Асе ыIапэ дышъэр къыпэзы
Адыгэ Республикэм инароднэ сурэтышIэу, гъучIым фэIэпэIасэу, иIэшIэгъэ хьалэмэтхэмкIэ Адыгеим, Урысыем ыкIи нэмыкI хэгъэгухэм ащашIагъэу Еутых Асе тыгъэгъазэм и 8-м, 1962-рэ илъэсым къэхъугъ. Ащ елъытыгъэу, лъэпкъым хэлъ IэшIэгъабэр зыухъумэу, хахъо фэзышIэу, емызэщыжь творческэ гупшысэкIо-IофшIэкIошхом игугъу къэтшIымэ, тигъэзетеджэхэм ащ ыцIэ джыри нахь апэблагъэ тшIы тшIоигъу.
Илъэс 15 фэдизкIэ узэкIэIэбэжьмэ, Асе гущыIэгъу сызыфэхъум мырэущтэу къысиIогъагъ: «Сэ зэрэдунаеу афэсIотэн гухэлъ сиI адыгэ лъэпкъым иискусствэ зыфэдагъэр, тиблэкIыгъэрэ тинепэрэ мафэрэ зэспхынхэ фае». Еутых Асе иIуагъэ епцIыжьыгъэп, итворческэ мурад ин дахэу гъашIэм щыпхырещы.
Адыгэхэр ижъ-ижъыжьыкIэ лъэпкъ Iушхэу, щыIэкIэ-псэукIэм фытегъэпсыхьагъэхэу, яакъыл- къулайкIэ зыфырикъужьхэу, IэшIэгъабэр ахэлъэу, нэкIэ зэ алъэгъурэр аIапэкIэ агъэчъэу зэрэщытыгъэхэр тарихъми, орэдми къахэнагъ. Джа лъэпкъым дэгъоу хэлъыгъэр зэфэдэкIэ хэгощагъ Еутых Асе.
Бзылъфыгъэр еджагъ, гъэсагъэ, цIыф гъэшIэгъон дэд. Пшъэшъэжъыем илэгъу сабыйхэм афэмыдэу, зыгорэ зэрэхэлъым пстэуми апэу гу лъызытэгъагъэр ятэкIэ янэжъэу Къадырхъан. КъызэраIотэжьырэмкIэ, икъорэлъф-пхъорэлъф пстэумэ Асе цIыкIур нахь къахигъэщыщтыгъ. «Сипшъэшъэ цIыкIу насыпышIо хъущт» ыIозэ щыгушIукIыщтыгъ. Такъикъыпэ зэгъокIхэм къом исабый нэнэжъым пшысэхэм, тхыдэхэм, къэбарыжъхэм ахигъэдаIощтыгъ. ИцIыкIугъо дэдэми Асе нэжгъурыгъ. ИкIэлэцIыкIугъом къыщегъэжьагъэу илэгъухэм атекIэу, зыгъэгумэкIырэр бэдэдэу, зэкIэ ылъэгъуи, зэхихи зэригъашIэмэ шIоигъоу дунаим щыхъурэ-щышIэрэм, щыIэкIэ-псэукIэм гъунэ алъифэу щытыгъ. А зэкIэм ялъытыгъэу, IупкIагъэрэ гулъытэ чанрэ зэриIэр къэнэфэгъагъ. Асе пшъэшъэжъыеми умышIэнэу, щтэр, щынэр хэлъыгъэп. Пшъэшъэжъые одыбзэ мэкIэ цIыкIур уанэр зытемылъ шым тетIысхьаныр, къушъхьэм дэпшыеныр, къушъхьэ псыхъом зыщигъэпскIыныр, анахь чъыгышхо шъхьапэ лъагэм дэкIоеныр зикIэсагъ. Чэщ мэзахэми зы шъэф гъэшIэгъон хилъагъощтыгъэ, мэфапэми гухахъо хигъуатэу, гугъэ IэшIухэр рипхыщтыгъэх. Ау анахь зыгъатхъэщтыгъэр жъуагъохэмкIэ зэлъыпкIэгъэ огум игуапэу зыщиплъыхьаныр, чэщым ижьыкъэщэ зэщиз-зэтет зэхишIэу рэхьат зэгъокIым щыгупшысэныр ары. А зэкIэми хэлъ сэнаущыгъэр, зэчый ялыер игъорыгъозэ къагъэущыгъ, гъэсэныгъэ-шIэныгъэу ищыкIэгъэщтыри зэригъэгъотынэу джащыгъум гъогу техьагъ. Пшъэшъэжъыер музыкэ ыкIи художественнэ еджапIэхэм ащеджагъ. Ростов-на-Дону щызэхащэгъэ кIэлэеджэкIо къэгъэлъэгъоным иIофшIагъэхэр апэрэу зыщыхагъэунэфыкIхэм илъэс 15 Асе ыныбжьыгъ.
