Урысыем футболымкIэ иапшъэрэ куп хэт коман­дэхэм 2019 — 2020-рэ илъэс ешIэгъум хэхьэрэ зэIукIэгъухэм яапэрэ кIэлъэныкъо аухыгъ.

КIэуххэр

Я 19-рэ зэIукIэгъухэм якIэух-хэр зэтэгъапшэх.

«Зенит» — «Динамо» — 3:0, «Арсенал» — «Локомотив» — 4:0, «Тамбов» — «Оренбург» — 3:0, «Краснодар» — ЦСКА — 1:1, «Спартак» — «Ростов» — 1:4, «Ахмат» — «УфА» — 0:1, «Крылья Советов» — «Урал» — 2:3, «Шъачэ» — «Рубин» — 1:1.

«Локомотив» 0:4-у ешIэгъур шIуахьыгъэу дышъэр къыдихын ылъэкIыщтэу тлъытэрэп. «Краснодар» иешIакIэ хигъэхъоным фэхьазыр, ау апэрэ е ятIонэрэ чIыпIэр къыдихыным фэшI судья­хэм ялъытыгъэри макIэп. «Краснодар» ЦСКА-м зыдешIэм, та­къикъ 15 фэдиз судьям зэIукIэгъу уахътэм хигъэхъуагъ. Зэпыугъо бащэ ышIыгъ, ар «Краснодар» къегоуагъ. ЗэIукIэгъур зэрэкIорэм лъыплъэхэрэ судьяхэр гъэнэфагъэх, дискым тыратхагъэм икIэ­рыкIэу судья шъхьаIэр бащэрэ еплъыжьы, ыгъэмысэн фаер икъоу къыхигъэщырэп.

Я 11-рэ чIыпIэм щыIэ «Тамбовым» къыщегъэжьагъэу ауж къинэрэ командэхэм рэхьат яIэп, апшъэрэ купым къыхэнэжьыщтыр къэшIэгъуае къащэхъу.

«Краснодар» хэтхэу М. Сулеймановымрэ М. Сафоновымрэ хэгъэгум иешIэкIо ныбжьыкIэ анахь дэгъухэу къызэрэхахыгъэ­хэм фэшI тафэгушIо. Алан Дзагоевым ипсауныгъэ зыпкъ ри-гъэ­уцожьыгъ, ЦСКА-м изэIукIэгъухэм ахэлажьэ.

Я 20-рэ ешIэгъухэр 2020-рэ илъэсым гъэтхапэм и 1-м командэхэм яIэщтых.

ЧIыпIэхэр

1. «Зенит» — 45 2. «Краснодар» — 35 3. «Ростов» — 34 4. ЦСКА – 34 5. «Локомотив» — 34 6. «Арсенал» – 25 7. «Уфа» — 25 8. «Динамо» — 24 9. «Урал» — 24 10. «Спартак» — 22 11. «Тамбов» — 21 12. «Ахмат» — 19 13. «Рубин» — 19 14. «Оренбург» — 19 15. «Крылья Советов» — 18 16. «Шъачэ» — 15.