Хабзэ зэрэхъугъэу, къэралыгъо щынэгъончъэнымкIэ къулыкъухэм яIофышIэхэм я Мафэ тыгъэгъазэм и 20-м Урысыем щыхагъэунэфыкIы.

Адыгеим и ЛIышъхьэу КъумпIыл Мурат, Адыгэ Республикэм и Къэралыгъо Совет – Хасэм и Тхьаматэу Владимир Нарожнэр, Адыгэ Республикэм ипрокуратурэ, ихьыкумышI, ихэбзэухъумэкIо къулыкъухэм япащэхэр щынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ иIофышIэхэм апае зэхащэгъэ зэIукIэм хэлэжьагъэх.

ЩынэгъончъэнымкIэ Федеральнэ къу­лыкъум Адыгэ РеспубликэмкIэ и ГъэIорышIапIэ ипащэу Сергей Каштановыр ГъэIорышIапIэм Iутхэм къафэгушIуагъ, псауныгъэ пытэ яIэнэу, ясэнэхьат епхыгъэ пшъэрылъхэр гъэхъагъэ хэлъэу агъэцэкIэнхэу къафэлъэIуагъ.

Республикэм и ЛIышъхьэ зэIукIэм къыщыгущыIэзэ, тишъолъыр политикэ зыпкъитыныгъэ илъынымкIэ, къэралыгъомрэ цIыфхэмрэ ящынэгъончъагъэ, конституционнэ фитыныгъэхэмрэ шъхьафитыныгъэмрэ къэухъумэгъэнхэмкIэ ведомствэм Iофышхо зэришIэрэр къы­Iуагъ.

«Къэралыгъо федэхэм якъэухъумэнкIэ Урысыем щынэгъончъэнымкIэ и Федеральнэ къулыкъу Адыгэ Респуб­ликэмкIэ и ГъэIорышIапIэ иIофышIэхэм респуб­ликэм икъэралыгъо хабзэ икъу­лыкъухэм зэдэлэжьэныгъэ дэгъу зэрадыряIэм фэшI ямэфэкI мафэ зыщыхагъэунэфыкIырэм сызэрафэразэр ясэIо», — къыIуагъ КъумпIыл Мурат.

НыбжьыкIэхэр экстремизмэм щыухъу­мэгъэнхэу Урысыем и Президентэу Владимир Путиным пшъэрылъ къызэригъэуцугъэр республикэм ипащэ агу къыгъэкIыжьыгъ. Урысые Федерацием щыпсэухэрэм языкIыныгъэрэ язэкъотныгъэрэ ягъэпытэн ар зэрэфэлэжьэщтыр ЛIышъхьэм къыIуагъ.

Щынэгъончъэным, цIыфхэм язэгурыIоныгъэрэ зыпкъитыныгъэмрэ къэухъумэгъэнхэм япхыгъэ Iофыгъохэм язэшIохынкIэ ведомствэм республикэм ихэбзэ къулыкъухэм зэдэлэжьэныгъэу адыриIэр тапэкIи гъэпытэгъэн зэрэфаер КъумпIыл Мурат къыхигъэщыгъ.

Джащ фэдэу Адыгэ Республикэм и Къэралыгъо Совет – Хасэм и Тхьаматэу Владимир Нарожнэр щынэгъончъэнымкIэ Федеральнэ къулыкъум Адыгэ Рес­публикэмкIэ и ГъэIорышIапIэ иIофышIэхэм къафэгушIуагъ. Мы мафэм ведомствэм иIофышIэ пэрыт заулэмэ ведомствэ, республикэ тынхэр къафагъэшъошагъэх. Адыгэ Республикэм и ЛIышъхьэ ипресс-къулыкъу