Адыгэ Республикэм и ЛIышъхьэу КъумпIыл Мурат Мыекъуапэ дэт хэушъхьафыкIыгъэ кIэлэцIыкIу спорт еджапIэу N 2-м шъхьафит бэ­нэнымкIэ икъутамэ тыгъуасэ щыIагъ. Мыщ зыщызыгъасэхэрэ кIэлэ­цIыкIухэм, спортсмен ныбжьыкIэхэм аIукIагъ, ахэм ыкIи ятренерхэм гущыIэгъу афэхъугъ.

Республикэм ипащэ игъу­сагъэх АР-м и Къэралыгъо Совет — Хасэм и Тхьаматэ игуадзэу Iащэ Мухьамэд, Адыгеим гъэсэныгъэмрэ шIэ­ныгъэмрэкIэ иминистрэу КIэ­рэщэ Анзаур, республикэм фи­зическэ культурэмкIэ ыкIи спортымкIэ и Комитет итхьаматэу Дэгужъые Мурат.

Шъугу къэдгъэкIыжьын, рес­публикэм ипащэ ипшъэрылъкIэ ыпшъэкIэ зигугъу къэтшIыгъэ еджапIэм шъхьафит бэнэнымкIэ икъутамэ 2017-рэ илъэсым Мыекъуапэ къыщызэIуахыгъ. Тренерхэу Тезадэ Хьасанрэ Тембот Анатолийрэ бэнэнымкIэ сэнаущыгъэ зыхэлъ спортсмен ныбжьыкIи 100-м ехъу агъасэ. Непэрэ мафэм ехъулIэу еджапIэм икъутамэ зыщызыгъасэхэ­рэм ащыщ Урысыем имыза­къоу, дунаим щызэлъашIэрэ спорт­смен цIэрыIоу Мафэ Билял.

Спортсменхэм сэнаущыгъэу ахэлъыр, техникэу аIэкIэлъыр республикэм ипащэ къырагъэлъэгъугъ. Ежь Адыгеим и ЛIы­шъхьи ахэм якIолIагъ, гущыIэгъу афэхъугъ, бэнэным ылъэны­къокIэ гъэхъэгъэшIухэр ашIынхэу, лъэгэпIэ инхэм анэсынхэу афэлъэIуагъ.

Адыгеим изаслуженнэ тренерэу Тембот Анатолий къызэриIуагъэмкIэ, агъасэхэрэ кIэлэцIыкIухэм, ныбжьыкIэхэм узщыгугъын плъэкIынэу ахэтыр бэ. Республикэм ибэнакIохэр зэ­нэкъокъу зэфэшъхьафхэм ахэлажьэх, текIоныгъэр ыкIи хагъэ­унэфыкIырэ чIыпIэхэр къыдахых.

ТХЬАРКЪОХЪО Адам.