Мыекъопэ бэнэпIэ еджапIэм лъапсэ фэзышIы­гъэ Кобл Якъубэ къызыхъугъэр илъэс 80 зэ­рэ­хъугъэм фэгъэхьыгъэ зэнэкъокъур Адыгэ къэ­ра­­лыгъо университетым физкультурэмрэ дзю­домрэкIэ и Институт тыгъуасэ щыкIуагъ.Адыгэ къэралыгъо университетым ипащэу Мамый Даутэ зэ­нэкъокъум икъызэIухын фэ­гъэхьыгъэ зэхахьэм къыщыгущыIагъ. Кобл Якъубэ зэхэщакIо зыфэхъугъэ бэнапIэр дунаим цIэрыIо зэрэщыхъугъэр Д. Мамыим хигъэунэфыкIыгъ. НыбжьыкIэхэм пIуныгъэ дэгъу ятыгъэным самбэмрэ дзюдомрэ ябэнапIэхэр зэрэфэлажьэрэм мэхьэнэ ин ритыгъ.

Кобл Якъубэ ыгъэсагъэхэм ащыщэу, спортымкIэ дунэе класс зиIэ мастерэу, республикэмкIэ мамырныгъэм и Лигэ итхьаматэу Аристотель Спировыр тренер цIэрыIом ишIушIагъэ зэрэ­лъыкIуатэрэм къытегущыIагъ.

Урысыем и Къэралыгъо Думэ идепутатэу, дунаим самбэмкIэ гъогогъу 11 дышъэр къыщыдэзы­хыгъэ Хьасанэкъо Мурат, спортым иIофышIэхэу Джарымэкъо Юсыф, КIуае Хьазрэт, Мэрэтыкъо Сахьид, Делэкъо Адамэ, Адзынэ Алый, Беданыкъо Байзэт, Бастэ Сэлымэ, ШъэоцIыкIу Рустам, Хьакурынэ Дамир, Игорь Вержбицкэм, Джарымэкъо Нурбый, Чэтыжъ Алый, Сергей Шутовым, Хьабэхъу Адамэ, нэмыкIхэу гущыIэгъу тызыфэхъугъэхэм ягу­къэкIыжьхэр гъэшIэгъоных, Кобл Якъубэ ахэм ятренер къодыя­гъэп. Илъэпкъ, республикэм ыгу къафытеозэ Iофэу ыгъэцэкIагъэр щыIэныгъэм шIукIэ къыхэнагъ.

БэнэкIо ныбжьыкIэхэр дзю­домкIэ зэнэкъокъугъэх, Тэхъутэмыкъое районым икомандэ апэрэ чIыпIэр къыдихыгъ. Адыгэкъа­лэ къикIыгъэхэр ятIонэрэх, Мые­къуапэ самбэмкIэ ибэнэпIэ еджа­пIэ ящэнэрэ хъугъэ.

Зэнэкъокъум исудья шъхьаIэу Джон Липаридзе зэхэщакIохэм лъэшэу зэрафэразэр къыIуагъ.

Сурэтхэр зэхахьэм къыщытетхыгъэх.