIи цIыфхэм къэбархэу ахэлъхэр къаIуатэу ытхыгъэхэр къыдэхьагъэх. Ахэм анахь гъэшIэгъонэу сэ къысщыхъугъэр игулъэчIэ тхыгъэхэр арых. ЩыIэныгъэ псыхъошхом удэхъуныр къин дэдагъэми, мыхэр кIалэм зэпичыныр зэрэфэукIочIыгъэр, сыд зэхъуи ыгу мыкIодэу, нахьышIум щыгугъэу къызэрэрыкIуагъэр ащыгъэунэфыгъ. КъыхэкIыгъ ыгу зыщыцIыкIуи, зыщимышIугъуи, ау пытэу ыгу риубытэгъагъ сыд хъугъэкIи имурад зэремыбгъукIощтыр, ащ зэрэфэкIощтыр.
Абу иусэ зэфэшъхьафхэу тхылъым къыдагъэхьагъэхэр зыхэтыгъэ уахътэм ыкIи ежь ыгу изытет атешIыкIыгъэх, бгъэм къызэрэдэкIыгъэхэм тетэу ытхыгъэх; къызэрыкIох, ау ушъый-гъэсэпэтхыдэ ахэлъ, усэ чъэпхъыгъэ дэдэу щымытхэми, къешIэкIыгъэ пстэумэ зэряхъулIэрэр, зэрамыгъэгупсэфырэр къащыIуагъ, зэлъызыIыгъыгъэ зэхашIэхэм ахэр ялъэужых.
Алрэгъу шхъуантIэу зиубгъоу Гъатхэм чIышъхьашъор къегъалэ, КIэлакIэр гугъапIэм зэлъиштагъэу, Плъызыгъэу къушъхьэм жэхаплъэ.
Неущы Маишъ — мэфэкI, ЦIыфхэри зэкIэ кIэракI. КIалэр кIэ шъхьай, иIэр жъы закI, Ау ежь ащ зыкIи ымыгъэгумэкI. 1958-рэ. Тбилиси. * * * УиIо заIоу, шъыпкъэр пIошъоу УщыIэныр — насыпыгъ. ШIушIэр куашэу, лъэшэу багъоу, Лъэпкъ фэлажьэу улэжьэныр — насыпыгъ. 30.11.1984-рэ. * * * Огъу лъэшым сигъукIагъ, Уиощх шъабэ сищыкIагъ. Къебзэбзэхэу зэ къысфещх, СыгъэшъокIи спсэ гъэхъужь. 21.01.1987-рэ. * * * Дышъэ сапэу тыгъэбзыйхэр къыстетакъо, Сыгу зиIэтэу мэтэмао. Гугъэ инэу къэнэфыгъэм сиIэтыгъэу сызыдехьы, Хьасэмэ заубгъу, бэгъуагъэхэу мэшъхьалъэх. 29.12.1998-рэ.
НыбжьыкIэ зэхашIэхэри иусэ сатырхэм ащыгъэунэфыгъэх, ау сыдигъуи гум кIэдэIукIы, ащ къыриIорэри зэхехы, зэхэшIэ закъомэ алъахъэрэп. Анахь згъэшIэгъуагъэр иныбжьыкIэгъум имызакъоу, нахь лIыпкъым итэуи (я 70 — 80-рэ илъэсхэми), акъылышIо-губзыгъэу, 2000-рэ ыкIи ащ ыужыIокIи усэхэр Абу зэритхыщтыгъэхэр, ау ренэу ушъый-гупшысэ макъэр ахэм къызэрахэIукIырэр ары, анахьэу ышъхьэ имыкIырэр илъэпкъ ирэхьат-гупсэфыныгъ. лъэхъанэ пэпчъ инэшанэ кIигъэтхъызэ, ытхыхэрэм къащеIо адыгэр чIыгум фэгъэзэпагъэу, лэжьэным ыIэ екIоу, лажьэмэ, шхэжьэу, унэгъошхо дахэхэр яIэу зэрэщыIагъэр. ЕтIанэ ащ ыужыIоу гъэсэныгъэр Iоф шъхьаIэу къызэрэуцугъэр «емыджагъэр нэшъу» аIоу; уахътэ тешIи, еджагъэм емыджагъэр хъоршэр нэцIабгэу къыгоуцоу, къытекIуатэу зэрэхъугъэм Абу егъэнэшхъэи. ТхылъыкIэм Шъхьэлэхъо Абу идунэететыкIагъэр, игъашIэ зэкIэ зэрэкIэкIыгъэр нэм къыкIегъэуцо, ежь цIыфышхо-гупшысакIори нахь тпэблагъэ къытфешIы. ЛIышIу-цIыфышIур игупшысэкIэ сыдигъуи къытхэтыщт.
Мамырыкъо Нуриет.