Культурэм изэфэхьысыжьхэр, уахътэр
ЗэхэщакIор — лъэгъохэщ
Республикэм культурэмкIэ и Министерствэ иколлегие игъэкIотыгъэ зэхэсыгъоу иIагъэм уахътэм диштэрэ Iофыгъохэм щатегущыIагъэх.
КультурэмкIэ министрэу Аулъэ Юрэ зэхахьэр зэрищагъ. Адыгэ Республикэм икультурнэ-зыгъэпсэфыпIэ IофшIапIэхэр къэухъумэгъэнхэм ыкIи хэхъоныгъэ ашIыным афэгъэхьыгъэу министрэм игуадзэу, Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэт къэгущыIагъ.
Адыгэ Республикэм икультурнэ-зыгъэпсэфыпIэ IофшIэпIи 132-мэ ащыщэу 118-р къуаджэхэм адэтых. Теуцожь, Шэуджэн районхэм, Мыекъуапэ, Адыгэкъалэ яIофыгъохэр нахьышIоу гъэпсыгъэх. КультурэмкIэ IофшIапIэхэр зыфимыкъухэрэр, тIысыпIэхэм ащыкIэхэрэр макIэп. Мыекъопэ районым ащкIэ гумэкIыгъохэр иIэх.
Республикэм икультурнэ-зыгъэпсэфыпIэ IофшIапIэхэм лъэпкъ творчествэм икуп 972-рэ ащызэхэщагъ, нэбгырэ 14054-рэ ахэт. 2015-рэ илъэсым ебгъапшэмэ, купхэр проценти 2,5-кIэ, цIыф пчъагъэр проценти 3-кIэ нахьыбэ хъугъэх. Народнэ купхэм, щысэ зытырахыхэрэм япчъагъэ процент 15 хэхъуагъ. 2018-рэ илъэсым «народнэ» цIэр куп 17-мэ афаусыгъ.
Ясэнэхьат феджагъэхэр
Культурнэ-зыгъэпсэфыпIэ IофшIапIэхэм ясэнэхьат феджагъэу, дэгъоу лажьэу ахэтыр бэ. ШъэуапцIэкъо Аминэт ар къыдилъытэзэ, ящыкIэгъэ кадрэхэр зэрафимыкъухэрэр хэушъхьафыкIыгъэу къыхигъэщыгъ. Культурэм хэшIыкI фызимыIэм, гукIэ фэмыщагъэм IэнатIэ ратэу къызэрэхэкIырэм уегупсэфылIэ хъущтэп.
Пщынаохэр, къэшъуакIохэр, фольклор купхэм япащэхэр афикъухэрэп. Программэу «Культурэр» щыIэныгъэм щыпхыращызэ, Адыгэ Республикэм культурэмкIэ и Министерствэ творчествэм пылъхэм яшIэныгъэ хагъэхъонымкIэ егъэджэнхэр хэгъэгум иапшъэрэ еджапIэхэм ащызэхищагъэх.
Адыгэ Республикэм искусствэхэмкIэ кIэлэцIыкIу еджэпIэ 20-м нахьыбэ, искусствэхэмкIэ колледж, апшъэрэ еджапIэ иIэх. Ахэр тищыкIэгъэ кадрэхэм ягъэхьазырын зэрэдэлажьэхэрэм шъхьафэу утегущыIэныр нахьышIу.
ЛэжьапкIэр
Урысыем и Президент иунашъокIэ культурэм иIофышIэхэм ялэжьапкIэ 2015-рэ илъэсым процент 60-кIэ нахьыбэ хъугъэ. ГурытымкIэ мэзэ лэжьапкIэр сомэ мин 25-м нахьыбэ хъугъэу зэхахьэм къыщаIуагъ.
IофшIэгъу уахътэр нэмыкIэу зэхащэу аублагъ. Пчэдыжьым сыхьатыр 9-м къыщыублагъэу пчыхьэм сыхьатыр 8-м нэс Iоф ашIэ. Къуаджэм дэсхэм яшIоигъоныгъэхэр къыдалъытэхэзэ яIофшIэн зэхэзыщэхэрэм зэхъокIыныгъэшIухэр яIэх.
Республикэм культурэмкIэ и Министерствэ изэхахьэ А. ШъэуапцIэкъом къызэрэщиIуагъэу, лъэпкъ шIэжьым къыпкъырыкIыхэзэ, пIуныгъэм, зыгъэпсэфыгъо уахътэр цIыфхэм гъэшIэгъонэу агъэкIоным яхьылIэгъэ Iофтхьабзэхэр агъэцакIэх.
