Адыгэ Республикэм испорт Унэшхоу Кобл Якъубэ ыцIэ зыхьырэм профессиональнэ боксымкIэ апэрэу Дунэе зэIукIэгъоу «Кавказ ыгу» зыфиIорэр шэкIогъум и 30-м щыкIощт. Республикэм физкультурэмкIэ икIи спортымкIэ и Комитет пресс-зэIукIэхэу зэхищагъэхэм бок­сымкIэ зэнэкъокъум хэлэжьэщтхэм ацIэхэр къащыраIуагъэх. Адыгэ Республикэм ыцIэкIэ Игорь Ионовымрэ Сергей Вардийрэ яонтэгъугъэхэм ялъытыгъэу яIэпэIэсэныгъэ зэнэкъокъум къыщагъэлъэгъощт.

Дунэе мэхьан

— Мыекъуапэ боксымкIэ щыкIощт зэнэкъокъум дунэе мэхьанэ иIэу сэлъытэ — къытиIуагъ Урысыем, Адыгэ Республикэм язаслуженнэ тренерэу, СССР-м спор­тымкIэ имастерэу, Адыгэ Республикэм и Парламент идепутатэу Владимир Овчинниковым. — Тиреспубликэ спорты­шхом игупчэ хъугъэу сэлъытэ. Адыгеим и ЛIышъхьэу КъумпIыл Мурат, Парламентымрэ Правительствэмрэ якъулыкъушIэхэу зэ­хэщэн IофхэмкIэ IэпыIэгъу къыт­фэхъухэрэм «тхьашъуе­гъэпсэу» гъэзетымкIи ясIожьы сшIоигъу.

Хэгъэгу орденэу «Щытхъум и Тамыгъэр», медалэу «Адыгеим и Щытхъузехьэр», нэмыкIхэри Владимир Овчинниковым къы­фагъэшъошагъэх. НыбжьыкIэхэм япсауныгъэ агъэпытэнымкIэ, физ­культурэм, спортым пыща­гъэхэу псэунхэм фэшI дунэе, хэгъэгу спорт зэнэкъокъухэр Адыгеим зэрэщызэхащэхэрэм шIогъэшхо къытыщтэу В. Овчинниковым елъытэ.

Хэлэжьэщтхэр

Адыгэ къэралыгъо университетым испорт Унэшхоу «Кобл Якъуб» зыфиIорэм бокс щызэдешIэщтхэм шъуащытэгъэгъуа­зэ: Эммануэль Мар-Тей (Гана), Харуна Осуману (Гана), Юрий Кашинский, Руслан Файфер, Игорь Ионов, Максим Летвинец, Максим Власов, Арслан Яллыев, Сергей Врадий, Самвел Погосян, Сергей Кожухарь, Игорь Ялымов (Молдова), Тамбый Аскэр, Шандур Иваненко (ДНР), Хетаг Моураов, Керим Джораев.

Дунэе зэIукIэгъухэм текIоныгъэр къащыдэзыхыгъэ Игорь Ионовыр Сахалин хэкум ичемпионэу Максим Летвинец енэ­къокъущт.

Къыблэм хагъэунэфыкIырэ чIы­пIэр къыщыдэзыхыгъэ Сергей Варадий Краснодар краим щыщэу Самвел Погосян IукIэщт.

Зэнэкъокъум едзыгъуий щы­зэхащэнэу рахъухьагъ

Арслан Яллыевым Урысыем дышъэр къыщихьыгъ, Дунаим и Кубок къыфагъэшъошагъ. ЗэIукIэгъуих профессиональнэ боксым щыриIагъ, зэкIэми текIоныгъэр къащыдихыгъ. Харуна Осуману ар енэкъокъущт.

Сергей Кожухарь Ялымовым пэуцущт. ГъэшIэгъоныр нэбгыри­тIури профессиональнэ боксымкIэ зэнэкъокъухэм ахэла­жьэхэзэ зэIукIэгъу блырыбл зэ­ряIагъэр, текIоныгъэр сыдигъуи къызэрэдахыгъэр ары.

Щэрджэскъалэ илIыкIоу Тамбый Аскэр Шандур Иваненкэм IукIэщт, ар Макеевкэ щыщ.

ЗэIукIэгъу шъхьаIэхэм аха­лъытэ Максим Власовымрэ Африкэм ичемпионэу Эммануэль Мар-­тейрэ язэнэкъокъу. М. Вла­совым зэIукIэгъу 47-рэ иIагъ, 44-мэ текIоныгъэр къащыдихыгъ.

Краснодар щыщэу Руслан Файфер Сыбыр къикIыгъэ Юрий Кашинскэм енэкъокъущт — ар зэIукIэгъу шъхьаIэмэ ахалъытэ. Р. Файфер зэIукIэгъу 24-мэ те­кIоныгъэр къащыдихыгъ, зыр шIуа­хьыгъ.

Юрий Кашинскэр Евразием ичемпион. ЗэIукIэгъу 18 иIагъ, зэкIэми текIоныгъэр къащыди­хыгъ. Дунаим апэрэ чIыпIэр къы­щахьыным фэбэнэнхэмкIэ Мые­къуапэ щыкIощт зэIукIэгъур пэшIорыгъэшъ зэнэкъокъоу щыт.

Тиреспубликэ щызэхащэщт зэнэкъокъум ихьакIэхэу Урысыем и общественнэ палатэ хэтэу Григорий Дрозд, дунаим ичем­пионэу, Къэралыгъо Думэм идепутатэу Дмитрий Пирог, Олим­пиадэ джэгунхэм дышъэр къа­щызыхьыгъэ Щамил Сабировыр спортым пыщагъэхэм гущыIэгъу афэхъущтых.

Зэнэкъокъум изэхэщэнкIэ ­Адыгэ Республикэм и ЛIышъхьэу КъумпIыл Мурат IэпыIэгъу къа­фэхъу. Дунэе зэIукIэгъухэм кIэща­кIо афэхъугъэх. Адыгэ Рес­пуб­ли­кэм физкультурэмкIэ ыкIи спортымкIэ и Комитет, Адыгэ къэралыгъо университетыр, Краснодар краим боксымкIэ и Федерацие, Адыгэ Республикэм боксымкIэ и Федерацие, Андрей Андреевым ыцIэ зыхьырэ шIушIэ фондыр.

Зэнэкъокъур шэкIогъум и 30-м пчыхьэм сыхьатыр 5-м Адыгэ къэралыгъо университетым щырагъэжьэщт. Спортыр зышIогъэшIэ­гъонхэр, языгъэпсэфыгъо уахъ­тэ гум къинэжьынэу зыгъакIо зышIоигъохэр зэхэщакIохэм рагъэблагъэх. Боксым имэфэкI шъухэлажь, зэIукIэгъухэм шъуяплъ.

ЕмтIылъ Нурбый.