Илъэпкъ гъунэнчъэу фэшъыпкъагъ
Адыгэ автоном хэкум иапэрэ зэхэщакIохэм ащыщэу, Адыгэ хэку музеим иапэрэ директорыгъэу, тарихълэжь-краеведэу, общественнэ IофышIэшхоу Наурзэ Ибрахьимэ Аслъанбэч ыкъор къызыхъугъэр илъэси 135-рэ мэхъу.Адыгэм итарихъ ухаплъэмэ, щыIэкIэ-псэукIэр нахьышIу шIыгъэным зыгуи зыпси хэзылъхьэгъэ нэбгырабэм ацIэхэр хэбгъуатэрэп. Лъэпкъым хьалэлэу фэлэжьэгъэ IофышIэшхо гъэсэгъабэр къогъукъуадзэ зэрашIыщтыгъэм ар ищыс. Илъэпкъ ыпашъхьэ шIушIэгъабэ щыриIагъ еджэгъэ-гъэсагъэу, зигулъытэ— гупшысэкIэ щыIэныгъэ лъэныкъуабэм анэсыщтыгъэу Наурзэ Ибрахьимэ.
Ар 1884-рэ илъэсым, ятэжъ абдзахэр иунагъокIэ зыщыпсэущтыгъэ къалэу Самарэ къыщыхъугъ. Кавказ заом илъэхъан кIалэм ятэжъэу гъэры хъугъагъэм ар псэупIэ фэхъугъагъ. Ау ятэжъ чIинагъэу, къызщыхъугъэу, зыщыпсэугъэ хэкужъым идэхагъэу, шэн-хабзэу цIыфхэр зэрыгъуазэщтыгъэхэр, къэбар гъэшIэгъоныбэу къыIуатэщтыгъэхэр Ибрахьимэ ыгу пытэу риубытэщтыгъ. Иакъыл нахь зызэтеуцом, а зэкIэми къахэкIэу, лъэпкъым пфэлъэкIырэр фэпшIэн, уфэгумэкIын ыкIи уфэулэун зэрэфаер зэхишIагъ, игъашIэ ащ фигъэшъошагъ.
Саратов дэтыгъэ къэлэ училищыр къыухыгъ, Пензенскэ хъулъфыгъэ гимназиеми икурсхэм ащеджагъ. Илъэси 9 – 10 фэдизрэ Саратовскэ ыкIи Самарскэ хэкухэм яправлениехэм Iоф ащишIагъ. Ау зыхэти, ышIи акIыIу къышIохъу адыгэхэм ялIыгъэ хабзэ. Наурзэ Ибрахьимэ ащ ыпаIоу дзэм хэтыгъ, 1905-рэ илъэсым ежь ишIоигъоныгъэкIэ урыс-япон заом кIогъагъэ. Ащ шIукIае тешIагъэу, 1917-рэ илъэсым Наурзэм дзэ къулыкъур Кавказ шыудзэ дивизием щихьыгъ, Къэбэртэе полкым хэтыгъэхэм къаIуатэу зэхихыгъэ къэбар зэфэшъхьафхэр – лъэпкъым, унагъохэм, лIакъохэм яхьылIагъэу ышъхьэ ныбжьырэу къинагъэх, ежь зыщыщ адыгэхэм апэрэу аIукIагъ, нахь апэблагъэ хъугъэ, илъэпкъ гумэкI-гукIаехэр а зэкIэми нахь къагъэтIэсхъагъэх.
Октябрэ революцием ифэмэ-бжьымэ зэфэдэкIэ шъолъырхэм къалъыIэсыщтыгъ. Наурзэм а илъэсхэм хэбзэ органхэм Iоф ащишIагъ. 1919-рэ илъэсым имэлылъфэгъу мазэ къыщегъэжьагъэу, зы илъэсрэ, Дзэ Плъыжьым къулыкъу щихьыгъ.
1920-рэ илъэсым, чъэпыогъум, бэрэ зэлъызыIыгъыгъэ гумэкI-гупшысэм Наурзэ Ибрахьимэ илъэпкъ хапIэу, ихэкужъэу Адыгеим къыщэжьыгъ. Ар анахьэу къызхэкIыгъэри, ыгукIэ къыдэхъумэ шIоигъори итхыгъэхэм къащиIуагъ: тарихъыр, этнографиер икIасэхэу, шIогъэшIэгъонхэу къызэрихьырэр, зэо хъугъэ-шIагъэхэм имурад кIэращыщтыгъэми, шIоигъоныгъэ шъхьаIэу зыкIэхъопсыщтыгъэр – къуаджэм щыпсэуныр ыкIи Iоф щишIэныр арэу зэрэщытыр, нэдэплъыпIэ зыщигъотырэм адыгэ фольклорымкIэ Iоф ышIэмэ зэрэшIоигъуагъэр.
