Европэм самбэмкIэ изэнэкъокъу Латвием икъалэу Ригэ щыкIуагъ. Илъэс 15 – 16 зыныбжь кIалэхэр, пшъашъэхэр зэIукIэгъухэм ахэлэжьагъэх.

Къэралыгъо 19-мэ ябэнэкIуи 170-рэ алырэгъум щызэнэкъо­къугъ. Армением, Болгарием, Грузием, Италием, Румынием, Украинэм, Францием, Урысыем, фэшъхьафхэм яныбжьыкIэхэм яIэпэIэсэныгъэ къагъэлъэгъуагъ.

Адыгэ Республикэм щапIугъэ Екатерина Соловьевар Урысыем ихэшыпыкIыгъэ командэ хэтэу Ригэ щыбэнагъ. Урысыем иныбжьыкIэхэм язэнэкъокъоу Новороссийскэ щыкIуагъэм Е. Соловьевам дышъэр къыщихьи, Европэм изэIукIэгъухэм ахэлэжьэнэу фитыныгъэ иIэ хъугъагъэ.

Килограмм 70-м нахьыбэ къэ­зыщэчыхэрэм якуп Екатерина Соловьевар щыбэнагъ. Типшъа­шъэ зэIукIэгъухэм текIоныгъэр къащыдихи, дышъэр къыфагъэшъошагъ. Тренерэу Нэныжъ Байзэт ипащэу Е. Соловьевам зэнэкъокъум зыфигъэхьазырыгъ.

 ЕМТIЫЛЪ Нурбый.