Исурэтхэр гурыIогъошIух
Ингушетием исурэтышI анахь цIэрыIомэ ащыщэу Мурад Полонкоевым иIофшIагъэхэм якъэгъэлъэгъон фэгъэхьыгъэ зэхахьэр Мыекъуапэ щыкIуагъ.
КъокIыпIэм щыпсэурэ лъэпкъхэм искусствэхэмкIэ я Къэралыгъо музееу Мыекъуапэ дэтым ипащэу Кушъу Нэфсэт, республикэм культурэмкIэ иминистрэу Аулъэ Юрэ, шIэныгъэлэжьэу Елена Малышевар, зэлъашIэрэ сурэтышIэу, архитекторэу Бырсыр Абдулахь, М. Полонкоевым ыгъэсэгъэ Муса Точиевыр, Мыекъуапэ щыпсэурэ ингушэу Башир Ужаковыр, нэмыкIхэри зэхахьэм хэлэжьагъэх, искусствэм къытегущыIагъэх.
Урысыем, Ингушетием янароднэ сурэтышIэу Мурад Полонкоевым тыкъэзыуцухьэрэ дунаим, илъэныкъо гупсэ, щыIэныгъэм еплъыкIэу фыриIэм яхьылIэгъэ сурэтхэу къыгъэлъагъохэрэр дахэх. Шъо зэфэшъхьафхэр егъэфедэх, лIэужхэр зэрегъапшэх, иунэ щагоу къыпэIулъым изытет къегъэлъагъо. Ингушетием идэхагъэ сурэтхэм къащыриIотыкIызэ, тарихъым инэкIубгъохэм уахещэ.
— Сисэнэхьат сшIогъэшIэгъон, сигуапэу сисурэтхэмкIэ цIыфхэм «садэгущыIэ», Адыгеим дэгъоу къыщыспэгъокIыгъэх, зэкIэми сафэраз, — къытиIуагъ Мурад Полонкоевым.
Къэгъэлъэгъоныр тыгъэгъазэм и 12-м нэс музеим щыкIощт.
Сахьидэкъо Нурбый. Сурэтым итхэр: Кушъу Нэфсэт, Елена Малышевар, Мурад Полонкоевыр.