Зэнэкъокъум шъухэлажь
Урысые шъхьэихыгъэ проектэу «Цех драматургов» зыфиIорэм диштэу очнэ ыкIи заочнэ шIыкIэм тетэу рагъэкIокIыщт драматургическэ семинархэм ахэлажьэ зышIоигъохэм апае зэнэкъокъу зэхащэ.
Проектым гухэлъ шъхьаIэу иIэр театрэшхохэм Iоф адэзышIэн зылъэкIыщт автор ныбжьыкIэхэу сэнаущыгъэ зыхэлъхэр къыхэгъэщыгъэнхэр ыкIи ахэр егъэджэгъэнхэр ары.
Зэнэкъокъум хэлажьэ зышIоигъохэм ялъэIу тхылъхэр тыгъэгъазэм и 1-м къыщыублагъэу мэзаем и 1-м нэс аштэщтых. Ащ хэлэжьэн зылъэкIыщтхэр Урысыем щыщ тхэкIо ныбжьыкIэхэу илъэс 40-м зыныбжь нэмысыгъэхэр ары. УрысыбзэкIэ тхыгъэ пьесэхэу (инсценировкэхэр хэмытхэу) ыпэкIэ зыми щамыгъэуцугъэхэр ары зэнэкъокъум къырахьылIэнхэу щытхэр.
Жюрим Москварэ Московскэ хэкумрэ ащыщ авторхэм яIофшIэгъи 10, нэмыкI регионхэм ащыпсэухэрэм яеу IофшIэгъи 5 къахихыщт. ЗиIофшIагъэ къыхахыхэрэр очнэ ыкIи заочнэ шIыкIэм тетэу кIощт семинархэм ыпкIэ хэмылъэу ащеджэнхэ алъэкIыщт. Драматургхэу О. Михайловамрэ Е. Исаевамрэ семинархэр зэхащэхэзэ ашIыщт.
2020-рэ илъэсым гъэтхапэм и 1-м къыщегъэжьагъэу бжыхьэм нэс еджэнхэу кIощтых.
Анахь пьесэ дэгъоу къыхахыхэрэр М. Горькэм ыцIэкIэ щыт МХАТ-м щыкIощт фестивалым къыщагъэлъэгъощтых. Анахь пьесэ дэгъуи 3-мэ яавторхэм сомэ мин 800 грантэу аратыщт. Москва е нэмыкI шъолъырхэм ятеатрэхэм спектаклэр ащагъэуцунымкIэ ар къашъхьапэщт.
Проектым къыдилъытэрэ лъэныкъохэм ягъэцэкIэн фэгъэзагъэр Фондэу «Преображениер» ары, ащ деIэщтых президент грантхэмкIэ Фондыр, М. Горькэм ыцIэкIэ щыт МХАТ-р, ГИТИС-р, Ф. Волковым ыцIэкIэ щыт Урысые къэралыгъо академическэ театрэр.
Зэнэкъокъум фэгъэхьыгъэр зэкIэ сайтэу httр://сivitаs – drаmа.ru ижъугъотэщт.