Лъэпкъ культурэм и Гупчэ Дунэе фестиваль-зэнэкъокъоу «Адыгеим ижъогъожъыехэр», лъэпкъ театрэхэм язэIукIэгъухэр, «ИлъэсыкIэ мэфэкIыр», нэмыкIхэри зэхещэх. Культурэм и Унэ анахь дэгъум икъыхэгъэщын, «Культурэм иIофышIэ анахь дэгъу» зыфиIорэр, фэшъхьафхэри илъэс къэс гъэшIэгъонэу макIох. Кавказым имамыр щыIакIэ фэгъэхьыгъэ Дунэе фестивалыр лъэхъаным дештэ. Лъэпкъхэр культурэм зэрэзэфищэхэрэр Iофтхьабзэм къыщэлъагъо. Мыгъэ шъолъыр 16 фестивалым хэлэжьагъ. Адыгэ Республикэр илъэс 28-рэ зэрэхъурэм фэгъэхьыгъэ мэфэкI мафэхэм атефэу Кавказ шъолъырым и Дунэе фестиваль я 20-у зэхащагъ. ЗэIукIэгъур игъэкIотыгъэу Мыекъуапэ щыкIуагъ.
ЯпчъагъэкIэ бэ мыхъухэрэ лъэпкъхэм язэхахьэхэри Адыгеим гъэшIэгъонэу щызэхащэх.
КультурэмкIэ, искусствэмкIэ зэхахьэхэм ахъщэшхо къакIэкIонэу зэхэщакIохэр гугъэхэрэп. ЦIыфым ипIун, игъэсэн имэхьанэ зыкъегъэIэтыгъэныр ары анахьэу зылъыплъэхэрэр.
Лъэпкъым иIэпэIасэхэм язэхахьэхэм цIыфыбэ ахэлажьэ. Адыгэ шъуашэм, лъэпкъ тхыпхъэхэм, дышъэидагъэхэм, пэсэрэ лъэхъаным лъэпкъхэм ашIыщтыгъэ пкъыгъохэу къытлъыIэсыжьыгъэхэм якъэгъэлъэгъон, фольклор ансамблэхэм, театрэхэм язэIукIэгъухэр тапэкIи игъэкIотыгъэу зэрэзэхащэщтхэр зэхахьэм къыщаIуагъ.
НахьышIум фэгъэхьыгъ
Культурэм иIофшIапIэхэм япшъэрылъхэр нахьышIоу зэрагъэцэкIэщтхэм зэрэтегущыIагъэхэр шIукIэ къыхэтэгъэщы. Республикэм и ЛIышъхьэу КъумпIыл Мурат, пащэхэр IэпыIэгъу къазэрафэхъухэрэм ишIуагъэкIэ культурэм иунэхэм ягъэцэкIэжьын нахьышIоу зэхащэ хъугъэ. 2015 — 2019-рэ илъэсхэм ателъытэгъэ къэралыгъо программэр щыIэныгъэм щыпхыращызэ, щыкIагъэхэр дагъэзыжьых.
Урысыем и Правительствэ ишIухьафтынэу «Урысыем ыпс» зыфиIорэр IофшIапIэу «Ошъадэм» ипащэу, Адыгэ Республикэм изаслуженнэ артисткэу Едыдж Викторие къызэрэфагъэшъошагъэм имэхьани зэхахьэм къыщыхагъэщыгъ. Адыгеим икультурэ зыкъеIэты. ТапэкIи хэхъоныгъэхэр ышIынхэм фэшI IофшIагъэу яIэм ылъапсэ агъэпытэзэ зэрэлъыкIотэщтхэм егупшысэх.
Культурэм и Унэ цIыфхэр зэфещэх, гупчэу зэрэщытыр щыIэныгъэм къыщэлъагъо. Адыгэ Республикэм исурэтышIхэм я Союз итхьаматэу шIэныгъэлэжьэу Елена Абакумовар, Урысыем итеатрэхэм яIофышIэхэм я Союз икъутамэу Адыгэ Республикэм щыIэм ипащэу, зэлъашIэрэ артистэу Зыхьэ Заурбый, нэмыкIхэм зэрэхагъэунэфыкIыгъэу, культурэм иIофшIапIэхэм хэхъоныгъэ ашIынымкIэ республикэм амалхэр иIэх. Театрэхэм творчествэм ылъэныкъокIэ IэпыIэгъу афэхъунхэм фэшI ахъщэу афатIупщырэм зэрэхагъэхъощт шIыкIэм, нэмыкIхэм атегущыIагъэх.
Культурэм иIофшIапIэхэм ягъэцэкIэжьын, фэшъхьафхэм къатегущыIагъ республикэм культурэмкIэ иминистрэ иапэрэ гуадзэу Ольга Тавшинар. Зэхахьэм фэшъхьаф Iофыгъохэри къыщаIэтыгъэх, зытегущыIагъэхэм яхьылIэгъэ унашъохэр щаштагъэх.
ЕмтIылъ Нурбый.
Сурэтхэр Iофтхьабзэм къыщытетхыгъэх.