Адыгэ Республикэм иапэрэ Президентэу Джарымэ Аслъан ыцIэкIэ агъэнэфэгъэ шIухьафтынхэм якъыдэхын фэгъэхьыгъэ зэнэкъокъур Мыекъуапэ самбэмкIэ щызэхащагъ.

Илъэс 17 — 18 зыныбжь кIалэхэр, пшъашъэхэр зэIукIэгъу­хэм ахэлэжьагъэх. Алырэгъум бэнэкIо 300-м ехъу щызэнэкъо­къугъ. Астрахань, Волгоград, Ростов хэкухэм, Краснодар краим, Къалмыкъым, Къырым, Севастополь, Адыгеим яныбжьыкIэхэр апэрэ чIыпIэхэм афэбэнагъэх.

Республикэм испортсменхэм дышъи 5, нэмыкI медальхэр къа­хьыгъэх. Гъомлэшк Анзор, кг 48-рэ, Бэгъ Тимур, кг 60, Хьа­къуй Амир, кг 65-рэ, Анна Леднева, кг 65-рэ, дышъэр къафагъэшъо­шагъ. Тренерхэу А. Гъомлэшкыр, С. Мэрэтыкъор, А. Адзынэр бэнакIохэм япащэх.

Батмэн Амир, кг 52-рэ, Нащ Расул, кг 56-рэ, Кирилл Литвиновыр, кг 70-рэ, ПIатIыкъо Заринэ, кг 65-рэ, Мыгу Миланэ, кг 70-рэ, тыжьыныр къыдахыгъ. Тренерхэу А. Мырзэм, Р. Джарымэкъом, Н. Джарымэкъом, Е. Демченкэм, С. Мерэмым ме­дальхэр къэзыхьыгъэхэр агъасэх.

Кобл Рэмэзан, кг 48-рэ, Борсэ Щамил, кг 56-рэ, Тыгъужъ ТIахьир, кг 56-рэ, Алалэ Азэмат, кг 65-рэ, ХьакIако Данэ, кг 52-рэ, Виктория Белоглазовам, кг 65-рэ, Екатерина Соловьевам, кг 75-м къехъу, ящэнэрэ чIыпIэхэр къафагъэшъошагъэх.

— Республикэм иапэрэ Президентэу, спортымкIэ дунэе класс зиIэ мастерэу Джарымэ Аслъан илъэс 80 зэрэхъурэм фэгъэхьыгъэу зэнэкъокъур зэхэтщагъ. Адыгеим и ЛIышъхьэу КъумпIыл Мурат, Правительствэмрэ Парламентымрэ якъулыкъушIэхэм, нэмыкIхэу IэпыIэгъу къытфэхъугъэхэм тафэраз, — къытиIуагъ республикэм самбэмкIэ иеджапIэ ипащэу, спортымкIэ дунэе класс зиIэ мастерэу Делэкъо Адамэ. — Зэнэкъокъур гъэшIэгъонэу кIуа­гъэ, ныбжьыкIэхэм яIэпэIэсэныгъэ къагъэлъэгъонымкIэ амалышIухэр яIагъэх.

Спортым иветеранхэм, ныбжьыкIэхэм ацIэкIэ Джарымэ Аслъан нэпэеплъ кубокхэр къыфагъэшъошагъэх. Адыгеим физкультурэмкIэ ыкIи спортымкIэ и Комитет ипащэу илъэсыбэрэ щытыгъэ Джарымэкъо Юсыф зэхахьэм къыщиIуагъ республикэм испорт зиушъомбгъуным, Адыгеир спортышхом нахьышIоу щашIэным афэшI Джарымэ Ас­лъан Iофы­гъуабэ зэригъэцэкIагъэр.

Джарымэ Аслъан хэушъхьафыкIыгъэ шIухьафтынэу ыгъэнэфагъэхэр, медальхэр, кубокхэр бэнакIохэм аратыжьыгъэх. Апэрэ Президентыр ныбжьыкIэхэм, тренерхэм афэгушIуагъ, ягъэхъа­гъэхэм ахагъэхъонэу афиIуагъ.

ХагъэунэфыкIырэ чIыпIэхэр къыдэзыхыгъэхэр Урысыем иныбжьыкIэхэм язэнэкъокъоу 2020-рэ илъэсым щылэ мазэм Екатеринбург щыкIощтым хэлэжьэщтых.

Сурэтхэм арытхэр: Джарымэ Аслъан фэгушIох; зэнэкъокъум чанэу хэлэжьагъэхэр.