1980-рэ илъэсым Асе Карачаевскэ кIэлэегъэджэ институтэу дэтым ихудожественнэ-графическэ отделение чIэхьэ, егугъу, еджэныр фэукIочIы. Аужырэ илъэс еджэгъум Пшызэ къэралыгъо университетым ихудожественнэ-графическэ факультет къэкIожьы. Графикэр, скульптурэр ишъыпкъэу зэрегъашIэх. Дышъэидэм, керамикэм Iоф адешIэ. Университетым иаужырэ курс щеджэзэ, исэнэхьаткIэ IэкIэлъ IэпэIэсагъэм хигъэхъонэу Дагъыстан макIо. Махачкала дэт художественнэ училищэу Джамаль ыцIэкIэ щытым тыжьынышIэ IэпэIасэу Курбанали Магомедовым къыщырегъаджэ. Диплом IофшIагъэу бзылъфыгъэ тыжьын бгырыпхэу къэмэжъыер зигъусэмрэ гъэкIэрэкIэн мэхьанэ зиIэ пкъыгъохэмрэ къыщешIых. Мыхэр ары Асе апэрэу гъучIым хишIыкIыгъэхэр. ГъучIым зынэсым, адрэ пстэури щыгъупшагъ, IэпэIэсэныгъэмкIэ ащ зыщиушэтынэу ыгу къихьагъ.
Адэ пшъэшъэ ныбжьыкIэм хэлъ сэнаущыгъэр е зэчыир тыдэ къыфикIыгъа?
Адыгэхэм «ЛIэужыр бжиблэу мао» аIуагъ. Асе ятэжъэу Еутых ЦIыкIужъые IэпэIэсагъ, къупшъхьэхэм пкъыгъо гъэшIэгъонхэр ахишIыкIыщтыгъ, гъучIым ыIэ екIущтыгъ. А IэпэIэсэныгъэр ыкъоу Аслъан ыпхъоу Асе къыхэщыжьыгъ. НэмыкI цIыф IэпэIасэхэм яIэшIагъэ кIишIыкIыжьэу щымытэу, анахь тхыпхъэ цIыкIум имэхьанэ къыгурыIоу, лъэпкъ тарихъыр, культурэр куоу ышIэнхэр зэрищыкIагъэр пшъашъэм зэхишIагъ. ЛIэшIэгъу чыжьэхэм IэшIагъэхэу лъэпкъым къахинагъэхэр АсекIэ шIэныгъэ ыкIи гупшысэ къэкIуапIэ хъугъэх. Шъэфыбэу гъучIым хэлъым изэгъэшIэн илъэси 10 ащ тыригъэкIодагъ. Iуашъхьэхэм ятIын хэлажьэу хъугъэ, археологие баиныгъэхэр зэпеплъыхьэх, зэхефых. Лъэхъэнэ зэфэшъхьафхэм ятхыпхъэхэр зэрэзэтекIыхэрэр егъэунэфых, ахэр уахътэу зашIыгъэр къыIон ылъэкIынэу мэхъу. Адыгэхэм зэо тхьамыкIагъохэр къафэмыкIогъагъэмэ, яискусствэ лъэгэпIэ иным нэсыщтыгъ, ау я XVIII – XIX-рэ лIэшIэгъухэр лъэпкъымкIэ лыгъу-лыстыгъэх.
ЗэпыупIэ ин зыфэхъугъэ лъэпкъ искусствэм псэ къыпигъэкIэжьыным А. Еутыхыр фежьэ. ИшIэныгъи, ищэIагъи, иамал-къулайи ащ тырегуащэ. КIэрэщэ Тембот ироманэу «Шыу закъом» хэт зэолI пшъашъэу Суандэ ыгу икIырэп, игупшысэ ренэу лъэпкъым кIэрыт. Тыжьыным хэшIыкIыгъэ IофшIагъэхэр зэхэубытагъэу ешIых: тандж паIор е «Адыиф итанджкIэ» зэджагъэр ахэм ащыщ. Жьыкъэщэгъу гупсэф имыIэу, адыгэ лъэпкъ щыгъын-шъуашэр зыщыгъ этногрфическэ нысхъэпи 100 ешIы. Бзылъфыгъэ шъуашэм телъ тыжьын пкъыгъохэу щэштэгъу, ахэр тхыпхъэхэмкIэ, мыжъо лъапIэхэмкIэ пкIагъэх, нэр пIэпахы.
