Гъэсэпэтхыд
Дунаим узэрэхэтым нахь шIагъо бгъотынэп:
Зыщаушъомбгъу ащ акъылымрэ ппкъырэ,
Щэбагъо IэшIагъэмрэ шIэныгъэмрэ,
Ахэмэ хабзэ ахэлъэу,
ЧIышъхьашъом утырагъэты.
Гъэсэпэтхыдэр зэмылыекIырэм
Сеушъыи сшIоигъу сэ непэ.
ШIу лъэгъу!
Лъэгъуныгъэр зэкIэми апшъ,
Уигъэнэфэу угу ерэлъ.
УмышIапхъэм нэлат едз,
Дзэ къыокIугъэми шъырыт,
Зэпыщытыным щыухь,
Ухэхьэгъахэмэ атекIу.
ЗыгъэлъапI!
Щыгъэзый къэIон-Iожьыныр,
УмыIуатэ къыбдэмыхъугъэр,
ПIотэгъахэр умышIэжьмэ нахьышIу.
ЦIыфхэм захэмыIэтыкI,
ЛъэгукIэтыни зымышI.
УпчIэжьэгъу пшIыщтым фэсакъ,
Узэраухэсырэр щыIэ,
Узэрягупшысэрэр гъэбылъ,
Шъугъоныр угу имыгъэлъ.
УемыхъулI бакъмэры ахъщэм,
Хьарамыгъэ къызыхэмыгъаф.
УимыIэмкIэ умытхьаусых,
Бгъотырэм урымыкъэй.
ЦIыфым пIапэ фэщэй,
ЗэфыщытыкIэр шъхьэуас.
Зыфэшъыпкъэжь!
ЧIыфэ пштэмэ, игъом тыжь,
ЦIыф цыдым иIэр чIенэ,
Гозы ныбджэгъу хьалэлыри.
ГущыIэ лые умыгъэбыбы,
Бэрэ даIо, макIэу Iуатэ.
ШIу шIэ!
ГъашIэм шIушIагъэр кIодырэп,
Гум имашIо гукIэгъоу,
ЦIыфым ренэу пэгъох.
Псэм ыбзэкIэ зэфагъэр зыхащ,
Ары гум ипытапIэр,
ЦIыфыгъэ зэхашIэр чIэмын.
ТхьэчIэгъыр дэхагъэм фэзэщы!
ЩыIэныгъэм ишъэфыр — шъыпкъагъ,
Ар зыхэгъэлъи атекIу.
Зыгъэшъаб!
Пхъашэр кIочIаджэ шIы.
ШIэныгъэр тыдэ щыIэми, лъыкIу
КIорэм хегъэкIы — лъыкIуат.
Бэ зэIумыгъакI, чIэунэщтыр нахьыб.
Шапхъэр пшIэмэ, къыбдэмыхъун щыIэп.
Ор-орэу зыпIэтышъущтэп,
КъыпкIэIэщтыр къыбготыр ары,
Шэным нахь IэшIур — щэIагъ,
Зыхэлъыр гъусэнчъэп.
Зымыгъэпаг!
Ащ ыIэпкъ-лъэпкъ къутэгъошIу.
Шэнычъэр — насыпынчъ,
Зышъо пызэу, чъэкIырэр цIыф ныкъу.
Хахъом ихъоур — гугъэ,
Ары плъэ зыIэтыщтэу,
Гъэхъагъэхэм уафэзыщэщтыр.
Узфэрэзэжьэу псэу,
Гухахъоу джащ хэбгъотэщтым
Уидунай ыгъэрэзэщт.
ШхъонтIагъэр къызытемыгъакIу,
ЦIыфым цыхьэ зыфегъэшI.
Iупэщхыр орэтыгъэхьажъу,
Нэщх-гущхыр хэти икIас.
Уипыйми зэфагъэ дызехь,
ЗымыгъэпцIэжь!
Зыфэрэзэжьи къыбдэхъурэм хэхъощт.
УиIофи тхъагъо хэгъуат —
КIэгушIузэ ащ къэущыжь.
Нэфынэм игъогу екIу,
ЕмыкIум зыщыдзые зэпыт,
Фэмыфыр Iогъу-шIэгъу умышI,
Сэнаущыгъи пхэрэлъ.
ЛъэпсынкIэ зекIоным зегъас.
Мыгъасэр къахэщэу хабзэ,
ГумышIугъэм елъэпэожьы.
УигущыIэ уасэ ерэI,
ПIогъахэр зэкIэмыхьажь.
Зэфэхьысыжьым зегъас,
Нахь тэрэзыр къыхэх.
«УмыIуатэ» зыфаIорэм фэсакъ,
ЦыхьэшIэгъунчъэр — нэпэнчъ.
Зыфэсакъыжь!
Зыщыдзый уищэн зылъэкIыщтым,
КIуачIэрэ ахъщэмрэ насыпхэп.
Игъэхъагъэ зыIуатэрэр — щхэны,
ЗилъэкI зыдэзымышIэжьырэр — делэ,
ЦIыф дэгъур дэим нахь мах.
КъэпIощтым фэсакъ зэпыт,
Iогъахэм къыгъэзэжьы хабзэп,
Дунаим ыбзэ зэблихъурэп.
Мыхэр зэкIэ
Пшъхьэпэн закIэх
ЦIыфхэми агъэунэфыгъ.
Гуфилъэу бгъэцакIэмэ
ЦIыфыгъэ напэр уишъуаш.
ЩэшIэ Щамсэт