«Зэкъошныгъ» Мыекъуапэ — «Динамо» Ставрополь — 4:3. ШэкIогъум и 10-м Адыгэ республикэ стадионым щызэдешIагъэх.

Зезыщагъэхэр: А. Зубов —Азов, В. Бочков — Шъачэ, Р. Къошк — Шытхьал. «Зэкъошныгъ»: Ковалев, Катаев, Кадимов, Омаров, Юрченко (Арзуманян, 52), Ахмедханов, Белов, Ещенко (Дыхъу, 90), Къо­нэ, Мамонов (Крылов, 62), Бабенко (Делэкъу, 67). Къэлапчъэм Iэгуаор дэзыдзагъэхэр: Къонэ — 5, 29 (пенальти), Бабенко — 38, Ахмедханов — 85 (пенальти) — «Зэ­къошныгъ». Чернышов — пе­нальти — 7 (къэлапчъэм блэугъ), 20, 32, Яцук — 71 (пенальти).

Гъогогъуи 4 командэхэр пенальтикIэ къэлапчъэм дэуагъэх. Ащ фэдэ бэрэ къыхэкIырэп.

И. Чернышовым пенальтир ыгъэ­цакIэзэ тикъэлапчъэ къызыдэом, Iэгуаор къэлэпчъэпкъым шъхьарыкIыгъ. В. Яцук пенальтир зегъэцакIэм, тикъэлэпчъэIутэу Р. Ковалевым Iэгуаом зылъи­дзыгъ, ау къызэкIидзэжьынэу хъугъэп.

Судьям гъогогъуи 5 «Зэкъошныгъэм» иешIакIохэм, гъогогъуи 6 «Динамэм» афигъэпытагъ. Арэу щытми, дысэу ешIагъэхэу тлъы­тэрэп.

ЗэIукIэгъур рагъэжьэгъэ къодыеу А. Къонэр ухъумакIохэм аIэкIэкIи, къэлапчъэм Iэгуаор дидзагъ — 1:0. ТиешIакIохэр къэлапчъэм ыпашъхьэ щызэгурыIуагъэхэп, «Динамэм» пхъашэу пэуцугъэхэп. Ар И. Чернышовым ыгъэфеди, шъабэу тикъэлапчъэ шъхьэкIэ къыдэуагъ, Iэгуаор хъа­гъэм ифагъ. «Динамэм» иешIа­кIохэм ащыщ Iэгуаор ыIэ тефи, пенальтир А. Къонэм дэгъоу ыгъэцэкIагъ — 2:1. С. Бабенкэм «Динамэм» иухъумакIохэр къызэринэкIыгъэх. КъэлэпчъэIутэу С. Аршиевыр къызыпэгъокIым ыгъэплъэхъугъ, ащи IэкIэкIи хъа­гъэм Iэгуаор ридзагъ — 3:1.

«Зэкъошныгъэм» ешIэгъур къы­хьыщтэу тыгугъэзэ, «Дина­мэм» тикъэлапчъэ гъогогъуитIо Iэгуаор къыдидзагъ, зыр пе­нальтикIэ — 3:3. ЕшIэгъур нахь гъэшIэгъон хъугъэу зэнэкъокъум теплъыщтыгъ. А. Делэкъор, Н. Катаевыр, Р. Ахмедхановыр, А. Къонэр, нэмыкIхэри «Дина­мэм» икъэлапчъэ дэуагъэх, ау Iэгуаор хъагъэм рагъэфэн алъэ­кIыщтыгъэп. «Зэкъошныгъэм» иешIакIохэр апэкIэ илъыгъэхэу «Динамэм» рэхьат ратыщтыгъэп. Р. Ахмедхановыр къэлапчъэм лъэшэу зыдэом, «Динамэм» иухъумакIо Iэгуаор тефагъ. Пенальтир Ризван дэгъоу ыгъэцэ­кIагъ, 4:3.

Пресс-зэIукIэр

«Динамэм» итренер шъхьаIэу Лев Ивановым къызэриIуагъэмкIэ, гъогогъуи 4 къэлапчъэм Iэ­гуаор къызыдадзэкIэ ешIакIохэм уащытхъунэу щытэп. «Динамэр» Ставрополь краишхом икоманд, апэрэ купым хэхьаным фэбэнэн фае, ау стадион зэтегъэпсыхьагъэ иIэп, ифэIо-фашIэхэри нахьышIоу агъэцэкIэщтхэу мэгугъэ. Л. Ивановыр «Зэкъошныгъэм» къыщытхъугъ, С. Бабенкэр тиешIакIохэм къахигъэщыгъ.

«Зэкъошныгъэм» итренер шъхьаIэу Ешыгоо Сэ­фэрбый тиешIакIохэм афэраз, гуетыныгъэм ишIуа­гъэкIэ текIоныгъэр къыдахыгъэу ылъытагъ. ЕшIа­кIохэм ащыщхэм яшъобж­хэр агъэхъужьых, зэнэкъо­къум нахь чанэу хэлэжьэнхэм фэшI зыгъэпсэфыгъо уахътэу яIэщтыр агъэфе­дэщт.

Адыгэ Республикэм и Къэралыгъо упчIэжьэгъоу ТхьакIущынэ Аслъан, Урысыем и Къэралыгъо Думэ идепутатэу Хьасанэкъо Мурат, нэ­мыкI хэбзэ къулыкъушIэхэр ешIэгъум еплъыгъэх.

ЗэIукIэгъухэр

«Легион» — «Краснодар-3» — 2:0, «Спартак» Вл — «Интер» — 3:4, «Спартак» Нч — «Черноморец» — 0:2, «Биолог» — «Мэщыкъу» — 2:1, «Урожай» — «Махачкала» — 5:2, СКА — «Волгарь» — 1:3. ЧIыпIэхэр 1. «Волгарь» — 46 2. «Алания» — 40 3. «Черноморец» — 33 4. «Зэкъошныгъ» — 28 5. «Динамо» — 27 6. СКА — 24 7. «Мэщыкъу» — 23 8. «Биолог» — 23 9. «Легион» — 23 10. «Махачкала» — 22 11. «Интер» — 19 12. «Краснодар-3» — 18 13. «Спартак» Нч — 16 14. «Урожай» — 14 15. «Анжи» — 12 16. «Спартак» Вл — 4. ШэкIогъум и 17-м «Зэкъошныгъэр» Щэрджэскъалэ щыIукIэщт чIыпIэ командэу «Эльбрусым». Сурэтым итхэр: Къонэ Амиррэ Ризван Ахмедхановымрэ.