Къэбэртэе-Бэлъкъарым щыщ режиссер ныбжьыкIэу Бэлэгъэ Къантемыр ыгъэуцугъэ фильмэу «Дылда» зыфиIорэм шэкIо­гъум и 11-м Женевэ щыкIогъэ Дунэе кинофестивалым шIухьафтын шъхьаIэр къыщыдихыгъ.

Ащ номинациеу «Особый взгляд» зыфиIорэмкIэ Каннскэ Дунэе кинофестивалым апэрэ чIыпIэр къызщыфагъэшъошэ­гъагъэм илъэсныкъу текIыгъэр.

«Дылдэ» кинофестиваль зэ­фэшъхьафхэм зэрахэлажьэ­рэм нэмыкIэу Урысыем ишъолъыр­хэм, къалэхэм, IэкIыб къэралыгъохэм ащеплъых, агу рехьы, агъэшIагъо. Кинолентэм мэхьэ­нэ куоу хэлъыр къызгурымыIо­хэрэри щыIэх, зылъэгъунэу фэмыехэри къыхэкIых. ГъашIэр джащ фэд.

Хэгъэгу зэошхор зытекIыгъэр шIэхэу илъэс 75-рэ хъущт. Зэоуж илъэсхэр зыфэдагъэхэм ыкIи цIыфхэм а лъэхъаныр зэрэзэпачыгъэм кинорежиссерхэм бэ­шIагъэу зыфагъэзэжьырэп. Къантемыр икинолентэ а лъэ­хъаныр дэгъоу унэгу къыкIегъэ­уцожьы. Заом псаоу къыхэ­кIыжьыгъэ бзылъфыгъэ ныб­жьыкIитIум ягъашIэ зэрагъэпсы­жьырэр къыреIотыкIы.

Авторым ыцIэ Женевэ ща­Iуагъ. Кинофильм 55-у ащ хэ­лэжьагъэхэм анахь дэгъоу ­къа­хагъэщыгъэр ежь икинолент ары. «Дылдэ» шIухьафтын шъхьа­Iэр къыратыгъ. Ащ спе­циалистхэу еплъыгъэхэми, кино­критикхэми ыныбжь емылъытыгъэу авторым игулъытэ зынэсыгъэ темэр IэпэIэсагъэ хэлъэу къызэригъэлъэгъуагъэр хагъэу­нэфыкIыгъ. Урысыем ицIыфыкIэхэм Къантемыр ахалъытэнэу зэрэтефэрэр къэзыIуагъэхэри ахэтых. Режиссерым имызакъоу, фильмым хэлэжьагъэхэ артистхэу, роль шъхьаIэхэр къэ­зышIыгъэхэ Виктория Мирош­ничен­кэмрэ Василиса Перелыгинамрэ къащытхъугъэх.

Къантемыр кинематографым игъогу къинэу къыхихыгъэм гу­шхоу техьагъ. Ящэнэрэ фильмэу ыгъэхьазырырэр Кавказым фэгъэхьыгъэщт, ащ нэ­мыкI кино­картинэхэри къыкIэлъыкIощтых. Арышъ, тыгу къыддеIэу «Гъогу маф!» етэIо Къантемыр.

Фильмым ипродюсерэу Александр Роднянскэм къызэриIо­рэмкIэ, тихэгъэгу кинофильмхэу щытырахыгъэхэм ащыщэу «Дылдэ» закъор ары США-м къы­щагъэлъэгъонэу къыхахыгъэр. Американскэ компание цIэрыIом къихьащт илъэсым ищылэ мазэ къыщегъэжьагъэу фильмыр къы­гъэлъагъоу ригъэжьэщт.

— Охъэ кIэкIым «Дылдэ» гъогоу къыкIугъэр къыдэплъы­тэмэ, «Оскарым» тыфэбэнэнэу амал тиIэ хъугъэ. Къытэнэкъо­къущтыр бэ, IофшIэгъэ дэгъу­хэ­ри яIэх. Тэри гъэхъагъэ тшIы­нэу гугъапIэ тиI, — еIо А. Род­нянскэм. (Тикорр.).

Сурэтхэм арытхэр: режиссерэу Бэлэгъэ Къантемыррэ (джабгъумкIэ щыт) продюсерэу Александр Роднянскэмрэ; кинофильмэу «Дылдэ» щыщ картинэхэр.