Тыркуем къыщагъэлъэгъощт
ЗэлъашIэхэрэ сурэтышIхэу ЛэупэкIэ Нурбыйрэ Хъуажъ Рэмэзанрэ яIофшIагъэхэр къагъэлъэгъонхэу Тыркуем икъалэу Истамбул рагъэблэгъагъэх.
Пхъэм хэшIыкIыгъэхэ пкъыгъохэр, лIэкъо тамыгъэхэр, адыгэхэм языкIыныгъэ гъэпытэгъэным афэгъэхьыгъэхэр, тишъолъыр ехьылIагъэхэ сурэтхэр Хъуажъ Рэмэзанэ Тыркуем къыщигъэлъэгъощтых.
Ижъырэ адыгэ музыкальнэ Iэмэ-псымэхэр, пэсэрэ лъэхъаным адыгэмэ псэукIэу яIагъэм ехьылIагъэхэр, цIыф цIэрыIохэм ясурэтхэр, фэшъхьафхэри ЛэупэкIэ Нурбый Истамбул къыщигъэлъэгъощтых.
— Ти ЛIышъхьэу КъумпIыл Мурат Тыркуем зэкIом экономикэм, культурэм, лъэпкъ зэпхыныгъэхэм афэгъэхьыгъэхэ Iофыгъохэр щыIэныгъэм щыпхырыщыгъэнхэмкIэ лъэныкъохэм зэзэгъыныгъэхэр зэдашIыгъэх, — къеIуатэ Хъуажъ Рэмэзанэ. — Республикэм иобщественнэ движениеу «Адыгэ Хасэри» зэхэщэн Iофыгъохэм ахэлажьэ. Тыркуем тызэрэкIорэм мэхьэнэ ин етэты. Кавказ культурэм и Ассоциацие тыригъэблэгъагъ.
Хъуажъ Рэмэзанрэ ЛэупэкIэ Нурбый ыкъоу Айтэчрэ тыгъэгъазэм и 23 – 26-м Истамбул къэгъэлъэгъонэу щызэхащэрэм хэлэжьэщтых. Мыекъуапэ къызагъэзэжьыкIэ гущыIэгъу тызэфэхъущт.
Сурэтхэм арытхэр: Хъуажъ Рэмэзанрэ ЛэупэкIэ Айтэчрэ къэгъэлъэгъоным зыфагъэхьазыры; Н. ЛэупакIэм иIофшIагъэхэм ащыщ.
ЕМТIЫЛЪ Нурбый.