Мыекъуапэ спорт гимнастикэмкIэ изэIухыгъэ зэнэкъокъу Краснодар краим, Ростов хэкум, Адыгеим яспортсменхэр хэлэжьагъэх.

Тиреспубликэ щапIугъэхэ кIэлэеджакIохэм хагъэунэфыкIхэрэ чIыпIэхэр къыдахыгъэх. Даниил Широковым, Даниил Горягиным, Иван Гладковым, Иван Школэ, Тимур Раджабовым, Илья Базовоим, Даниил Кривоноговым апэрэ чIыпIэхэр къафагъэшъошагъэх.

Дачъэ Ерстэм, Марат Забировым, Андрей Мастеренкэм, Давид Мелконян, Кирилл Игнатьевым, Денис Куликовым, Андрей Яновскэм, Тимур Курдоглян ятIонэрэ чIыпIэхэр къыдахыгъэх.

Дмитрий Пацалюк, Денис Тудиряковым, Павел Власовым, Даниил Родиным, Андрей Яновскэм, Цышэ Мурат ящэнэрэ чIыпIэхэр къахьыгъэх.

Мыекъуапэ испорт еджапIэу Владимир Максимовым ыцIэ зыхьырэм зэIукIэгъухэр щызэхащагъэх. ТиныбжьыкIэхэр зыгъа­сэхэрэм ащыщ Урысыем изаслуженнэ тренерэу Вячеслав Косных. Ащ къызэрэтиIуагъэу, спор­тымкIэ мастер хъунхэм фэшI разрядхэр къахьынхэмкIэ хэушъхьафыкIыгъэу ныбжьыкIэхэр зэ­нэкъокъугъэх. Краснодар краим, Ростов хэкум къарыкIыгъэхэм уащытхъунэу зыкъагъэлъэгъуагъ. Адыгеим зыщызыгъасэхэрэм ясэнаущыгъэ къызэIуахы, спортым цIэрыIо щыхъунхэу тагъэгугъэ.

Дмитрий Ланкиныр Урысыем ихэшыпыкIыгъэ командэ хэт, спорт гимнастикэм гъэхъагъэхэр щешIых. «Урысыем спортымкIэ изаслуженнэ мастер» зыфиIорэ щытхъуцIэр джырэблагъэ ащ къы­фаусыгъ. Мыекъуапэ щапIугъэ спортсменым иапэрэ тренерыр Вячеслав Косных.

ТикIэлэеджакIохэм щысэ зытырахыщтхэр яIэх, ягъэхъагъэхэм ахагъэхъонэу афэтэIо.