Къэралыгъо къэшъокIо ансамблэу «Налмэсым» ишъошэ 40-мэ яэскизхэр Асе ышIыгъэх. Бзылъфыгъэр тхьэкъэгъэшIыгъэ хьалэмэт дэд. ГъучIыр ыIэпэ псыгъо дахэхэмкIэ ефытэ – къамэхэр, тыжьыныр ыкIи дышъэр атегъэчъыхьагъэу, адыгэ шъуашэм щыщ хъулъфыгъэ ыкIи бзылъфыгъэ бгырыпххэр, бгъэгупэ тыжьын чыIухэр, тарихъ мэхьанэ зиIэ пачъыхьэ тахътэр, лъэпкъ лъачIэу адыгэм и Чъыг лъапIэу мыIэрысэр зыпытыр… ИлъэсыкIэ пэпчъ итамыгъэ шъхьаIэ сыдигъуи уемыплъэкIэу Асе къегъэхьазыры, Адыгееу икIасэм щыпсэурэ цIыфхэм хэти къытфегъэшъуашэ, мы илъэсэу къэблэгъагъэмкIи шIухьафтыныр зэришIырэм щэч хэлъэп. ГъучIыр Iэ нэсыгъэми умышIэнэу къегъэчъы. Адыгэхэм зэраIоу, «ыIапэ дышъэр къыпэзы». Искусствэ иным илъэгапIэ зыштэныр зыфызэшIокIыгъэ художник лъэпкъым ыпхъу IэпэIасэу Асе. ИIэшIагъэхэмкIэ дунаим щыцIэрыIу. Иорданием ипачъыхьэ ыкъоу Али ихэгъэгу ригъэблагъи, илъэс IофшIэн фэдизыр мэзитIу-мэзищкIэ ыгъэцэкIэн ылъэкIыгъ, Iэшэ-шъошэ комплект 16-р бзылъфыгъэ ялые IэпэIасэм къыгъэчъыгъ. Асе ишъхьэгъусэу Тыркоо Руслъан мы творческэ гупшысэхэр пхырыщыгъэнхэмкIэ анахь IэпыIэгъу ин фэхъугъэр.
Мыщ дэжьым къыхэзгъэщымэ сшIоигъу нэбгыритIум унэгъо дахэ зэряIэр – Асе ишъхьэгъусэу Руслъани, икIалэхэми, иныси IэпэIасэм игупшысэхэм мэхьанэ араты, зэрафэлъэкIэу ащ итворчествэ хэлажьэх. Асе иIэшIэгъэ зэфэшъхьафхэр зыплъэгъухэкIэ, зыми фэмыдэ акъыл кIуачIэ ащ Тхьэм къызэрэхилъхьагъэр пшIошъ мэхъу. Ащ фэдэу щымытыгъэмэ, зыфэдэр къэIотэгъое иIэшIэгъэ- пкъыгъохэм ахэлъ гупшысэр, дэхагъэр, IэпэIэсагъэр тыдэ къыфикIыныгъэха?!
Асе иIэшIагъэхэр Анкара, Стамбул, Нью-Йорк, Москва ямузейхэм ачIэлъых. Бельгием, Канадэ, Германием, Японием яунэе коллекциехэм ахэр ахэлъых.
IэпэIасэу А. Еутыхым икъэгъэлъэгъонхэр Урысыем икъэлэшхохэу Москва, Санкт-Петербург, нэмыкI чIыпIэхэми зэращыкIуагъэхэми ахэр укъэзымыгъэукIытэжьыщтхэу зэрэшIыгъэхэр, дэгъугъэ шэпхъэ ин зэряIэр къаушыхьаты.
Санкт-Петербург дэт Къэралыгъо филармониеу Д. Шостакович ыцIэ зыхьырэм ихудожественнэ Iэшъхьэтетэу Темыркъан Юрэ къыIуагъ:
«Апэдэдэ Асе иIофшIагъэхэр зысэлъэгъухэм, Императрицэм иунэ сифагъэу ыкIи зыфэдэ щымыIэ хьалэмэтхэр къысагъэлъэгъоу къысщыхъугъ, ахэр осэнчъэх…»
Мы къэгъэлъэгъонхэм яплъыгъэ цIыф Iуш гъэсэгъабэр ахэм аумэхъыгъэх, агу щыхъэрэ- щышIэрэр гущыIэ фабэхэмкIэ тхылъым къыдатхагъэх. Ахэм IэпэIасэу Еутых Асе ыпсэ ифабэ ахигощагъ ыкIи цIыфхэм афигъэкIуагъ.
Адыгэм ыпхъу кIасэу, илъэпкъ шIоу филэжьыщтымкIэ, фиIощтымкIэ мыпшъыжьэу, искусствэм илъэгапIэ итворчествэкIэ зыштэн зылъэкIыгъэ Асе Аслъан ыпхъум псауныгъэкIэ тыфэлъаIозэ, шIур кIэзыгъэнчъэу кIиугъуаеу, и Адыгей ыкIи иунагъо насып закIэу гъэ мин ыгъэшIэнэу фэтэIо.
Мамырыкъо Нуриет.