ШэкIогъум и 30-м боксымкIэ Дунэе зэIукIэгъур апэрэу Адыгэ Республикэм щыкIощт.

Спорт Унэшхоу Кобл Якъубэ ыцIэ зыхьырэм Урысыем, IэкIыб хэгъэгухэм яспортсменхэр профессиональнэ боксымкIэ щызэнэкъокъущтых.

Адыгэ Республикэм физкультурэмкIэ ыкIи спортымкIэ и Комитет щыкIогъэ пресс-зэIукIэм хэлэжьагъэх зэнэкъокъум изэхэщакIохэр, спортсменхэр, журналистхэр. ЗэIукIэгъур зезыщэгъэ Алексей Васильевым игъэкIотыгъэу къыIотагъ Мыекъуапэ зэнэ­къокъоу щыкIощтым мэхьэнэ ин зэрэратырэр.

Дунэе зэIукIэгъухэм текIоныгъэр къащыдэзыхыгъэу, Къыблэ шъолъырым боксымкIэ апэрэ чIыпIэр къыщызыхьыгъэ Игорь Ионовыр Сахалин хэкум боксымкIэ ичемпионэу Максим Летвинец Мыекъуапэ щенэ­къокъущт.

— Адыгеим ыцIэкIэ Дунэе спорт зэIукIэгъум сыхэлэжьэщт, — къытиIуагъ Игорь Ионовым. — Боксыр сшIогъэшIэгъон, ныб­джэгъубэ спортым щысиI.

Сергей Врадий Къыблэм иныбжьыкIэхэм язэнэкъокъу хагъэунэфыкIырэ чIыпIэр боксымкIэ къы­щихьыгъ. Мыекъуапэ щыкIощт зэIукIэгъухэм зэрахэлэжьэщтым егъэгумэкIы. Адыгэ Республикэм ихэшыпыкIыгъэ командэ Сергей Врадий хэт.

Дагъыстан испортсмен ныбжьыкIэу Арслан Яллыевыр опыт зиIэ Вальтер Паласиос IукIэщт, ар Никарагуа щыщ. ЗэIукIэгъу 30-м щыщэу 20-м Никарагуа испортсмен текIоныгъэр къыщыдихыгъ.

Краснодар краим щапIугъэ Сергей Кожухарь иIэпэIэсэныгъэ­кIэ спортышхом щашIэ. Молдовэм къикIыгъэ Виктор Ялимовым С. Кожухарь IукIэщт.

ЗэIукIэгъу шъхьаIэмэ ащыщ Краснодар испортсменэу Руслан Файферэ Сыбыр щыщэу Юрий Кашинскэм зыщенэкъо­къущтыр.

— Адыгэ Республикэм физкультурэмкIэ ыкIи спортымкIэ и Комитет, Краснодар краим боксымкIэ и Федерацие, Адыгэ Республикэм боксымкIэ и Федерацие зэнэкъокъур Мыекъуапэ щызэхащэ, — къытиIуагъ Алексей Васильевым. — Адыгэ Респуб­ликэм и ЛIышъхьэу КъумпIыл Мурат лъэшэу тыфэраз, ар Iэпы­Iэгъу къызэрэтфэхъугъэм ишIуа­гъэкIэ тиIофхэр нахь псын­кIэу лъэкIуатэх.

БоксымкIэ Мыекъуапэ щыкIощт зэнэкъокъум ехьылIэгъэ тхыгъэ­хэр къыхэтыутыщтых.