Шъукъеблагъ филармонием
Композитор цIэрыIоу Тхьабысымэ Умарэ псаугъэмэ, ыныбжь илъэси 100 хъущтыгъэ. Ащ фэгъэхьыгъэ пчыхьэзэхахьэр Мыекъуапэ зэрэщыкIощтым къытедгъэгущыIэ тшIоигъоу Адыгэ Республикэм и Къэралыгъо филармоние ипэщэ шъхьаIэу Къулэ Мыхьамэт гущыIэгъу тыфэхъугъ.
— Адыгэ Республикэм культурэмкIэ и Министерствэрэ республикэм и Къэралыгъо филармониерэ юбилей пчыхьэзэхахьэр зэхащэ, — къытиIуагъ Урысыем изаслуженнэ артистэу, Адыгэ Республикэм, Темыр Осетием — Аланием янароднэ артистэу Къулэ Мыхьамэт.
— Концертым хэлэжьэщтхэм гъэзетеджэхэр къакIэупчIэх.
— Творческэ купэу, артистэу хэлажьэ зышIоигъохэр бэ мэхъух. Тахади, къахэтхыгъэхэм шъуащыдгъэгъозэщт. Республикэм и Къэралыгъо филармоние и Къэралыгъо симфоническэ оркестрэ, Адыгеим и Къэралыгъо академическэ лъэпкъ къэшъокIо ансамблэу «Налмэсыр», Къэбэртэе-Бэлъкъарым иарт-купэу «Бзэрабзэр», Адыгэ Республикэм искусствэхэмкIэ иколледжэу Тхьабысымэ Умарэ ыцIэ зыхьырэр, кIэлэцIыкIу ансамблэхэу «Шпаргалкэр», «Майкопчанкэр» хэлэжьэщтых.
— ОрэдыIохэм ацIэ къепIуагъэп.
— Адыгэ Республикэм, Къэбэртэе-Бэлъкъарым язаслуженнэ артистэу Дзыбэ Мыхьамэт, Адыгеим, Къэбэртэе-Бэлъкъарым, Къэрэщэе-Щэрджэсым язаслуженнэ артистэу Быщтэкъо Азэмат концертым фэхьазырых. Пчыхьэзэхахьэр нахь гъэшIэгъон зэрэхъущтым тыпылъ, нэмыкI артистхэри хэлажьэхэ ашIоигъоу макъэ къытагъэIугъ.
— Мыхьамэт, искусствэр зышIогъэшIэгъонхэр билетхэм къакIэупчIэх.
— Ащи сигуапэу джэуап къестыжьыщт. Билетхэр зыми ыщэфыщтхэп. Егъэблэгъэ тхылъхэмкIэ филармонием чIэхьащтых. ЗэхэщакIохэм билетхэр цIыфхэм араты- щтых. Филармонием ичIэхьапIэ билетхэр щагощыщтых.
— Концертым хэта къежъугъэблагъэрэр?
— Тхьабысымэ Умарэ Урысыем, IэкIыб къэралыгъохэм ащашIэ. Ар къыдэтлъыти, искусствэм пыщагъэхэр, композиторым иIофшIагъэ зыгъэлъапIэхэрэр, ныбжьыкIэхэр къедгъэблэгъагъэх. Хабзэм икъулыкъушIэхэр, Тхьабысымэ Умарэ зыщапIугъэ Кощхьэблэ районым щыщхэр, Iахьылхэр, фэшъхьафхэри концертым щызэIукIэщтых.
— Жэнэ Къырымызэрэ Тхьабысымэ Умаррэ тарихъым хэмыкIокIэщт орэдыбэ зэдаусыгъ.
— «Синан», «Орэдыр о зигъэгъус», «Сикъуадж», нэмыкIхэри гум иорэд хъугъэх. Жэнэ Къырымызи мыгъэ илъэси 100 хъугъэ. Къырымызи, Умари дунаим ехыжьыгъэх нахь мышIэми, атхыгъэхэмкIэ, яорэдхэмкIэ къытхэтых. Искусствэр зышIогъэшIэгъонхэр филармонием къетэгъэблагъэх. Концертыр шэкIогъум и 21-м сыхьатыр 18.30-м аублэщт.