Урысые лъэпкъ шIухьафтынэу «Илъэсым истудент» зы­фиIорэм икъыдэхынкIэ зэ­нэ­къокъур Казань щыкIуагъ, ащ икIэух зэфэхьысыжьхэри ашIыгъэх.

Мы шIухьафтыным икIэщакIох Урысыем иныбжьыкIэхэм я Союзрэ платформэу «Урысыер — амалышIухэр зыIэкIэлъ къэралыгъу» зыфиIорэмрэ. ЗэкIэмкIи УФ-м ишъолъыр 48-мэ къарыкIыгъэ студент нэбгырэ 400 Iофтхьабзэм хэлэжьагъ, лъэныкъуи 9-кIэ ахэр зэнэкъокъугъэх.

НыбжьыкIэхэм сэнаущыгъэу ахэлъымкIэ зыкъызэIуахын, социальнэ, творческэ, научнэ ыкIи спорт амалэу аIэкIэлъхэм аха­гъэхъоным зэнэкъокъур фэIорышIэ. Сту­дентхэм профессиональнэ жабзэ аIу­лъэу япроектхэр лъагъэкIотэнхэм, ясэнаущыгъэ къагъэлъэгъоным ахэр фытегъэ­псы­хьагъэх.

А Iофтхьабзэм Адыгеир къыщигъэлъэ­гъуагъ Мыекъопэ къэралыгъо технологическэ университетым иполитехническэ колледж истудентэу Павел Дорошенкэм. «Сту­денческэ советым итхьамат» зыфи-Iорэ лъэныкъомкIэ ящэнэрэ чIыпIэр ащ къыдихыгъ. — Зэнэкъокъум сыфэхьазырыгъ нахь мышIэми, апэ лъэшэу сыгумэкIыщтыгъ. Сызхэлэжьэгъэ зэIукIэ пэпчъ сыгу нахь къыдищэягъэу, теубытагъэ схэлъэу сыкъы­чIэкIыжьыщтыгъ, — къеIуатэ Павел. — Iоф­тхьабзэр гъэшIэгъонэу ыкIи шIуагъэ къытэу рекIокIыгъ. Ащ сыхэлэжьэнэу зэрэхъугъэр лъэшэу сигуап. Зэнэкъокъум щызгъотыгъэ шIэныгъэхэр тапэкIи къызфэзгъэфедэщтых, ахэмкIэ политехническэ колледжым истудентхэм я Союз хэтхэм садэгощэщт. Тэри Павел тыгу къыддеIэу тыфэгушIо, тапэкIи гъэхъэгъэшIухэр ышIынхэу фэтэIо.