ХэгъэгумкIэ ящэнэрэх
Урысыем икIэлэеджакIохэм яя IX-рэ Спартакиадэ Адыгеим испортсменхэр чанэу зэрэхэлэжьагъэхэм АР-м и ЛIышъхьэу КъумпIыл Мурат мэхьэнэ ин ритыгъ.
Хэгъэгум ишъолъырхэу нэбгырэ миллионым нэс зыщыпсэухэрэм яспортсменхэм ягъэхъагъэхэр хэушъхьафыкIыгъэу зэфахьысыжьыгъэх. Адыгэ Республикэм икомандэ ящэнэрэ чIыпIэр къыдихыгъ.
Республикэм икIэлэцIыкIу спорт еджапIэхэм защызыгъэсэрэ спортсмен 58-мэ очко 288-рэ къахьыгъ. Кушъхьэфэчъэ спортымкIэ, гандболымкIэ, дзюдомкIэ, самбэмкIэ, урым-рим бэнакIэмкIэ, спорт гимнастикэмкIэ, атлетикэ онтэгъумкIэ, нэмыкIхэмкIи тикIэлэеджакIохэр къахэщыгъэх.
Гандбол клубэу «Адыифым», дзюдомкIэ Кобл Рэмэзанрэ Тыгъужъ ТIахьиррэ дышъэр къыдахыгъ. Григорий Саакян дзюдомкIэ тыжьыныр къыфагъэшъошагъ, Екатерина Соловьевам самбэмкIэ ящэнэрэ чIыпIэр ыубытыгъ. ЖакIэмыкъо Темыркъан дзюдомкIэ джэрзыр къыдихыгъ. Хьакъуй Амир, самбэмкIэ, ЛъэпцIэрышэ Арамбый, урым-рим бэнакIэмкIэ, Хьабый Хъусен, атлетикэ онтэгъумкIэ, джэрзыр къыдахыгъ.
Республикэм испорт псэуалъэхэр нахьыбэ зэрэхъухэрэр, спорт еджапIэхэм защызыгъасэхэрэм яIэпэIэсэныгъэ зэрэхагъахъорэр республикэм и ЛIышъхьэу КъумпIыл Мурат хигъэунэфыкIыгъэх.
ЛIышъхьэм иунашъо къыщеIо «Спортыр щыIэныгъэм ишапхъ» зыфиIорэ Iофтхьабзэм тиспортсменхэр нахь чанэу хэлэжьэнхэ зэрэфаер, АР-м физкультурэмкIэ ыкIи спортымкIэ и Комитет зэхэщэн Iофыгъохэр нахьышIоу ыгъэцэкIэнхэмкIэ амалышIухэр ыгъэфедэнхэр уахътэм къыгъэуцурэ пшъэрылъэу зэрэщытыр.
Сурэтым итхэр: «Адыифым» хэтхэр.