ЖьыкIэ Iоф зышIэщт паркэу Урысыем итхэм анахь иным ишIын ыкIэм нэсыгъ, Iоф ышIэным фэхьазыр. Пкъыгъо 60-у ищыкIагъэр агъэуцугъах, МВт 150-рэ кIуачIэ зиIэ ветропаркым илъэсыкIэм Iоф ышIэнэу агъэнафэ.

Энергетическэ установкэ 60 МВт 2,5-рэ зым илъэшыгъэу объектым щагъэуцугъэх. Ахэм къатырэ электроэнергиер чIычIэгъ кабельхэмкIэ киловатт 220-рэ зилъэшыгъэ подстанцием нэ­- сыщт. Чэщи, мафи зэпыу имыIэу илъэс псаум ащ фэдэ станцием Iоф ышIэщт. Адыгэ ВЭС-м илъэсым къыкIоцI кВт/сыхь. миллион 354-рэ электроэнергиеу къытыщт. Проектым ишIуагъэкIэ АР-м процент 30 — 35-кIэ нахьыбэу электроэнергиер къыхьыжьыщт.

Проектыр зыгъэцэкIэрэ къэралыгъо корпорациеу «Росатом» зыфиIорэм иIахьзэхэлъ обществэу «НоваВиндым» ипресс-къулыкъу къызэритырэмкIэ, Урысыем апэрэу щагъэфедэрэ псэуа­лъэхэр мыщ ишIын халъхьагъэх. ЦIыфхэмкIи, псэушъхьэхэмкIи, чIыопсымкIи щынэгъончъэу ар зэрэщытыр къыхагъэщыгъ.

— IофшIэнхэр зэкIэ мы илъэсым тыухыщтых. Объектым Iоф ышIэнэу зыригъажьэкIэ, зы такъикъым лопастьхэм къекIокIыгъуи 10 — 15 ашIынэу ары, — къыщаIуагъ «НоваВиндым» ипресс-къулыкъу.

(Тикорр.).