Я IХ-рэ Дунэе фестивалэу лъэпкъ театрэхэм яIагъэр Темыр Осетием — Аланием икъэлэ шъхьаIэу Владикавказ щыкIуагъ. Театрэм и Илъэс IофшIэгъэ дэгъухэмкIэ хагъэунэфыкIыгъ.

«Гъунапкъэ зимыIэ пчэгу» зы­фиIорэ фестивалым республики 8-мэ ялъэпкъ театрэхэр хэлэжьагъэх. Темыр Осетием — Аланием и Къэралыгъо академическэ театрэу Владимир Тхапсаевым ыцIэ зыхьырэм исценэ спектаклэхэр къыщагъэлъэгъуагъэх.

Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм ихудожественнэ пащэу, режиссерэу ХьакIэгъогъу Къэсэй ыгъэуцугъэ спектаклэу «Кавказский меловой кругым» Дунэе фестивалым щеплъыгъэх.

Лъэпкъ зэфыщытыкIэхэр гъэпытэгъэнхэм театрэр зэрэхэлажьэрэм осэ ин къыфашIыгъ, рэзэныгъэ тхылъ къыфагъэшъошагъ. Адыгэ Республикэм изаслуженнэ артисткэу Уайкъокъо Асыет бзылъфыгъэ ролыр анахь дэгъоу къышIыгъэу ыцIэ къыраIуагъ. Режиссер Iофыгъохэр анахь дэгъоу зыгъэцэкIагъэр ХьакIэгъогъу Къэсэй.

— Фестивалым тищытхъу ща­Iуагъ, къытфэгушIуагъэх, — игу­пшысэхэм тащегъэгъуазэ Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм ихудожественнэ пащэ игуа­дзэу, Абхъазым изаслуженнэ артистэу Исуп Тимур. — ОсэшI купым хэтхэм гущыIэ фабэхэр къытфаIуагъэх, залым чIэсхэр бэрэ Iэгу къытфытеуагъэх.

«Кавказский меловой кругыр» зэIэпахызэ урысыбзэкIэ, адыгабзэкIэ, абхъазыбзэкIэ, чэчэны­бзэкIэ, осетиныбзэкIэ артистхэм къагъэлъагъо. Лъэпкъхэм язэ­пхыныгъэ искусствэм зэригъэпытэрэр фестивалым изэхэща­кIохэм къыхагъэщыгъ.

Дунэе фестивалэу «Къыблэ сценэр» шэкIогъум иаужырэ мэфи 10-м Налщык щыкIощт. Адыгэ Республикэм и Лъэпкъ театрэ дунэе зэхахьэм рагъэблэгъагъ, спектаклэу «Кавказский меловой кругыр» къыщигъэлъэгъощт.

Сурэтхэм арытхэр: спектаклэм щыщ едзыгъо ­къэгъэлъэгъонхэр.