Зэнэкъокъум зеушъомбгъу
ОрэдыIохэм язэнэкъокъоу «ЖъогъуакI» («Новая звезда») зыфиIорэр Урысые телеканалэу «Жъуагъом» щызэхащагъ. УФ-м ухъумэнымкIэ и Министерствэ Iофтхьабзэм кIэщакIо фэхъугъ. 
«ЖъогъуакI» зыфиIорэ Iофтхьабзэм Урысыем ит шъолъыр 85-м къарыкIыгъэ ныбжьыкIэхэр хэлажьэх. Ахэр орэд къэIонымкIэ амалэу аIэкIэлъымкIэ зэнэкъокъух. Музыкэм ылъэныкъокIэ зэкIэми зэлъашIэрэ экспертхэм ыкIи Урысыем щыпсэурэ цIыфхэм амакъэ зэратырэмкIэ анахь дэгъухэр къагъэнафэх.
Цышэ Зарет зэнэкъокъум Адыгеир къыщигъэлъэгъощт. Iофтхьабзэм фэгъэхьыгъэ нахь игъэкIотыгъэ къэбар телеканалым иофициальнэ сайт, Iахьэу «Программы» — «Новая Звезда 2020» зыфиIорэм ибгъотэщт.
Зэнэкъокъум иапэрэ уцугъо 2019-рэ илъэсым тыгъэгъазэм и 31-м кIощт. Финалныкъомрэ финалымрэ 2020-рэ илъэсым щылэ мазэм и 2-м къыщегъэжьагъэу и 4-м щыIэщтых. А уахътэм цIыфхэм жъугъэу амакъэ фатын алъэкIыщт агу рихьыгъэ орэдыIом.
Зэнэкъокъур зыщыкIощтхэ мафэхэм Урысыем «макъэу» иIэр зэкIэ зэхэпхын, артист ныбжьыкIэхэм орэдхэу, къэгъэлъэгъон гъэшIэгъонэу къагъэхьазырыгъэм уядэIун плъэкIыщт.
Iофтхьабзэм нэбгыритIумэ текIоныгъэр щызэдагощыщт. ШIухьафтынхэри уцугъуитIукIэ аратыжьыщтых. Щылэ мазэм и 4-м жюрим ишIошIкIэ текIоныгъэ къэзыхьыгъэм ар фагъэшъошэщт. Щылэ мазэм и 7-м къэралыгъом щыпсэухэрэм янахьыбэм амакъэ зыфатыгъэр агъэшIощт.
Зэнэкъокъум пшъэрылъ шъхьаIэу иIэр Урысыем ишъолъырхэм сэнаущыгъэ ин зыхэлъ ныбжьыкIэу арысхэр къыхэгъэщыгъэнхэр ары.
Iофтхьабзэм изэхэщэнкIэ IэпыIэгъу къафэхъугъэ АР-м и ЛIышъхьэу КъумпIыл Мурат телеканалэу «Жъуагъом» ипащэхэр къыфэразэх.
Зыгъэхьазырыгъэр Гъонэжьыкъо Сэтэнай.