Республикэм футболымкIэ икIымэфэ зэIухыгъэ зэнэкъокъу хэлэжьэрэ командэхэу апшъэрэ купым хэтхэм ящэнэрэ зэIукIэгъухэр яIагъэх. ЕшIэгъухэр

«Фыщт» — «Картонтара- СШОР» — 4:2, «Ошъутен» — «Спортмастер» — 5:3, «ЧIыгушъхь» — «Урожай» — 0:0, «Дорожник» — «МФОК-Ошъутен» — 0:2. «Фыщтым» иешIакIоу Александр Нартиковым гъогогъуи 3 «Картонтара-СШОР-м» икъэлапчъэ Iэгуаор дидзагъ.

«Ошъутенэр» «Спортмастерым» зэрэтекIуагъэм къыхэд­гъэщырэр къэлапчъэм Iэгуаор дэзыдзэн зылъэкIыщтхэм яIэпэ­Iэсэныгъэ хагъэхъоным зэрэ­пылъхэр ары. Щыко Руслъан гъогогъуитIо, ЛIыхъурэе Эдуард, Къонэ Амир, Хьатитэ Алый зырызэ хъагъэм Iэгуаор радзагъ. ЕшIакIохэр псынкIэу мэгупшысэх, пхъашэу мэбанэх. Джамырзэ Аслъанбэч, Дэгужъые Мурат, Денис Павловым зырызэ «Ошъутенэм» икъэлапчъэ Iэгуаор дадзагъ.

«Урожаир», «ЧIыгушъхьэр», нэмыкIхэри апэрэ чIыпIэм фэбанэх. Пчъагъэр 0:0-у ешIэгъур аухыгъэми, «ЧIыгушъхьэмрэ» «Урожаимрэ» язэIукIэгъу гъэ­шIэгъонэу кIуагъэ. «ЧIыгушъхьэр» текIоныгъэм нахь пэблагъэ хъугъэу уахътэ къыхэкIыгъ, ау пенальтир къэлапчъэм дидзэн ылъэ­кIыгъэп. Алексей Саяпиныр къэлэпчъэIут анахь дэгъухэм ащыщ, Iэгуаор ащ къызэкIи­дзэжьыгъ.

«МФоК-Ошъутенэр» «Дорожникым» зэрэтекIуагъэр дгъэ­шIагъорэп, иешIакIэ хигъэхъон ылъэкIыщт. Къошк Рустем гъо­гогъуитIо хъагъэм Iэгуаор ри­дзагъ.

«Урожаим» иешIакIоу Денис Крыловым гъогогъуи 6 къэла­пчъэм Iэгуаор дидзагъ, «Бомбардир анахь дэгъу» зыфиIорэ щытхъуцIэр къыдихынымкIэ амалышIухэр иIэх. «ЧIыгушъхьэм» хэтэу Антон Винниковым кIы-мэфэ зэнэкъокъум гъогогъуи 5 къэлапчъэм Iэгуаор щыдидзагъ.

Мыекъопэ «Зэкъошныгъэм» итренер шъхьаIэу Ешыгоо Сэфэрбый ешIэгъухэм яплъыгъ, рес­публикэм щапIугъэ ныбжьыкIэхэм яIэпэIэсэныгъэ зэрэхагъа­хъорэм уасэ фишIыгъ.

Тыгъэгъазэм и 15-м я 4-рэ ешIэгъухэр стадионэу «Юностым» щыкIощтых. «ЧIыгушъхь» — «Фыщт» СШОР — «Спортмастер» МФОК — «Ошъутен» «Урожай» — «Дорожник» Апэрэ ешIэгъур пчэдыжьым сыхьатыр 10-м аублэщт.

ЯтIонэрэ ыкIи ящэнэрэ купхэм, зэнэкъокъур зэращыкIорэм, ветеранхэм яешIэгъухэр тинэплъэгъу итых, кIэуххэм гъэзетеджэхэр ащыдгъэгъозэщтых.