Республикэм и Къэралыгъо филармоние урыс лъэпкъ Iэмэ-псымэхэмкIэ и Къэралыгъо оркестрэу «Русская удалым» зичэзыу илъэс IофшIэныр ригъэжьагъ.

ЗыкIыныгъэмрэ ЗэгурыIоныгъэмрэ ясаугъэтэу Мыекъуапэ дэтым ыпашъхьэ апэрэ концертыр щыкIуагъ. Урысыем, Адыгеим якомпозиторхэм аусыгъэхэр пчыхьэзэхахьэм щыIугъэх.

«Искусствэхэм ячэщ» зыфиIорэ Iофтхьабзэм «Русская удалыр» чанэу хэлэжьагъ. Филармонием игупчэ чIэхьапIэ оркестрэм къыщитыгъэ концертым урыс, адыгэ лъэпкъ орэдхэр щызэхэтхыгъэх.

Композиторхэм япроизведениехэр зышIогъэшIэгъонхэм япчъагъэ нахьыбэ зэрэхъурэр оркестрэм ихудожественнэ пащэу, Адыгэ Республикэм инароднэ артистэу Андрей Ефименкэм тизэдэгущыIэгъу щыхигъэунэфыкIыгъ.

Хэгъэгум щыпсэурэ лъэпкъхэм языкIыныгъэ и Мафэ «Русская удалым» тигуапэу тедэIугъ. Зэкъошныгъэм ипчэгу щыкIогъэ мэфэкI зэхахьэм Анастасия Истамуловам урыс лъэпкъ орэдхэр къыщиIуагъэх, оркестрэм лъэпкъ орэдышъохэр ыгъэжъынчыгъэх.

ЕмтIылъ Нурбый. Сурэтым итхэр: Андрей Ефименкэр япащэу «Русская удалым» концерт къеты.