ПауэрлифтингымкIэ, кIуачIэр зыщагъэфедэрэ спорт лъэпкъэу «Коррида-11» зыфиIорэмкIэ Европэм изэнэкъокъу Ростов-на-Дону щыкIуагъ.

Нэбгырэ 500-м нахьыбэ зэIукIэгъухэм ахэлэжьагъ. Адыгэ къэралыгъо университетым ихэшыпыкIыгъэ командэ батыри 3 хэтыгъ. ФизкультурэмкIэ ыкIи дзюдомкIэ Институтым зыщызыгъэсэрэ Денис Папенкэм едзыгъуищыми текIоныгъэр къащыдихыгъ, спортымкIэ дунэе класс зиIэ мастер хъугъэ.

Дмитрий Босанцовым едзыгъуитIумэ текIоныгъэр къащихьыгъ. Штангэр чIым къытеIэтыкIыгъэнымкIэ тыжьыныр къыфагъэшъошагъ, спортымкIэ мастер хъугъэ. Адыгэ къэралыгъо университетым икафедрэ идоцентэу Иван Манько гъогогъуитIо дышъэр къыдихыгъ, спортымкIэ мастерым ишапхъэхэр ригъэкъугъэх.

— Тибатырхэм тагъэгушIуагъ, — къытиIуагъ Адыгэ къэралыгъо университетым физкультурэмкIэ ыкIи дзюдомкIэ и Институт ипащэу Бгъуашэ Айдэмыр. — НыбжьыкIэхэм япсауныгъэ агъэпытэнымкIэ, физкультурэмрэ спортымрэ апыщагъэхэм япчъагъэ хэгъэхъогъэнымкIэ Iофтхьабзэхэр зэхэтэщэх.

Сурэтым итхэр: зэнэкъокъум хэлэжьэгъэ батырхэр.