Адыгэ Республикэм, Мыекъуапэ художественнэ гимнастикэмкIэ язэнэкъокъу спорт Унэшхоу Кобл Якъубэ ыцIэ зыхьырэм щыкIуагъ.

Краснодар, Шъачэ, Геленджик, Ростов-на-Дону, Мыекъуапэ, нэмыкIхэм защызыгъэсэрэ пшъа­шъэхэр зэIукIагъэх. Аныбжьхэм ялъытыгъэу кIэлэеджакIохэр зыхэхьэхэрэ купхэм яIэпэIэсэныгъэ къащагъэлъэгъуагъ.

Адыгэ Республикэм икомандэхэу «Жъуагъохэр», «Красотки», «Колибри», «Орлята», «Мыекъуа­пэ», «Адыгеир» зыфиIохэрэм апэрэ чIыпIэхэр къыдахыгъэх.

Нэбгырэ зырызхэм язэнэ­къокъу щытекIуагъэхэр: Силукова Валерия, Кушъу Милана, Коваленко Анастасия, Капкова Милена, Зудина Полина, Годынюк Елизавета, Червякова Анастасия, Къош Амина, Сильченко Ева, Свинарева Маргарита.

— Илъэси 4-кIэ узэкIэIэбэжьмэ, Урысыем спортымкIэ имастерэу Яна Цеханович кIэлэцIыкIухэр художественнэ гимнастикэм фигъасэхэу ыублагъ, — къытиIуагъ Мыекъуапэ иадминистрацие физкультурэмкIэ ыкIи спортымкIэ и Комитет ипащэу Дмитрий Щербаневым. — Пшъэ­шъэжъыехэм хэпшIыкIэу яIэпэ­Iэсэныгъэ хагъахъо, Урысыем изэнэкъокъухэм ахэлажьэх, Iэ­кIыб къэралыгъо кIохэуи къы­хэкIыгъ. Художественнэ гимнастикэр спорт лъэпкъ къызэрыкIоп. Пкъыр ищыгъэ хъуным, пшъашъэхэр пытэу алъэ теуцонхэм зыфагъа­сэ, псауныгъэр къаухъумэ, сэнаущыгъэу ахэлъыри къызэIуахы.

— МэфитIо Мыекъуапэ щыкIогъэ зэнэкъо­къум тигуапэу тыхэлэжьагъ, — гущыIэр зэIэпа­хызэ къаIуатэ Краснодар щыщ пшъашъэхэу Дарья Меркушевам, Александра Бахматовам, Лия Джон, София Барабанчиковам. – ЗэIукIэгъухэр гъэшIэгъонэу зэхащагъэх, Мые­къуапэ джыри тыкъакIо тшIоигъоу тикъалэ тэгъэзэжьы.

Зэнэкъокъум икъызэIухын фэгъэхьыгъэ зэхахьэм кIэлэцIыкIу ансамблэу «Мыекъуапэ инэфылъэхэр» щыуджыгъэх. Художественнэ пащэу, Къэбэртэе-Бэлъкъарым иза­служеннэ артистэу, Адыгеим инароднэ артистэу Нэныжъ Айдэ­мыр къытиIуагъ спорт зэнэкъо­къухэм тикъэшъуакIохэр ахэлажьэхэзэ, тилъэпкъ шэн-хабзэхэр ныбжьыкIэхэм арагъэшIэнхэм зэрэпылъхэр.

ХагъэунэфыкIырэ чIыпIэхэр къыдэзыхыгъэхэм зэхэщакIохэр афэгушIуагъэх, кубокхэр, медальхэр, щытхъу тхылъхэр аратыжьыгъэх.