Гум къикIырэ гущыIэр
Усэн-гупшысэныр зыхэлъэу, ащкIэ гъэзагъэу Iофышхо зышIэхэрэм гум, псэм атешIыкIыгъэ гущыIэр агъэпсы, ныдэлъфыбзэ-адыгабзэр аухъумэ, лъэпкъ акъылым хахъо фашIы.
МэфэкI тхылъ къэгъэлъэгъонэу Адыгэ Республикэм и Лъэпкъ тхылъеджапIэ къыщызэIуахыгъэм «Художник слова и души» зэреджагъэхэр. Ар адыгэ тхакIоу, Урысыем итхакIохэм я Союз хэтэу ГъукIэлI Нурбый къызыхъугъэр илъэс 80 зэрэхъурэм фэгъэхьыгъ.
Литературэмрэ краеведениемрэкIэ отделым ипащэу ГъукIэлI Фатимэ къызэриIуагъэмкIэ, къэгъэлъэгъоныр тхакIом ищыIэныгъэ ыкIи итворчествэ цIыфхэм зэлъягъэшIэгъэным фэлажьэ. Экспозициер IахьитIоу гощыгъэ: апэрэм — «ЩыIэныгъэр — лъапсэ» зыфиIорэм — гъэзет хэутыгъэ тхыгъэхэр, гукъэкIыжь зэфэшъхьафхэр ГъукIэлI Нурбый ищыIэныгъэ фэгъэхьыгъэу щызэгъэзэфагъэх.
Къэгъэлъэгъоным иятIонэрэ Iахь тхакIом ипроизведениехэу икъэлэмыпэ къыпыкIыгъэхэм афэгъэхьыгъ. Ащ нэмыкIэу, Н. ГъукIэлIым итхылъ пэпчъ ехьылIэгъэ статьяхэу гъэзетхэм, журналхэм къарыхьагъэхэр апэчIынатIэу къагъэлъагъох. Ащ фэдэ шIыкIэм мэхьанэшхо иI тхакIом итворчествэ тхылъеджэхэм, студентхэм ыкIи литературэр зисэнэхьатхэм ягъэшIэгъэнымкIэ. МэкIайхэм тхакIом илъэс 15-м къыкIоцI къыIэкIэкIыгъэ тхылъхэр — повестхэр, къэбархэр, рассказхэр, усэхэр зыдэтхэр ащытэлъэгъух. Ахэм ащыщых иапэрэ тхылъэу 2004-рэ илъэсым къыдэкIыгъэу «ГъашIэм игумэкIхэр» ыкIи «Жъогъо шIуцIэхэр», «Жьыбгъэм ыхьырэ тхьапэхэр», «Джэнэт лъэгум икIэй», «Аужырэ оркъ» зыфиIохэрэр.
ГъукIэлI Нурбый зэдзэкIыгъэ IофшIагъэу иIэри щыкIэгъэтхъыгъ къэгъэлъэгъоным: адыгабзэкIэ зэридзэкIыгъэхэу М. Горькэм иеу «Сказки об Италии», П. Мериме ипроизведениехэу «Кармен», «Коломбо», Джек Лондон ытхыгъэу «Мексиканец». ТхакIоу ГъукIэлI Нурбый ищыIэныгъэ ыкIи итворчествэ афэгъэхьыгъэ къэгъэлъэгъоныр шэкIогъум и 12-м къыщегъэжьагъэу тыгъэгъазэм и 1-м нэс зэIухыгъэщт, тхакIом игупшысэ нахь пэблагъэ хъумэ зышIоигъохэм ар къашъхьапэщт.
Дзэукъожь Нуриет.