Адыгэ кIэлэ гъэсагъэу Наурзэ Ибрахьимэ лъэпкъ интеллигенцием псынкIэу ыштагъ, ежьыри Iофыгъошхохэм язэшIохын фэхьазырыгъ. 1921-рэ илъэсым ар Кубанскэ хэкум изэгъэшIэнкIэ обществэм хэхьэ, ащ шIэныгъэ-гъэсэныгъэ дэгъу зиIэ нахьыжъхэр бэу хэтыгъэх. Наурзэм общественнэ Iофышхо Адыгеим 1920-рэ илъэсым щигъэцэкIагъ. Лъэпкъ гъэсэныгъэмкIэ отделым Iоф щишIагъ, къушъхьэчIэс лэжьакIохэм яя II-рэ ыкIи яя III-рэ зэфэсхэу къалэу Краснодар 1921-рэ илъэсым щыкIуагъэхэм КъохьэпIэ КавказымкIэ адыгэхэм яшъхьафит хэушъхьафыкIыгъэ щыIакIэ иIофыгъо къыщаIэтыгъагъ. И. Наурзэр Пшызэ ыкIи Хы ШIуцIэ IушъомкIэ Горскэ исполкомым хадзы. Горскэ исполкомым и Пленум иунашъокIэ Наурзэр ыкIи К. Мишуриевыр Советхэм яя IХ-рэ Всероссийскэ зэфэс амакъэ атын фитыныгъэ яIэу делегатэу агъэкIогъагъэх. Адыгэхэр автоном хэку хъухэмэ зэрашIоигъор апэрэу Наркомнацым къыщызыIуагъэр, мы IофымкIэ Сталиным ыкIи Калининым апэрэу зафэзыгъэзагъэр Наурзэ Ибрахьим, адыгэхэм ятарихъ очерк кIэкI тхыгъэ тхьапэу афигъэхьыгъэм итыгъ. Ащ ыужкIи автоном хэкур зэхэщэгъэным Горскэ исполкомым хэтхэр яшъыпкъэу ыуж итыгъэх.
Бэдзэогъум и 27-м, 1922-рэ илъэсым ВЦИК-м иунашъокIэ Черкес (Адыгэ) автоном хэкур щыIэ хъугъэ, Наурзэр Президиумым хадзыгъ, Адыгэ хэку исполкомым исекретарэу агъэнафэ. Сыд фэдэ Iофи шъыпкъагъэ фыриIэу зэшIуехы: хэкукIэм игъунапкъэхэр гъэнэфэгъэнхэм, чIыпIэ хэбзэ органхэр зэхэщэгъэнхэм ахэлэжьагъ. Автономиер зыгъотыгъэ лъэпкъым творческэ кIочIакIэхэр къыхэкIыгъэх, Кавказ заом къыщегъэжьагъэу зыпчэ пызыгъэу щыIэгъэ адыгэ лъэпкъым зыкъиштэжьы фежьагъ. Мэхьанэ зиIэ лъэбэкъукIэ хъугъэ 1924-рэ илъэсым ыкIэм Адыгэ автоном хэкум изэгъэшIэнкIэ обществэр щыIэ зэрэхъугъэр.
Лъэныкъуабэ къызэлъиубытэу шIэгъэн фэе Iофхэр агъэнафэх. Тарихъ-краеведческэ организациер зэхэщэгъэн зэрэфаер къызыпкъырыкIыгъэри Наурзэ Ибрахьим ары. Обществэм иIофшIэнкIэ анахь лъэныкъо шъхьаIэу уставым чIыпIэ щызыубытыгъэр музей гъэпсыныр ары: адыгэхэм ятарихъкIэ, яархеологиекIэ, яэтнографиекIэ материалхэр угъоигъэнхэ ыкIи зэгъэзэфэгъэнхэ фэягъэ.
Мы гупшысэр къэралыгъоми игъоу ылъэгъугъ, мылъкукIэ IэпыIэгъу къафэхъугъ. Чъэпыогъум и 1-м, 1925-рэ илъэсым Адыгэ хэку исполкомым игъоу зэрилъытагъэу, Адыгэ хэку краеведческэ музеир щыIэ хъугъагъэ. Ащ иапэрэ директорэу агъэнэфагъэр Наурзэ Ибра-хьим. Илъэсыбэрэ ар музеим иIофышIэ закъоу щытыгъ, ау пшъэрылъ инэу иIэр зэхишIэу, илъэпкъ фэзафэу бэ фызэшIокIыгъэр, ышIагъэр. Ежь Наурзэм ышъхьэкIэ музеим епхыгъэ Iофхэр – экспонатхэр угъоигъэнхэр, ахэр къэтхыхьэгъэнхэр, апылъ тарихъ кIэкIхэр гъэунэфыгъэнхэр, къэзыIотагъэхэм ящыкIэгъэ справкэхэр тхыгъэнхэр, шIэныгъэ мэхьанэу яIэр къэгъэнэфэгъэныр ыкIи адыгэ шъолъырыр къызэлъыкIухьагъэныр, лъэпкъым хэлъ акъыл-шIэныгъэр, IэшIагъэхэр къэтхыхьэгъэнхэр, шэн-хабзэхэр гъэунэфыгъэнхэр ыкIи охътэ зэфэшъхьафхэм адыгэхэм ящыIэкIэ-псэукIагъэм шыхьат фэхъурэ пкъыгъо зэфэшъхьафхэр къэугъоигъэнхэр — а зэIукIэгъэ фондым музей экспозициер хэшIыкIыгъэныр Наурзэм ыпшъэ ифагъ.
Iоф зишIэрэм илъэсибл тешIагъэу зы сурэтышI-гъэкIэрэкIакIо иIэ хъугъагъэ. Лъэпкъым ынапэу хъущт музеир зэхэщэгъошIугъэп ыкIи псынкIэгъуагъэп бгъэпсыныр, джа пшъэрылъ иныр щытхъу хэлъэу зэшIуихыгъ тарихъ шIэныгъэлэжьэу, фольклористэу, этнографэу, емызэщыжь IофшIэкIо чанэу Наурзэ Ибрахьимэ. Лъэпкъым итарихъкIэ гъэзагъэу апэрэ лъагъор пхырищыгъ, адыгэ культурэр гъогу зафэ тырищагъ, зышъхьасыжьыгъэп. Ар къызыхъугъэр илъэси 135-рэ мэхъу, илъэпкъ шIур фэзылэжьыгъэ цIыф гъэсэгъэ акъылышIом ыцIэ епIоныр тефэ, ишIушIагъэ лIэужхэр рэгъуазэх.
Мамырыкъо Нуриет.