Пшысэр щыIэныгъэм фагъадэ
Адыгэ Республикэм и Къэралыгъо филармоние икIэлэцIыкIу театрэу «Дышъэ къошыным» спектаклэ гъэшIэгъонхэр Мыекъуапэ къыщегъэлъагъох.
— Зыгъэпсэфыгъо мафэхэм кIэлэцIыкIухэм апае нысхъэпэ театрэм зэхищэрэ Iофтхьабзэхэм нэбгырабэ яплъы. «Ны- тыхэри сабыйхэм ягъусэхэу театрэм къызэрэкIохэрэм тегъэгушIо», — къытиIуагъ художественнэ пащэу, Адыгэ Республикэм инароднэ артистэу Сихъу Станислав.
Сергей Латышенкэм ипьесэ техыгъэу дышъэ мэлым фэгъэхьыгъэ пшысэр режиссерэу Юлия Головком дэгъоу зэригъафи, театрэм щигъэуцугъ.
Артистхэу Нэгъой Асыет, Къалэ Саидэ, Сергей Ведериным рольхэр къашIых, театрализованнэ едзыгъохэм псэ къапагъакIэ. КIэлэцIыкIухэр хъугъэ-шIагъэхэм яплъыхэзэ, алъэгъурэр, зэхахырэр ашIошъ агъэхъу. Шъыпкъэу зэкIэри къащэхъу.
Щыгъынхэр артистхэм къякIоу ащыгъых, шъо зэфэшъхьафхэмкIэ гъэкIэрэкIагъэх. Артистхэм ягущыIэхэр зэхэугуфыкIыгъэх, гупшысэшIухэм тхьакIумэр агъашIо. Орэд къызэраIорэ шIыкIэм къэгъэлъэгъоныр къегъэбаи.
Нысхъапэхэр дахэх. Мэлыр фыжьышъо, дышъэпс егъэшъуагъэм фэогъадэ. Нысхъапэр «къызэрэгущыIэрэ» шIыкIэм сабыйхэр лъэплъэх, артистхэм зыгорэ араIожьы ашIоигъоу мэкъэ IэтыгъэкIэ яджэхэу къыхэкIы. Артистхэмрэ кIэлэцIыкIухэмрэ язэпхыныгъэхэм театрализованнэ едзыгъохэр къагъэдахэх.
— ШэкIогъум и 24-м «Зиусхьанэу Блэгъожъыр» къэдгъэлъэгъощт, — къытиIуагъ «Дышъэ къошыным» ипащэу Джолэкъо Ларисэ. — Орэдышъор Адыгеим, Къэрэщэе-Щэрджэсым язаслуженнэ артистэу ЛIыбзыу Аслъан ыусыгъ. Пьесэр Къэрэщэе-Щэрджэсым идраматургэу Бимурзэ Зураб ытхыгъ, Урысыем искусствэхэмкIэ изаслуженнэ IофышIэшхоу, режиссерэу Анатолий Тучковым къэгъэлъэгъоныр ыгъэуцугъ.
Сурэтхэр къэгъэлъэгъоным къыщытетхыгъэх.