Илъэпкъ гупшысэкIэ къытхэт
ТхэкIо цIэрыIоу, драматургэу, Адыгэ Республикэм и Къэралыгъо премие къызыфагъэшъошагъэу Къуекъо Налбый илъэсыбэрэ зыщыпсэугъэ унэу Мыекъуапэ дэтым мыжъобгъу къыщыфызэIуахыгъ.
Адыгэ къэралыгъо университетым филологиемкIэ ифакультет ипащэу, филологие шIэныгъэхэмкIэ докторэу, профессорэу Пэнэшъу Уцужьыкъо зэхахьэм къыщиIотагъ зыми фэмыдэу тхэщтыгъэ Къуекъо Налбый литературэм лъэгъо шъхьаф зэрэщыпхырищыгъэр. УсакIом илъэныкъо гупсэ идэхагъэ, лъэпкъым ичIыгу баеу зэрэщытыр, цIыф шIагъохэр хэкум, хэгъэгум зэращыпсэухэрэр итхыгъэхэм къахэщы. Пщыщэ ичъакIэ зэхихыщтыгъ, ытхырэм лъэпкъ гупшысэр щыпхырищыщтыгъ. ГущыIэр зэрэбгъэфедэн фаем фэгъэсагъэу щытыгъ, ытхырэмкIэ образхэр къызэIуихыхэзэ цIыфмэ алъыIэсыщтыгъ.
Литературэм идунэе лъэгапIэ нэсыгъэу Къуекъо Налбый зэрэтхэщтыгъэм, чIыгур зэрэчэрэгъурэм гупшысэу хихырэм, Адыгэ радиом икъэтынэу «Гумзагъэм» Iоф зэрэдишIэщтыгъэм, пьесэу ытхыгъэхэм атехыгъэ спектаклэхэр Лъэпкъ театрэу Цэй Ибрахьимэ ыцIэ зыхьырэм зэрэщагъэуцугъэхэм, «Тятэжъхэм яорэдхэр» зыфиIорэр гум непи къызэригущыIыкIырэм, зыщапIугъэ къуаджэу Къунчыкъохьаблэ игурыт еджапIэ Къуекъо Налбый ыцIэ зэрэфаусыгъэм, нэмыкIхэм къатегущыIагъэх Къэралыгъо упчIэжьэгъоу ТхьакIущынэ Аслъан, Адыгэ Республикэм культурэмкIэ иминистрэу Аулъэ Юрэ, республикэм гъэсэныгъэмрэ шIэныгъэмрэкIэ иминистрэу КIэрэщэ Анзаур, журналистэу, Урысыем итхакIохэм я Союз хэтэу Евгений Саловыр, Мыекъуапэ инароднэ депутатхэм я Совет идепутатэу Джарымэкъо Азмэт, Урысыем изаслуженнэ артисткэу, Адыгэ Республикэм инароднэ артисткэу Зыхьэ Мэлайчэт, филологие шIэныгъэхэмкIэ докторэу Бырсыр Батырбый, Урысыем инароднэ сурэтышIэу, тхакIохэм я Союз хэтэу Къат Теуцожь, Теуцожь районым иадминистрацие гъэсэныгъэмрэ шIэныгъэмрэкIэ и ГъэIорышIапIэ ипащэу Блэгъожъ Налбый.
Зэхахьэр зэрищагъ Адыгэ Республикэм искусствэхэмкIэ изаслуженнэ IофышIэшхоу, Къалмыкъым изаслуженнэ артистэу Хьакъуй Аслъан. «Мэчэрэгъу» зыфиIорэ усэу Къуекъо Налбый ытхыгъэм А. Хьакъуир гур зыфищэу къеджагъ. Зыхьэ Мэлайчэт къызэджэгъэ лъэпкъ шIэжь усэри щыIэныгъэм иджэмакъ.
Мамый Руслъан, Шъхьаплъэкъо Къэсэй, Къулэ Амэрбый, МэщфэшIу Нэдждэт, Къуекъо Асфар, Ацумыжъ Казбек, Цэй Роз, Кушъу Нэфсэт, Чэмышъо Гъазый, Дэрбэ Тимур, Дзыбэ Саныет, Хъурмэ Хъусен, культурэм, искусствэм яIофышIэхэу гущыIэгъу тызыфэхъугъэхэм Къуекъо Налбый гущыIэ фабэу къыфаIо ашIоигъом уегъэгушхо. ЧIыгур очэрэгъуфэ Къуекъо Налбый итхыгъэхэмкIэ дунаим щашIэщт, иджэныкъо машIо щыкIосэщтэп.
Мыекъуапэ культурэмкIэ и Унэу «Гигантым» ипэчIынатIэу щыт псэупIэу Къуекъо Налбый зычIэсыгъэм мыжъобгъур къыщызэIуахыгъ. ТхьакIущынэ Аслъанрэ Налбый ыкъоу Лауркъанрэ мыжъобгъум пэIухъор зыIуахым, тхэкIо цIэрыIом исурэт дахэу къэлъэгъуагъ.
Къуекъо Налбый ишъхьэгъусэу Жаннэ ти ЛIышъхьэу КъумпIыл Мурат, мыжъобгъум игъэпсын, икъызэIухын хэлэжьагъэхэм лъэшэу зэрафэразэр зэхахьэм къыщиIуагъ. Iофтхьабзэм хэлэжьагъэхэм къэгъэгъэ Iэ-рамхэр мыжъобгъум кIэралъхьагъэх.
ЕмтIылъ Нурбый.