Хэгъэгум Iэпшъэ заомкIэ изэнэкъокъу къалэу Орел щызэхащагъ. Адыгэ Республикэм испорт еджапIэу N 2-м зыщызыгъэсэрэ Кристина Морозовам зэIукIэгъухэм тыжьыныр къащыдихыгъ.

Урысыем ишъолъыр 52-мэ яспортсмен 320-рэ алырэгъум щызэнэкъокъугъ. Кристина Морозовар кг 70-рэ къэзыщэчы­хэрэм якуп хэтыгъ. Свердловскэ, Курскэ, Калининград хэкухэм яспортсменкэхэм К. Морозовар ате­кIуагъ. Дышъэм фэгъэхьыгъэ зэIукIэгъур къинэу кIуагъэ. Ставрополь краим щыщэу Юлия Санжаровам Урысыем, дунаим дышъэр къащыдихыгъ. К. Морозовар мыщынэу спортсменкэ IэпэIасэм енэкъокъугъ, ау текIоныгъэр къышIуихьын ылъэкIы­гъэп.

Кристина Морозовам тыжьыныр къыдихыгъ, Урысыем спортымкIэ имастер хъугъэ, хэгъэгум ихэшыпыкIыгъэ командэ аштагъ. Ушу- саньдамкIэ Урысыем и Кубок К. Морозовам къыфагъэшъошагъ, дунаим изэнэкъокъоу Китаим щыкIуагъэм джэрзыр къыщихьыгъ, Урысыем изэнэкъокъу дышъэр къыщыдихыгъ. Москва щыкIогъэ дунэе зэIукIэгъум апэрэ чIыпIэр къыщыфагъэшъошагъ.

— Адыгэ къэралыгъо университетым физкультурэмкIэ ыкIи дзюдомкIэ и Институт ия 4-рэ курс К. Морозовар щеджэ, — къытиIуагъ республикэм испорт еджапIэу N 2-м ипащэу, Урысыем, Адыгеим язаслуженнэ тренерэу Хъот Юныс. — Республикэм щыкIохэрэ мэфэкI зэхахьэхэм, общественнэ Iофыгъохэм Кристина чанэу ахэлажьэ. Адыгэ Респуб­ликэм изаслуженнэ тренерэу НэмытIэкIо Аскэр ипащэу 2020-рэ илъэсым щыIэщтхэ зэнэкъокъухэм зафегъэхьазыры.

— Европэм изэнэкъокъу Минскэ щыкIощт, дунаим и Кубок къыдэхыгъэным фэгъэхьыгъэ зэнэкъокъур Италием щызэха­щэщт. Сипащэхэу Хъот Юныс, НэмытIэкъо Аскэр сиупчIэжьэгъух, спортым ишъэфхэм сащагъэгъуазэ, — къытиIуагъ Кристина Морозовам. — Адыгэ быракъыр зэнэкъо­къухэм тапэкIи ащытIэтыщт, рес­публикэм щытхъу къыфэтхьыщт.

 ЕМТIЫЛЪ Нурбый.