Адыгеим и Тэхъутэмыкъое район щызэхэщэгъэ инстру­мен­тальнэ ан­самблэу «Уджым» хыIушъо Шапсыгъэм концертищ къыщитыгъ.

ИкIыгъэ илъэсым ансамблэр зызэхащагъэр илъэс 25-рэ зэрэхъугъэр игъэкIотыгъэу хагъэунэфыкIыгъ. Республикэм ичIыпIэ зэфэшъхьафхэм закъыщагъэлъэгъуагъ, Шапсыгъи къэсыгъагъэх. Мыщ «Уджыр» шIу щалъэгъу, къэкIо зэпытыгъэхэми ягуап.

БэмышIэу ансамблэм лъэпкъ культурэм и Гупчэу ПсышIопэ районым щыIэм исценэ зыкъыщигъэлъэгъуагъ. Джыри ащ хэтхэр шапсыгъэ Адыгэ хасэм Шъачэ къыригъэблагъэхи, инструментальнэ музыкэм июбилей фестивалэу «КъегъаIу адыгэ пщынэм» зыфиIорэм хэлэжьагъэх. ПсэупIэхэу Хьаджыкъо, ШэхэкIэй ыкIи Ныджэпсыхъо концертхэр къащатыгъэх. Ахэм орэдыIохэу ХьакIэцIыкIу Майе, Ацумыжъ Адам, Мышъэ Азидэ, КIакIыхъу Нухьэ ахэтыгъэх.

Ансамблэм ипащэу Къэлэкъу­тэкъо Инвер къеIуатэ: «Уджыр» 1993-рэ илъэсыр ары зэхэщагъэ зыхъугъэр. Адыгэ Республикэм культурэмкIэ изаслуженнэ Iофы­шIэу Таймэз Щамсудин ары ар ылъэ тезыгъэуцуагъэр. Апэрэ илъэс шъыпкъэм ансамблэм «на­родный» зыфаIорэ цIэ лъапIэр къыфагъэшъошагъ. Нэужым Урысыем, Адыгеим ыкIи Пшызэ Iушъо культурэмкIэ язаслуженнэ IофышIэу КIыргъ Юрэ ар зэрищагъ.

А лъэхъаным къамылым, шыкIэпщынэм, Iэпэпщынэм къы­фагъэзэжьэу рагъэжьэгъагъ. Ан­­самблэм ижъырэ адыгэ орэдыжъхэр, композиторхэу Натхъо Джанхъот, Тхьабысымэ Умарэ, КIыргъ Юрэ, Лъэцэрыкъо Кимэ аусыгъэхэ орэдхэмрэ мэкъамэхэмрэ цIыфхэр арагъэдэIущтыгъэх.

«Уджым» музыкантибл хэт: Къэлэкъутэкъо Инвер, КIыргъ Юр, Темрыкъо Адам, Тыкъо Ру­стам, ШъэуапцIэкъо Адам, Мышъэ Аслъан, ШъхьакIумыдэ Хьаджислъан. Ахэр ренэу район, республикэ, шъолъыр ыкIи дунэе фестиваль-зэнэкъокъухэм ахэлажьэх, шIухьафтыныбэ къаратыгъэу яI.

— Тыкъызэрэрагъэблэгъа­гъэмкIэ ыкIи дахэу къызэрэт­пэгъокIыгъэхэмкIэ шапсыгъэ Адыгэ хасэм ипащэу КIакIыхъу Мэджыдэ, цIыфэу къытэплъы­гъэхэм тызэрафэразэр ятэIо. Культурэм и Унэу концертхэр къызщыттыгъэхэм язалхэм цIыф­хэр ачIизыгъ. Къытэплъыхэрэр къэтIорэ орэдхэм къадежъыущтыгъэх. Къэгъэлъэ­гъонхэр мэ­фэкIым фэдагъэх, — къыIуагъ Инвер.